Халық санағы: келесі жылға ауыстыру ұсынылды
Шешімнің негізгі мақсаты - санақты жүргізетін мамандарды ғана емес, оған қатысатын халықты да инфекциядан қорғауҰлттық экономика министрі Руслан Дәленов халық санағына қатысты пікір білдірді, деп хабарлайды Sputnik Қазақстан тілшісі.
"Ұлттық халық санағы 1-30 қазан күндері өткізіледі деген жоспар болған. Алайда санақ кезінде мамандар үйлерді аралап, адамдармен тығыз араласады. Ондайда коронавирустың таралу қаупі бар. Осыған байланысты ұлттық экономика министрлігі халық санағын келесі жылға ауыстыру туралы ұсынысты үкіметтің қарауына енгізді", - деді Дәленов орталық коммуникациялар қызметінде өткен онлайн брифингте.
Министрдің айтуынша, осы шешімнің негізгі мақсаты - санақты жүргізетін мамандарды ғана емес, оған қатысатын халықты да инфекциядан қорғау.
"Біз осындай шешім қабылдадық. Енді үкіметтің жауабын күтіп отырмыз", - деп атап көрсетті Дәленов.
Айта кетейік, Қазақстанда соңғы халық санағы 2009 жылы өткізілген болатын. Заң бойынша ондай шара әрбір он жыл сайын өтуі керек. Былтыр оны 2020 жылдың ақпан-наурыз айларында ауыстырған болатын. Ал осы жылы тағы қазан айына ауыстырды.
