Ақжармалық жас отбасы – байқау жүлдегері

Облыстық Жастар ре­сурстық орталығының ұйымдастыруымен жас отбасылар арасында­ «Жас отау» байқауы өт­ті. Сайысқа Қызылорда қаласы мен 7 ауданнан жас отбасылар қатысып, өзара бақ сынасты.

Отбасы институтын қалыптастыру, отбасылық құндылықтарды жаңғыр­ту, жас отбасылардың қоғамдағы рө­­лін арттыру мақсатында ұйымдас­ты­рылған іс-шараға Ақжарма ауылы­ның Тілеубергеновтер отбасы қатыс­ты.

Байқауда облыстық қоғамдық даму басқармасы басшысының орынбасары Артур Қамбаров жастар ұйымдары мен жас отбасыларды әлеуметтік қолдауға бағытталған іс-шараларға тоқталды.

– Халқымыз ежелден «Отан отбасынан басталады» деп шаңырақтағы шаттыққа, жарымен жарасым табуға, жасыл құрақтай жайқалған ұл-қы­зына тәлім-тәрбие беруге, ағайын-туғанның арасында сыйластық орнауына айрықша мән берген. Жаһандық сын-тегеуріндер уақытында отбасы инс­титутын дамыту мен нығайту ел болшағының жарқын кепілі бол­мақ. Дәл осы кезеңде мемлекеттік бағ­дарламалар тетігі арқылы қастерлі құн­дылықтарымызға барынша көңіл бөлгеніміз дұрыс. Өздеріңізге белгілі, бұл конкурстың іріктеу кезеңіне 80-нен аса жас отбасы қатысты. Осының өзі жұмыстың нәтиже беріп жатқанын аңғартады, – деді ол.

Үш кезеңнен тұратын байқауда қа­тысушылар тек ән-жыр айтумен шектелген жоқ. Олар салт-дәстүрмен са­бақтасқан түрлі сұрақтарға жауап беріп, отбасы құндылықтарын дәріп­тейтін көріністерді көрермен назарына ұсынды. Сондай-ақ жас әкелер бата берсе, балалар жеті атасын жатқа айтты.

Тартысты өткен сайыста сырда­рия­лық Тілеубергеновтер отбасы III орын алды. Бұл жүлделі орынды қаза­лылық Қалиевтер отбасымен бөлісті.

– Ақжарма ауылында шаруашы­лықта 10 жылдан бері күрішшімін. Жас отбасы ретінде байқауға қаты­суға келіншегім Әсемкүл өтініш біл­дірді. Екі кішкентаймыз бар. Ата-анам­ның батасымен көгеріп-көктеп отыр­­мыз. Қарашаңырақтағы кенже ұл болғандықтан әркез үлкендердің біз­дерді қолдап отыратынын сезінеміз. Жақсы отбасы болуға тырысамыз. Қазірі жас отбасыларды қолдауға, отбасы құндылықтарын насихаттауға арналған байқауларға қатысып ке­ле­міз. Бұл өз кезегінде үлгілі отба­сы болуға, ерлі-зайыптылардың ара­­­сын­дағы сыйластық пен сүйіс­пен­шілікті қалыптастыруға, бала тәр­биесін ны­­ғай­туға септігін тигізеді, – дейді ақ­жар­­малық Бақытжан Тілеубергенов.

Жас отбасылардың айтуынша мұн­дай байқаудың әсіресе, балаларға берері мол дейді. Тыңғылықты дайындалып, салт-дәстүрден мол хабардар болатын отбасылар осындай бас­тама жалғасын тапса деген тілекте. Ал ұйымдастырушылар тағылымды сайыстың алдағы уақытта жалғасын табатынын айтады.
Айта кетейік, жас отбасыларды жан-жақты шығармашылық қолдау мақ­сатында аталған байқау облыстық «Жас­тар ресурстық орталығының» баста­масымен соңғы бірнеше жылда дәс­түрлі түрде өткізіліп келеді.

Бибісара ЖАНӘЛІ