Қарттар құрметке бөленді

«Достық» үйінде аудандық орта­лықтандырылған кітапханалар жүйесіне қарасты №1 филиал кітапха­насының ұйымдастыруымен 1 қазан – халықаралық қарттар күніне» орай «Қарты бар үй – қазыналы» тақы­рыбында сала ардагерлерімен кездесу кеші өткізілді. Мерекелік кездесуде ұзақ жылдар бойы кітапханада қызмет еткен қазыналы қарттарға құрмет көрсетілді. Ізгілікті іс-шараға аудандық ардагерлер кеңесінің төрағасы Мұса Келдібаев, халықаралық «Қазақ тілі қоғамының» ҚБ Сырдария аудандық филиалының төрағасы Шаһарбек Нұрсейітов, аудандық ішкі саясат бөлімінің мамандары Ажар Оразымбетова, Айгүл Ахметова және еңбек ардагерлері қатысты.

Екі бөлімнен тұратын кездесу кешін­де кітапханашы Ләззат Серікбаева көп­шілікке тағылымы мол кітаптарды та­ныстырып, айтулы мерекенің мән-мағынасын аша түсті. Өз кезегінде №210 О.Әбілпаттаев атындағы орта мектеп оқушылары ақындардың қарт­тар жайында жазылған өлеңдерін жатқа оқыды. Ойы жүйрік оқушылардың ұс­тазы Жұлдыз Бедебекова ардагерлерге ақжарма тілегін жеткізді.

Сонымен бірге аудандық мәдениет үйінің әншілері Нағима Бекшаева мен Динара Жәкешова жиналған қауымға арнап әуезді ән шырқады. Кітапхана ардагерлері Күлтай Асанова, Гүлстан Нұржакиева, Әсем Қосымова, Гүлзабира Оразбекова, Алтын Ізтілеуова мерекемен құттықтап, кітапхана саласында атқарған қызметтері жайында айтып берді. Жас ұрпақ тәрбиесінде кітаптың алатын орны ерекше екенін атап өтті.

– Қазіргі уақытта елімізде қарттарға үлкен мән беріп, айрықша көңіл бөлі­ніп, жан-жақты қамқорлық жасалуда. Әрине, «Қарт жүрген жер – береке» деген тәмсіл бар. Кітапхана қыз­метінде бірнеше жыл еңбек еткен ардагерлеріміз жастарға үлгі-өнегесін көрсете білді. Қырық мыңға жуық ха­лыққа сан түрлі кітапты үлестіріп, рухани дамуына өзіндік үлес қосты. Отбасында аяулы ана, қызметте білікті маман бола білген әрбір ардагерге ерекше қолдау көрсетуіміз керек. Қай кезде де, қарттық жасқа келген адам айналасына ақылын айтып, көрегенділік танытады. Бұл ретте, бар­ша ардагерлерді мерекемен шын жүректен құттықтаймын, – дейді сала ар­дагері Гүлстан Нұржакиева.

Танымдық іс-шараның екінші бөлі­мі «Тосын сый» деп аталды. Бұл бө­лімде құрмет төрінен көрінген арда­гер­лердің немерелері «Менің асыл әжем» тақырыбында эссе жазып, жи­нал­­ғандарға оқып берді. Сондай-ақ ар­дақты әжелеріне гүл шоғын ұсынды. Осындай мерекелік көңіл-күй сыйлаған кітапханашы Л.Серікбаеваға қа­зы­налы қариялар өз алғысын жет­кізді.

Өз кезегінде аудандық ардагерлер ке­ңесінің төрағасы Мұса Келдібаев сала ардагерлерін мерекемен құттықтады.

– Бірлігі бекем, ынтымағы жарасқан ауданымызда қазыналы қарттарға тұ­рақты түрде қолдау көрсетіле бермек. Бірнеше жыл қажырлы еңбек еткен ардагерлер жастарға ақылын айтып, жол нұсқауда. Биыл дәстүрлі түрде дөңгелек жасқа келген ардагерлерді марапаттаған болатынбыз. Қазірігі уа­қытта қарттарды сауықтыру, демалыс орындарына жіберу мәселесі алдыңғы орында тұруы тиіс. Бүгінгі іс-шараның мән-мағынасы терең. Адамға рухани азық сыйлайтын кітап ешқашан құн­дылығын жоғалтпайды. Сондықтан ха­лыққа елеулі қызмет жасаған сала ардагерлерін мерекемен шын жүректен құттықтаймыз, – деді аудандық ардагерлер кеңесінің төрағасы.

Балтабай ОРДАБЕКОВ