Тіршілік тынысы Сырдария аудандық қоғамдық-саяси газет
» » ЖЕТЕКШІ ПАРТИЯДАН ҮМІТКЕР ҰСЫНЫЛДЫ

ЖЕТЕКШІ ПАРТИЯДАН ҮМІТКЕР ҰСЫНЫЛДЫ

Кезектен тыс ­өте­тін президент­тік сайлауға үміт­кер ретінде «Nur Otan» партиясынан Қасым-Жомарт Тоқаев түседі. Бұл туралы жетекші пар­тияның кезек­тен тыс ХІХ съезін­де Қазақстанның Тұңғыш Президенті – Елбасы Нұрсұлтан ӘБІШҰЛЫ Назарбаев мәлімдеді.
Съезде Елбасы алдымен, партияның бүгінгі жеткен жетістіктерін саралады. Партияластарының алдында сөйлеген сөзінде Тұңғыш Президент ауыр дағдарыс жағдайында басталған тәуелсіз Қазақ­станды қалыптастыру жолы оңай болмағанын еске салды.
– Экономиканың жаппай күйреуі халықтың басым көпшілігін күйзеліске ұшыратты. Көптеген сарапшылар этносаралық шиеленістер мен қақ­тығыстар болады деп болжам жасады. Бірақ біз өзіміздің егемен елімізде бейбітшілік пен келісім жағдайында өмір сүруге лайықты екенімізді бүкіл әлемге дәлелдедік. Менің «алдымен экономика, сосын саясат» деген негізгі қағидатым дұрыстығын дәлелдеді, – деді Н.Назарбаев.
Мұнан соң Қазақстанның Тұңғыш Президенті әр саладағы толайым табыстарды атап өтті. Мәсе­лен, дұрыс жүргізілген саясаттың арқасында қазақ­стан­дықтардың әлеуеті артты, табысы молайды. Білім, денсаулық, мәдениет, жол құрылысы, тұрғын үй мәселесінде айтарлықтай жетістікке жетіп, мемлекет аз уақыт ішінде қарқынды дамып келе жатқан елге айналды. Барлық тірліктер қиын-қыстау ке­зеңдерде жүзеге асты.
Елбасының сарабдал саясатының нәтижесінде цифрлы қоғамға жетіп, дамудың жаңа деңгейі қалыптасты. Өз сөзінде «Nur Otan» партиясының Төрағасы Қазақстанның одан әрі табысты дамуын байыпты бағдарымыздың сабақтастығы ғана қамтамасыз ететінін айтты.
– Төртінші өнеркәсіптік революция талаптары­на сәйкес елімізді технологиялық және инфра­құрылымдық тұрғыдан дамытудың жаңа кезеңіне қадам бастық. Цифрландыру және инновацияны енгізу есебінен еңбек өнімділігі мен экономиканың бәсекеге қабілеттілігі артты. Осы ауқымды жұмыс­тардың бәрі бүкіл қазақстандықтардың әл-ауқатын арттыруға бағытталған, – деді Елбасы.
Осы тұста Тұңғыш Президент таңдап алған сая­си және экономикалық бағдар сабақтастығының сақталуына партия кепіл болуға және белгіленген міндеттердің бәрін жүзеге асыруға тиіс екенін атады.
Мұнан соң Елбасы Н.Назарбаев қазақстандық­тардан өз атына көптеген хат келіп жатқанын айтып, ризашылығын жеткізді және еліміздегі жоғары лауазымға лайықты үміткер ретінде Қасым-Жомарт Тоқаевты атады.
– Қасым-Жомарт Тоқаев менімен бірге тәуел­сіздіктің алғашқы жылдарынан бастап қызмет­тің түрлі саласында жұмыс істеді. Ол­ ұзақ жылдар Сыртқы істер министрлігіне жетек­шілік етіп, Қазақстанның сыртқы саясатын бірге қа­лып­тастыруға атсалысқандардың бірі. Оның дип­ло­матиялық дәрежесі шетелде жоғары бағаланады. Қасым-Жомарт Тоқаевтың БҰҰ Бас хатшысының орынбасары болғанын және тәжірибелі мемлекет саясаткері екенін жақсы білесіздер, – деді партия Төрағасы.
Өз кезегінде мұндай құрмет көрсетіп, сенім артқанына Қазақстан Президенті Қасым-Жомарт Тоқаев ризашылығын жеткізді. Сондай-ақ дәстүр сабақтастығын сақтай отырып, игілік және әді­лет жолын ту етіп, еліміздің қарқынды дамуын жал­ғас­тыруға бар күшін салатынын айтты.
Кезектен тыс съезд қорытындысында Елбасы қазіргі жағдайда тұрақты дамып, өсіп-өркендеу үшін халықтың бірлігі бекем болуы және барша қазақстандықтардың бірлесе күш-жұмылдыруы қа­жет екенін атап өтті.

Ердос СӘРСЕНБЕКҰЛЫ
27 сәуір 2019 ж. 495 0
  • Акимата Кызылординской области
  • Сайт президента
  • Нұрлы жол
  • Рухани Жаңғыру
  • Жаңғыру 30
  • Egov
  • Digital Kazakhstan
  • Нақты қадам