Жол қателікті кешірмейді

Осы орайда аудан көлемінде «Қауіпсіз жол» жедел-профи­лак­тика­­лық іс-шарасы өткізілді. Іс-шара бары­сында қала көлемінде қоғамдық тәртіпті сақтау мен жол қозғалысы қауіп­сіздігін қамтамасыз ету, жол көлік оқиғаларының алдын алу, жол қозғалысы ережелерін өрескел бұзушылықтың, әсіресе заңсыз жолаушы тасымалымен айналысатын авто­бус және такси көлік құралдары анықталды.

Темірден келер қауіп көп. Маман­дардың айтуынша, көлікті басқару барысында бір сәт ұялы телефонға назар салу көптеген қауіпті оқиғаның негізгі себебі болады. Жылдан жылға техниканың сан түрі пайда болуда. Бұл орайда қоғам мен адам өміріне төнген қауіптің басым көпшілігі де осы темірден болып отыр. Заман қажет­тілігімен қатар қатер де көбейіп тұр. Сон­дықтан аталған мәселе күн тәр­тібінен түскен емес.

– Үш күнде 64 құқық бұзушылық анықталып, 12 автокөлік айып алаңына жеткізілді, 11 мемлекеттік белгі тәр­кіленді. Бір жүргізуші көлік құралын басқару құқығынан айырылған күйде көлік жүргізгені анықталып, ҚР ӘҚБтК-нің 612-бабының 3-бөлігіне сәйкес әкімшілік құқық бұзушылық хаттамасы рәсімделіп, соттың қарауына жолданды. Бұндай тексеру жұмыстары біреуге кедергі келтіруге яки қорқытуға бағыт­талмаған. Әрбір көлік жүргізушісі сол сәтте өзімен бірге қаншама адам­ның тағдырына жауапты екенін ес­тен шығармауы керек. Жол-көлік оқи­ғаларының алдын алудың ең тиімді жолы – жүргізушілердің жол қоз­ғалысы ережелерін қатаң сақтап, көлік басқару кезінде барынша мұқият болуы. Жолдағы қауіпсіздік тек полиция қызметкерлерінің немесе жол қыз­­метінің міндеті емес, бұл – әрбір жол қозғалысына қатысушының ортақ жауап­­кершілігі. Жылдамдықты шамадан тыс арттыру, көлік жүргізу кезінде телефонға алаңдау, шаршаған күйде рөлге отыру секілді қарапайым қателік­тердің өзі ауыр зардапқа әкелуі мүмкін. Сондықтан жолға шыққан әр адам «бір сәттік асығыстық өмір бойғы өкінішке айналмасын» деген қағиданы ұстануы керек, – дейді аудандық полиция бөлі­мінің подполковнигі Сейілхан Кеукенов.