Педагогтер біліктілік тестін тапсырмайды
Өткен аптаның соңында көпшілік арасында қызу талқыға түскен жаңалықтың бірі педагогтердің пәндік біліктілігіне арналған тестке қатысты өзгеріс болды.Оқу-ағарту министрі Жұлдыз Сүлейменова арнайы мәлімдеме жасап, педагогтердің біліктілік тестін тапсыруы уақытша емес, толықтай тоқтатылғанын жеткізді. Тәжірибелі ұстаздар қауымы аталған тестті тапсыруға міндетті саналмайды.Расында, еліміздегі мектептерде біліктілік тестінен өту барысында үлкен дүрбелең болатын. Оқушыларға білім беретін ұстаздардың біліктілік деңгейін анықтау мақсатында олар портфолио дайындап қана қоймай, тест те тапсыратын. Модератор, сарапшы, зерттеуші секілді біліктілік деңгейін анықтау тестінен өте алмай, бірнеше мәрте тапсырған жандарды естіп те, көріп те жүрміз. Жаңа министрдің айтуынша, белгілі бір уақыт аралығында 51 мың педагог шекті балл жинап, портфолиосын толықтырып, аттестацияның барлық кезеңінен сүрінбей өткен. Оларға алдағы қыркүйек айынан бастап арнайы үстемақы төленетін болады.
Әрине, бұл жаңалық ауданның 17 білім ошағындағы мұғалімдерді қуантқаны жасырын емес. Тест тапсыру тек мектепке жаңадан жұмысқа қабылданатын және еңбек өтілі екі жыл болған жас ұстаздар үшін сақталады. Жоғары оқу орнын тәмамдап, маман атанған жас ұстаздардың білім деңгейін саралау орынды. Бір жағынан, шәкірт алдына шығып, ұстаздық қызметке қадам басқан жастар үшін бұл жауапкершілікті айқын сезіндіреді.
Бүгінде қағазбастылық мәселесін білім ұяларында жою бағытында бірқатар жоба министрлік тарапынан қолға алынуда. Айта кетерлігі, алдағы уақытта педагогтердің портфолиосы электронды форматта жүргізіледі. Енді мұғалімдер қағаз түрінде құжат дайындап, сан түрлі қол жинап, әуре-сарсаңға түспейді. Барлық құжат пен материал электронды платформада сақталады. Аталған мәселе бойынша нақты ақпаратты министрлік жақын күндері ұсынатын болады. Авторлық бағдарламаларға да өзгерістер енгізілуде. Яғни авторлық бағдарламаны жазу және ұсыну талабы да алынып тасталған.
– Білім ошағын басқару ісінде оқушының білімі мен тәрбиесіне қоса, мұғалімдердің біліктілігіне аса көңіл бөлеміз. Қашанда білімі терең, тәжірибесі толысқан ұстаздар қауымы өзінің біліктілігін дәлелдеп келеді. Өз басым жақында Асқар Тоқмағанбетов ауылындағы орта мектепке басшылық қызметке келдім. Педагогикалық құраммен алғаш танысқан сәттен-ақ халық баласына білім беретін әріптестерімнің кәсіби біліктілігіне аса мән бердім. Заман ағымы бір орнында тұрмайды. Білім саласына енгізілген жаңалық көп. Біз бір толқында болып, заман көшіне ілесе білуіміз керек, – деді Зәуре Білісбаева.
Балтабай ОРДАБЕКОВ
