Кітап оқу – жаңа тренд: тынысы кең кітапхана – танымы биік ұлт

«Қазіргі кезде кітап оқу азайды» деген қасаң пікірді жоққа шығаруға болады. Себебі биыл ел кітапханаларына бас сұққандар саны 37 миллионды құрайды. Бұл халықтың кітап оқуға деген құштарлығының артып келе жатқанын көрсетеді. Атап айтқанда, жыл басынан бері кітап оқуға ынтасы артқан қырық миллионға жуық оқырман жылдағы көрсеткіштен әлдеқайда жоғары.

Мемлекет басшысы Қасым-Жомарт Тоқаев Ұлттық құрылтайдың үшінші отырысында сөйлеген сөзінде «Кітапхана – мемлекеттің, ұлттық негізгі жады. Еліміз үшін құнды тарихи деректер мен материалдардың дені кітапханада сақталады. Сондықтан кітапхана ісін дамытуға бейжай қарауға болмайды. Кітап оқырманға қолжетімді болу керек. Шын мәнінде, озық ойлы ұлт болудың ең төте жолы – кітап оқу. Сондықтан кітап оқу мәдениетін қоғамда барынша орнықтыруымыз керек» деген болатын.

Жалпы ел бойынша 3 883 қоғамдық кітапхана жұмыс істейді екен. Ал биылғы жаңа оқырманның үлесі 5,3 миллионнан асады. Мәдениет және ақпарат министрлігінің мәліметінше, ең белсенді оқырмандар – 17 мен 25 жас аралығындағы жастар. Ал 45 жастан асқан келушілер саны жастарға қарағанда едәуір төмен. Бұл ретте «Жастар кітап оқымайды» деген ойдың негізсіз екеніне көз жеткізуге болады.

Осы орайда аудандық кітап­хана жыл басынан бері «Руханият ор­та­лығына» қоныс ау­дарғаны белгілі. Самала­дай жап-жарық, әсем ғимараттағы кітап­­­ханаға бас сұғып, рақаттана та­рих парақ­тарын ақтару ерекше сезім сыйлары анық. Кітап­хана­­шылардың айтуын­ша, жаңа ғи­ма­ратпен кітап­­­хананың жаңа демі ашылғандай. Бүгінде аталған ғимаратта аудандық орталық кітапхана мен балалар кітапханасы орналасса, одан бөлек ауылдық округтерде орналасқан 15 кітапхана ел игілігі үшін жұмысын жүргізіп отыр.

Жыл басынан бері аудандық кітапханаға екі жүз мыңға жуық қонақ келген. Нақтырақ айтсақ, 185 821 келуші. Ал ауылдық жерлерде бұл көрсеткіш 119939-ды құрайды. Он айдың қорытындысы бойынша ауданда 16 433 оқырман тіркеліп, оларға 297 772 рет кітап берілген, ауылдық кітапханаларда он мың­нан астам оқырман тіркеліпті. Жүйе бойын­ша кітап қоры – 438 867 дана, оның басым көпшілігі қазақ тіліндегі кі­таптар. Биылға кі­тап қоры 1225 дана­ға артып отыр.

Кітап – адамның айнымас серігі. Ешкім тартып ала алмайтын байлық – білім. Ал білімді құнды кітаптан аларымыз анық. Кітап оқыған адамның ой-өрісі, сөйлеу мәнері өзгешеленіп тұратыны анық. Бұл ретте, бүгінгі оқырман көбіне роман, повесть, поэ­зия жанрындағы туындылармен бірге, фило­софия, психология бағытындағы кітаптарды жиі таңдайды.

А.МҰХАНБЕТҚАЛИ

Фото: Ашық дереккөзден