Табиғатпен үндес өмірдің кілті

Гүл – тек әсемдік символы ғана емес, адамның ішкі жан дүниесін тыныштандырып, үйге жылулық сыйлайтын тіршілік иесі. Қазіргі таңда гүл өсіру – көптеген адамдар үшін хобби ғана емес, өмір салтына айналған. Алайда гүлдің әр түрін баптаудың өз ерекшелігі бар. Бұл мақалада үй жағдайында гүл өсірудің негізгі қыр-сырына тоқталамыз.

Көптеген гүлдер жарықты жақсы көреді. Мысалы, фикус, кактус, орхидея сынды өсімдіктер терезе жақтауы сияқты жарық мол түсетін жерлерді қажет етеді. Дегенмен, тікелей күн сәулесі кейбір гүлдердің жапырағын күйдіріп жіберуі мүмкін. Сондықтан әр гүлдің жарыққа деген сұранысын алдын ала зерттеп алған жөн. Гүлді артық немесе кем суару оның өсуіне кері әсер етеді. Мәселен, суккуленттерге сирек суару қажет болса, ылғалды жақсы көретін бегония сияқты гүлдер жиі суаруды талап етеді. Су бөлме температурасында тұруы керек, ал суды таңертең немесе кешкілік уақыттарда құю тиімдірек.

Гүлдің тамыры жақсы жетілу үшін топырағы нәрлі әрі ауа өткізгіш болуы тиіс. Арнайы гүлдерге арналған топырақ қоспаларын дүкеннен алуға болады. Сондай-ақ айына бір рет органикалық немесе минералды тыңайтқыштармен қоректендіру де маңызды.Кейбір гүлдерге уақытылы кесу қажет. Бұл гүлдің жаңа бүршік жаруына, сабағының мықты болуына сеп болады. Сонымен қатар солған гүлдерді, құрғақ жапырақтарды алып тастап отыру да жалпы көркемдік пен денсаулыққа пайдалы.

Жаңа гүл сатып алған кезде оны бірден басқа гүлдердің жанына қоюға болмайды. Алдымен оны бірнеше күн оңаша ұстау, бейімделуіне уақыт беру керек. Бұл тәсіл аурудың таралуынан сақтайды.

Гүл баптау – шыдамдылық пен сүйіспеншілікті талап ететін іс. Әр гүлдің өз мінезі бар. Оларды жақсы түсіне білген жан үйін ғана емес, көңіл-күйін де жайқалта алады. Табиғатпен үйлесімді өмір сүру – адамның рухани байлығын арттырады. Ендеше, үйіңізге бір шоқ гүл егіп, тіршіліктің тынысын сезініп көріңіз.

МҰРАТ Алтынай

Қорқыт ата атындағы Қызылорда университетінің 4 курс студенті

Фото:Ашық дереккөзден