Есеп беру жиыны: Сала мамандарына қолдау жалғасады

Бүгінде облыс көлемінде «SENIM» денсаулық сақтау жүйесі жұмыскерлерінің салалық кәсіптік одағы филиалы тұрақты жұмыс жасап келеді. Шын мәнінде, аталған филиал тарапынан медицина қызметкерлерінің құқықтары қорғалып, қолдау іс-шарасы жүзеге асуда. Осы аптаның жұмасында филиал төрағасы Сәулебек Ысқақов Сырдария аудандық ауруханасының ұжымымен кездесу өткізіп, жыл бойы атқарылған жұмыстар жөнінде есеп берді. Кездесуге «SENIM» денсаулық сақтау жүйесі жұмыскерлерінің салалық кәсіптік одағы филиалы заңгері Мұрат Абдрасулов, бас дәрігердің салалық орынбасарлары, бөлім басшылары, сала мамандары қатысты.

Кездесу барысында филиал төрағасы Сәулебек Ысқақов бір жыл көлемінде жасалған ауқымды жұмыстардың бірқатар маңыздысына тоқталды.

– Құрметті әріптестер бүгін сіздермен жыл сайын өткізілетін дәстүрлі жиында жолығып отырмыз. SENIM» денсаулық сақтау жүйесі жұмыскерлерінің салалық кәсіптік одағы филиалында 50-ден аса емдеу мекемесінен, 19 мыңнан аса сала маманы бар. Ауданда білікті маман Серік Маханбетов медицина мамандары кәсіподақ ұйымына басшылық етеді. Әрбір мерекеде, атаулы күнде сіздерге қолдау көрсетуге дайынмыз. Алдағы уақытта ауқымды жобаларды қолға алып, ұжымның игілігі үшін тынымсыз еңбек ете береміз, – деді Сәулебек Есқожаұлы.

Келелі кездесуде сала мамандары филиал төрағасы мен заңгеріне көкейдегі сауалдарын жолдап, тұщымды жауап алды. Өз кезегінде Сәулебек Есқожаұлы кіші буын қызметкері Айгүл Басқараева мен медбике Жанар Құрақбаеваға өз атынан арнайы марапат ұсынды.