Айта кетейік, көлік иесіне электронды ақпарат­тандыру жұмысы 12 наурызда басталған болатын. Міне, сол уақыттан бастап ел тұрғындары көлік салығын төлеп, былтырғы берешекті өтегені абзал. Қазіргі уақытта салықтан жалтарған жандар жауапкершілік жүгін сезінбеуде. Жалпы республика бойынша борышкерлер қарызының жалпы көлемі 3 миллиард теңгеге жуықтайды.

Аудандық мемлекеттік кірістер басқармасының салықтық әкімшілендіру және өндіріп алу бөлімінің бас маманы Ұлан Болат аталған мәселеге байланыс­ты түсіндірме берді.

– ҚР «Салық және бюджетке төленетін басқа да міндетті төлемдер туралы» Кодексінің 494-бабына сәйкес жеке тұлғалардың көлік құралдары салығы бойынша салық төлеу мерзімі 1 сәуіріне дейін екендігін ескерте кетейік. Көлік салығын төлеу мерзімінен асып кеткен жағдайда төлеу мерзімінен кейінгі әр күнге ҚР Ұлттық банк бекіткен қайта қаржыландырудың ресми бағамының 1,25 пайыз мөлшерінде өсімақы есептеледі. Салықтан жалтарған жандарға Салық кодексінің 128-бабына сәйкес заң жүзінде шара қолданылады. Салық төлеушіден салық берешегін мәжбүрлеп өндіру үшін жеке сот орындаушыларға жолданады. Сот орындаушылардың өндірісіне алынған салық бұйрықтары арқылы салықтан берешегі бар азаматтардың ҚР аумағынан сыртқа шығуға тиым салынып, сонымен қатар жеке мүлкіне ауыртпалық қойылады. Азаматардың банк счеттарына да шектеу қойылатындығын, ай сайын алатын зейнетақысынан, жалақысынан өндірілетіндігін ескертеміз. Салық төлеу әрбір ел азаматының міндеті екенін ескерте отырып, барлық аудан тұрғындарын белсенді түрде 2024 жылғы төленетін көлік салығы бойынша есеп айырысуға шақырамыз. Айта кетейік, «Kaspi.kz », «Halyk Bank», «E-Salyq Azamat» мобильді қосымшасы және «kgd gov» сайты арқылы немесе салық органдарының мамандарына жолығып көпшілік көлік салығын төлей ала алады, – деді сала маманы.

Бұл ретте, осы жылдың 2 сәуірінен салық мамандары аудан тұрғындары арасында берешегі бар азаматтармен жұмысты күшейтетін болады.