Медицина саласының мамандары бірнеше білім ошағы мен емханада жергілікті халықпен кездесу өткізуде. Бұдан бөлек, дәрігер-нарколог Салтанат Досжанова жергілікті тұрғындарға жан-жақты профилактикалық тексеру жүргізуде.

Аудандық ауруханада жыл көлемінде ҚР-ның нашақорлыққа және есірткі бизнесіне қарсы күрестің 2023-2025 жылдарға арналған кешенді жоспары аясында жүйелі жұмыс жасалып келеді. Бүгінде медицина саласының мамандарының нұсқауымен 19 наркобекет құрылған. Оның ішінде, 17 білім ошағы, Сырдария аграрлы-техникалық колледжі мен аудандық емхана бар. «Есірткісіз аймақ» жобасы шеңберінде 884 оқушыға ата-анасының келі­сі­мімен тест ті­­лім­ше жаса­лып, бар­­лығы теріс нәтиже көрсеткен. Осы күні наша­қорлықпен 44 науқас «Д» есепте тұрады.

– Есірткіге тәуелді болған әрбір адамды қалыпты өмірге қосуға барымызды саламыз. Кешенді ем-шара жүргізіп, науқастың оңалып кетуіне көңіл бөлеміз. Әлеуметтік жағдайына мән береміз. Жас­тар денсаулығы орталығының маман­дарымен бірлесіп, барлық білім ошағында, емханада семинар-тренинг, акция, жедел-профилактикалық іс-шара ұйым­дастырамыз. Әріптесім, фельд­шер Қалдыбек Жұмабеков осы бағыт бойынша тынымсыз еңбек етуде. Сырдария ауданының прокуратурасы қолға алған айлық акцияда медицина қызметкерлері бел­сенділік танытуда. Акцияны қолдау мақсатында сала мамандары флеш-моб билеген болатын, – дейді дәрі­гер-нарколог Салтанат Досжанова.

Сала маманының айтуынша, есірткі қолданатын жандардың әлеуметтік сипаты өзгерген. Әлеуметтік жағдайы орташа және жақсы қамтамасыз етілген отбасының балалары нашақорлықтың құрбаны атануда. Өлім-жітім факторын көбейтетін нашақорлықпен күресте заңның тегеуріні едәуір байқалады. Айлық акцияның маңыздылығын арттыру мақсатында Сырдария аудандық ауруханасының ұжымы тарапынан жергілікті халыққа түсіндірме жұмысы тоқтаусыз жүргізілетін болады.