«Көгілдір отын» – көптен күткен игілік
Аудан әкімі Берік Әбдіғаппарұлы елді мекендерді газдандыру маңызды екенін және тұрғындар асыға күтіп отырғанын атап, халықтың игілігі үшін құрылыс жұмыстарының сапалы жүргізілуіне әркез басымдық беріп келеді. Аудан орталығына жақын орналасқан С.Сейфуллин елді мекенін газдандыруға өткен жылдың аяғында облыстық бюджеттен 20 млн теңге бөлініп, жұмысы бастау алған болатын. Биыл облыстық және республикалық бюджеттен тиісті қаржы қаралып, газ құбырын тарту жұмысы қарқынды жүргізілуде. Қарқынды жұмыстың нәтижесінде газдандыру жұмысы да аяқталуға жақын. Жақын күндері ауыл тұрғындары «көгілдір отынның» игілігін көрмек. Осы орайда аудандық мәслихаттың депутаты, «AMANAT» партиясы депутаттық фракциясының мүшесі Марат Бакуовтың қатысуымен С.Сейфуллин ауылын газдандыру жобасына партиялық бақылау жүргізілді.Партиялық бақылауға ауыл әкімдігінің маманы М.Салқадинов, мердігер мекеме өкілі қатысты. Партиялық бақылау барысында аудандық мәслихаттың депутаты, «AMANAT» партиясы депутаттық фракциясының мүшесі Марат Бакуов газдандыру жобасының сапалы әрі уақытылы аяқталуы өте маңызды екенін айтып, бұл Жол картасының да жоспарында тұрғанын жеткізді.
– Табиғи газдың игілігін халық, оның ішінде ауыл тұрғындары көруі керек. Бұл бағытта партия халыққа берген уәделерін кезең-кезеңімен орындауда. Партиялық бақылауда С.Сейфуллин ауылын газдандыру жобасымен таныстық. Алдағы уақытта ауыл халқы газ игілігін көретін болады. Басқа да нысандар бойынша партиялық бақылау жүргізіледі, – деді аудандық мәслихат депутаты.
Газдандыру – жалпы ел үшін стратегиялық маңызды жоба. Ел тұрғындарын газбен қамтамасыз ету – Мемлекет басшысы Қасым-Жомарт Тоқаев ұдайы назар аударып отырған басым бағыттың бірі. Ауданда газдандыру қарқыны жылдан-жылға артып келеді. Бүгінде Сырдария ауданын табиғи газбен қамтамасыз ету деңгейі 35 пайызды құрап отыр. Халықтың тұрмысын жақсарту мен елді мекендерді дамытуға бағытталған ауқымды жобалар алдағы уақытта да өз жалғасын таппақ.
Алтынай ҚАЙРАТҚЫЗЫ
