Ең алдымен көпшілік күткен ма­ңызды құжатта Мемлекет бас­шысының салық саясатын тұрақ­тандыру мәселесіне арнайы тоқ­талып, елдегі қаржы-кредит мә­се­­лесін басым бағыт ретінде талдады. Алдағы уақытта банк туралы заң қабылдап, осыдан 30 жыл бұрын қабылданған заңды өзгертуге уақыт­тың келгенін айтты. Қасым-Жомарт Тоқаев Қазақстан халқына Жолдауы барысында экономиканы қар­қынды дамыту үшін тек мемлекет қар­жысына сүйену жеткіліксіз деді. Президент атап өткендей, жеке инвестициялар тарту арқылы елімізде іскерлік белсенділіктің артуына қо­лай­лы жағдай жасаған жөн. Ол үшін, ең алдымен, салық саясаты тұрақты болу­ға тиіс. Сонда бизнес те сапа­лы дамуға ынталы болады және жауап­кершілікпен жұмыс істейді.

Мемлекет басшысы жаңа са­лық кодексі қазіргі жүйені қайта жаң­ғыртуға арналғанын айта кетті. Бұл құжат салықтық әкімшілендіру ісінің салық төлеушілерге деген сенімге негізделген мүлде жаңа жүйесін қалыптастыруға тиіс. Ел Президенті тұтынушыларға арналған қызметтер мен сауда-саттықтың мүмкіндіктері толық пайдаланылса, экономиканы дамыту, салық түсімдерін арттыру және халықты жұмыспен қамту шаралары тезірек нәтиже беретінін тілге тиек етті.

– Президент атап өткендей са­лықтық әкімшілендіру ісін жаппай цифрландыру керек. Бұл өз кезегінде сыбайлас жемқорлыққа қатысты сын-қатерлерді барынша азайтуға, салық саласындағы үдерістердің ашық болуын қамтамасыз етеді. Сондықтан Жолдауда тапсырылғандай салық саласын тезірек электронды форматқа көшіруді қолдаймын. Сондай-ақ са­лық мөлшерлемесін де қайта қарау, тағы басқа көптеген мәселелер келер жылы қабылданатын жаңа Салық ко­дексінде көрініс табады деген сенімдеміз.

Биылғы жылы Жолдау шын мә­нінде Жаңа Қазақстанның айшықты бағ­дарын айқындап берді. Жаңа бас­тамалардың мәселен, Ұлттық қорға қатысты мәселелер, оның рөліне жеке тоқталуы елдегі қаржы саясатын тиімді пайдалану қажеттігін қамтамасыз етеді. Мәселен Президент «Мемлекет қаржысының тұ­рақтылығын қамтамасыз етудің бір­ден бір жолы – көрпеге қарай көсілу. Сондықтан бюджет қаражатын стра­тегиялық маңызы жоқ, аса шұғыл емес шаруаларға оңды-солды шашуды доғару керек», деп бюджет қаражатын оңды-солды шашпай, тиім­ді компенсациялық тәсілдер ойлас­тыруы қажет екенін атап өтті, – дейді облыстық мәслихат депутаты Жұмабек Ембергенов өз пікірінде.

Мемлекет басшысы Ұлттық қордың рөліне жеке тоқталып, қордың қара­жатын мемлекет мүддесі үшін, еліміз­дің стратегиялық мақсаттарын жүзеге асыру үшін пайдалану қажет екенін тілге тиек етті.

«Енді Ұлттық қордың рөліне жеке тоқ­талайын. Қордың қаражатын, ең алдымен, мемлекет мүддесі үшін, яғни еліміздің стратегиялық мақсаттарын жүзеге асыру үшін пайдалану қажет. Ұлттық қор шетелдік қаржы институттарына қызмет етпеуі керек. Ұлттық қор – ұзақ мерзімге арналған макроэкономикалық тұрақтылықты қам­тамасыз ететін аса маңызды құрал. Сондықтан оны тиімді басқару қажет», деді Президент.

Мемлекет басшысының айтуынша кәсіптік білім беру саласына реформа жасау – айрықша өзекті мәселе. Бұл – экономиканың өсімін қамтамасыз ету және инвестициялық тартымдылығын арттыру үшін аса қажет қадам.

– Ел Президенті Қасым-Жомарт Кемелұлы Тоқаевтың Жолдауында келер жылды Жұмысшы мамандықтары жылы деп жариялауы біз секілді қара жұмыста ысылған, өмірі мен қыз­меті ауыл шаруашылығын да­мытуға арнаған азаматтарға серпін берді. Әрине елдің дамуы оның экономикасына байланыс­ты. Ал сол экономиканы алға сүйрейтін – қарапайым жұмыс­шы­ның адал еңбегі. Алдағы жылы жұмысшы мамандықтарын дәріп­теу арқылы қоғамда еңбекқор және нағыз маман болу идеясы насихатталатын болады. Ауылға шын мәнінде мық­ты инженер, агроном, техника тілін мықты меңгерген маман қажет. Соң­ғы технологиямен жабдықталған ауыл шаруашылығын дамыту білімді де, білікті маманның қолында. Сон­дық­тан жас мамандарды ауылға тарту арқылы жұмысшы мамандарды дәріп­тейтін боламыз. Біздің елде қай уақыт­та да адал, табанды еңбек еткен адам табысқа жетеді. Бұл бұлжымас қағи­да. Сондықтан қарапайым жұмыс­­­­шы қашанда құрметті болуы тиіс. Мемлекет басшысы: «Адал азамат – Адал еңбек – Адал табыс» қағидатына толық сай келеді. «Бір сөзбен айтқанда, біздің қоғамда еңбек­­­қорлық, кәсібилік сияқты қасиет­тер өте жоғары бағалануға тиіс. Өз кәсі­бін жетік меңгерген мамандар ұлт сапа­сын арттырады. Сондықтан біз еңбек адамының мәртебесін көтеріп жатыр­мыз. Бұл бағыттағы жұмыс тоқ­­тамайды, жалғаса береді», деп, мерей-мәртебемізді асырды, – дейді облыс­тық мәслихат депутаты Қайрат Нұрсейітов.

Иә, әлемде қанша мамандық болса оның арасында жаман жұмыс жоқ. Яғни кез келген еңбек – қадірлі. Ең бастысы, әркім жауапкершілікті терең сезініп, өз міндетін сапалы атқаруға тиіс. Сонда ғана еліміз дамудың сара жолына түседі.

Халқымызда айтылатын «Жұ­мыс­тың көзін тапқан байлықтың өзін табады» деген сөз – кәсібіне адал әрі жауапкершілікпен қараған адам қашанда лайықты бағасын алады деген мағынаны береді. Осыған дейін мұғалімдерге, дәрігерлерге және мәдениет қайраткерлеріне берілген атақтың аясы кеңейетіні, жұмысшы мамандық иесіне де құрмет көрсетіліп, жоғарғы наградаға ұсынылатыны өте құптарлық жағдай.

Мемлекет басшысы Жолдауда мұқтаж адамдарды қолдау, елімізде өтіп жатқан «Таза Қазақстан» жобасы, медицина саласындағы олқылықтар, аудан әкімдерін сайлау, мұғалімдердің мәртебесін көтеру, тағы да басқа көптеген мәселелер төңірегінде ұтымды ой айтты.

Ел Президентінің биылғы Жолдауы әрбір қазақстандыққа үлкен жауапкершілік жүктейді. Себебі Президент атап өткендей, елімізде ауқымды реформалар кезең-кезеңімен жүзеге асырылып жатыр. Ал реформалардың дұрыс іске асуы – әлеуметтік-экономикалық тұрғыдан терең өзгерістерге әкеледі.

Мемлекеттің алдындағы негізгі мақсат – әділетті қоғам құру және соның арқасында дамудың сара жолына түскен озық ел болу. Сондықтан осы бағыттағы маңызды реформалар жалғасып, жүйелі жұмыс тоқтамайтын болады. Ел Президенті көшедегі, қоғамдық орындардағы қылмыс пен заңсыздық тыйылып келетінін айтты. Дегенмен, арқаны кеңге салуға болмайтынын тілге тиек етті.

«Тағы бір мәселе – азаматтардың қауіпсіздігі. Жеке адамнан бастап тұтас қоғамның қауіпсіздігін қамтамасыз ету – мемлекет үшін стратегиялық маңызы бар басымдық. Менің басты міндетімнің бірі – Қазақстанды қауіпсіз әрі жайлы елге айналдыру. Құқық қорғау органдарына және басқа да жауапты мекемелерге азаматтардың қауіпсіздігін барынша қамтамасыз ету жүктелді». Бұл – Мемлекет басшысының сөзі.

Шын мәнінде әрбір қазақстандық үшін ел тыныштығы аса қажет.