Теңдігіміздің тұғыры, елдігіміздің негізі
Конституция күні мерекесіне орай аудандық мәдениет үйінде мерекелік іс-шара өткізілді. Іс-шарада аудан әкімі Берік Сәрменбаев жиналғандарды еліміздің ең басты мерекесінің бірі – Қазақстан Республикасының Конституциясы күнімен құттықтады.– Тәуелсіздік – халқымыз үшін ең қастерлі де, қасиетті ұғым болса, Ата Заң – мемлекеттің іргетасын бекітумен қатар әлеуметтік-экономикалық, қоғамдық-саяси дамуының басты бағдары. Сондықтан дана халқымыз «Заң бар жерде тәртіп те, тәрбие де, тағылым да бар» деп бекер айтпаған. Мемлекет басшысы Қасым-Жомарт Кемелұлы Тоқаев «Ата Заңымыз – қастерлі Тәуелсіздігіміздің сенімді тірегі» деді. Сондықтан басты құжат ел бірлігі және адамның ары мен абыройының сақталуын негіздейді. Осы басты ұстанымдар баға жетпес байлығымыз – ішкі саяси тұрақтылықты қамтамасыз етеді. Жалпыұлттық референдум арқылы жаңартылған Конституциямыз ұлтты біріктірудің нағыз символына айналды. Сондай-ақ, негізгі заңымыз елдің саяси жүйесін демократияландыруды, заң үстемдігін қамтамасыз етуді және халықтың әл-ауқатын арттыруды көздейтін ауқымды өзгерістердің берік тұғыры саналады. 2024 жылға аудан бюджеті 11 млрд теңгеге бекітіліп, бүгінде 16 млрд теңгеден асты. Есепті кезеңде аудан экономикасына тікелей ықпал ететін өнеркәсіп өндірісі 61,8 пайызға, өңдеу өнеркәсібі 11,2 пайызға ауыл шаруашылығының жалпы өнімі 2,8 пайызға өсті. Инвестиция, тұрғын үй және құрылыс жұмыстарының көлемі де ұлғайды. Бірлігі жарасқан аудан халқының игілігі үшін жасалып жатқан әлеуметтік-экономикалық жұмыстар алдағы уақытта да жалғасын табады. Ең бастысы, осындай өміршең істердің бастауында біздің Ата Заңымыз және Заңға бағынатын, тәртіпке бас иетін халқымыз тұрғанын атап өтуіміз қажет, – деді аудан басшысы.
Мерекелік іс-шарада ауданның әлеуметтік-экономикалық, қоғамдық-саяси дамуына үлес қосып жүрген бірқатар азамат облыс, аудан әкімінің Алғыс хатымен марапатталды. Ауданның мәдениет саласының майталмандары театрландырылған қойылымды көпшілік назарына ұсынып, патриоттық әндер шырқалды.
А.ИБРАГИМҰЛЫ
