Бетперде режимі қайта енгізіле ме?

Ағымдағы жылдың 8 ақпан күні Бас мемлекеттік санитариялық дәрігер Айжан Есмағамбетова «Ауа тамшылары арқылы берілетін инфекциялық аурулардың таралуының алдын алу жөніндегі профилактикалық шараларды күшейту туралы» қаулыға қол қойған болатын. Қаулыға сәйкес еліміздің бірқатар өңірдегі денсаулық сақтау ұйымдарында 8 ақпаннан бастап маска режимі енгізілді.

Араға екі жыл салып елімізде меди­циналық бетперде тағу режимі қайта оралды. Бас санитарлық дәрігердің сөзінше бұл қаулыны қабылдаудың басты мақсаты COVID-19, қызылша және тұмау сияқты вирустық инфекциялық аурулардың таралуын шектеу және алдын алу болып табылады. Медициналық бетперде тағу режимі бойынша денсаулық сақтау ұйымдарында, медициналық мекемелерде, халық көп шоғырланатын орындар мен қоғамдық көліктерде маска тағу міндеттеледі.

«Осы қаулының іске асырылуын өзім қадағалаймын. Ол қабылданғаннан күн­нен бастап әрекет етеді» делінген бас санитар­дың қаулысында.

Мәліметтерге сүйенсек, қазіргі уақытта республикадағы барлық облыс «жасыл ай­мақ­та». Жұқпалы аурулардың асқыну жағ­дай­ы туралы фактілер тіркелмеген. Өткен жылдың желтоқсан айы мен 2024 жылдың қаңтар айын салыстырғанда елімізде корона­вирусқа байланыс­ты жағдай 2,5 есе өскен. Алдыңғы қатарда Алматы қала­сы болса, екінші орында Астана қаласы тұр. Қаңтар айында Шымкент қаласы бойын­­ша коронавирустық инфекциямен 10 адам ауырса, ақпан айының басында 12 адам тіркелген. Ал қызылша ауруымен ауырғандар саны 1,3 есеге төмендеген екен. Мамандардың кеңесі бойынша, егер адам өзін мазасыз сезінсе, үйге жедел-жәрдем шақырып, ем алып, тек денсаулығы жақсар­ған соң ғана қоғамдық орындарға шыққаны дұрыс.

Өз кезегінде «ауа арқылы берілетін инфекциялық аурулардың алдын алу» жөнінде және өңірдегі ахуал бойынша Сырдария аудандық санитариялық-эпидемио­логиялық бақылау басқармасының басшысы Самалбек Өмірбаев:

– Қазақстан Республикасы халқының арасында ауа-тамшы жолы арқылы берілетін инфекциялық аурулардың (қызылша, COVID-19 коронавирус инфекциясы, тұмау жә­не басқа да жіті респираторлық вирус­тық инфекциялар) таралуының алдын алу мақсатында Қазақстан Респуб­ликасы Бас мемлекеттік санитариялық дәрігері­нің 2024 жылғы 8 ақпандағы «Ауа-тамшы жолы арқылы берілетін инфек­циялық аурулардың таралуының алдын алу жөніндегі профилактикалық шараларды күшейту туралы» №2 Қаулысы қабыл­дан­ды. Аталған Қаулыға сәйкес Сани­тариялық-эпидемиологиялық бақы­лау коми­тетінің облыстардың, Алматы, Астана, Шымкент қалаларының денсау­лық сақтау басқармаларының, аумақтық депар­таменттеріне медициналық ұйымдар­да пер­соналдың және келушілердің меди­циналық маскаларды пайдала­нуын, анти­сеп­тиктер­дің болуын, сондай-ақ халық арасында COVID-19 коронавирус инфек­циясының, тұмаудың және ЖРВИ профилактика шаралары туралы ақпараттық-түсіндіру жұмысын жүргізу­ді қамтамасыз ету тапсырылды. Бұдан бөлек, халықтың көп жиналатын жерлерін­де (әуежайлар, теміржол вокзалдары, автовокзалдар, базарлар, сауда-ойын-сауық орталықтары, сауда үйлері, театрлар, кинотеатрлар, ХҚКО-ы, банктер және т.б.), көліктің барлық түрлерінде (қоғамдық көлік, әуе, темір жол көлігі) медициналық немесе матадан тігілген маскаларды пайдалануға ұсыным берілді. Бүгінде аймақта коронавирус індетінің эпидемиологиялық ахуалы тұрақты деп бағаналуда. Дегенмен, халық арасында ауа арқылы берілетін инфекциялық аурулардың ал­дын алу мақ­сатында Бас мемлекеттік сани­тария­лық дәрігерінің қаулысы қабыл­данды, – дейді қабылданған қаулы туралы.

Бір айта кететіні, шектеу шараларын енгізу жоспарда жоқ. Осы тұста, соңғы айда КВИ-мен сырқаттанушылықтың өсуі­нің байқалғанына байланысты, сонымен қатар ЖРВИ-мен және тұмаумен сырқат­танушылық эпидемиясы маусымының жал­ға­сып жатқанын ескере отырып, көпшілік жиналатын жерлерде, қоғамдық көлікте, меди­циналық мекемелерге барған кезде, науқаспен байланыс кезінде маска кию ұсынылады. Бас санитардың сөзінше әзір­ге аймақта эпидахуал тұрақты. Дегенмен көктем мезгілі жіті респираторлық вирустық инфекциялардың, тұмаудың бе­лең алатын кезі. «Сондықтан сақтық шара­­ла­ры қаперіңізде болған жөн» дейді маман­­дар. Өзгерістер бойынша еліміздің барлық өңірлерінде қабылданған қаулыға бай­ланыс­ты тиісті шаралар мен жұмыстар жүргі­зі­ліп, халық арасында кеңінен түсін­дірілуі тиіс.

Алтынай ҚАЙРАТҚЫЗЫ 

Фото: Ашық дереккөзден