Сұранысқа ие Сырдарияның өнімі

Жылдағы дәстүрге сай облыс орталығында ауылшаруашылығы өнімдерінің жәрмеңкесі ұйым­дастырылып, ауданымыздың диқандары да өз тауарларын қала халқына арзан әрі қолжетімді бағада ұсынды. Сұранысқа ие Сырдарияның өнімін тұтынушылардың қарасы биыл да қалың болды. Аудан еңбеккерлерін молшылық мерекесіне аудан әкімінің міндетін атқарушы Димаш Байдушев бас­тап барды.

«Алтын дән – 2023» мерекесі аясында ұйымдастырылған жәр­мең­­кеде шаруалар өз өнімдерін базар нарығынан 15-20 пайызға төмен бағада ұсынды. Ауылдардан 425 жүк көлігімен 1000 тоннадан астам өнім әкелінді.

Облыстық ауыл­шаруашылығы және жер қатынастары басқар­масының мәліметінше, бұл жолы Сыр диқандары 286 млн теңгені құрайтын 1020,6 тонна өнімді ұсынды. Саудаға 140 тоннадан астам күріш, 25 тонна ет, 30 тоннадай балық өнімдері, 200 тонна картоп, 80 тонна сәбіз, 120 тонна пияз, 90 тоннадан астам көкөніс пен жеміс-жидектер, 200 тонна бақша өнімдері, 115 тонна асқабақ, 6 тоннадай сүт өнімдері, 10 тоннаға жуық ұзақ сақталатын кон­дитер өнімдері, 140 бас тоқты, 50 тоннадан астам жем-шөп қо­йыл­ған.

Сырдария ауданының қала халқына тартуы әдеттегідей Жан­қожа батыр көшесінде ұйым­дас­тырылды. Жәрмеңкеге ауданнан 60 көлікпен 33 млн теңгенің ауыл шаруашылығы өнімдері жеткізілді. Сондай-ақ қолөнер шеберлерінің көрмесі де ұйымдастырылды. Ау­дан­ның көр­кем­өнерпаздары ән­нен шашу шашып, мерекелік кө­ңіл-күй сыйлады. Облыс әкімі Нұрлыбек Нәлібаев тұрғын­дар­мен бірге жәрмеңкені аралап, халықпен пікірлесті. Аймақ басшысы­ ауданның жәр­меңкеге тыңғы­лық­ты дай­ын­дық­пен кел­генін жоғары ба­ғалап, дала ең­бек­кер­леріне шынайы риза­­шылығын біл­дірді.

– Сырдария ауданының халқы – ұйымшыл, берекелі іске бейім. Бұл жолы да сол берекелі бірлігін көрсетіп, қала халқына ерекше тарту жасауда. Сұранысқа ие Сырдарияның өнімдерінің сапасы да жоғары екені анық. Жәр­меңкеге өз өнімдерін әк­ел­ген шаруаларға риза­шылығымды біл­­ді­ре­­мін. Об­лы­сымыздың 85 жыл­дық мерейтойы құтты болсын, – деді облыс әкімі.

Айта кетейік, ауылшар­уа­шылығы өнімдерінің жәрмеңкесі осы аптада Тереңөзек кентінде ұйым­дастырылады. Онда ауыл шар­уа­шылығы саласының үздік­тері марапаттала­тын болады.

«Тт» ақпарат