Бала қауіпсіздігі – басты назарда

Балалар қауіпсіздігі – аса маңызды мәселе. Бұл­ тақырыпқа Мемлекет бас­шысы биыл­ғы Жол­­да­уында арна­йы тоқ­­талып, мәселені ше­шу жолдарын тап­сыр­ды.

Әсіресе, жаз айларында орталық алаң мен саябақтарда серуендеп­ жүрген жасөспірімдерді жиі кезік­тіресіз. Заң жүзінде кәмелетке тол­маған балалардың түнгі уақытта бей-берекет жүріп-тұруына болмайды. Бұл – ең алдымен жеке бастың қауіпсіздігі.

Осындай мәселенің алдын алу мен жасөспірімдерге қажетті ақпараттандыру жұмыстарын жүр­гі­зу мақсатында ауданда «Заң – Бала – Қауіпсіздік» жедел профи­лактикалық іс-шарасы өтті. Қазақстан Республикасының Ішкі істер министрлігінің нұсқауына, де­парта­мент бастығының бұйрығына сәйкес жүргізілген жұмыс қыркүйек айының 12-15 күндеріне жалғас­ты. Іс-шараның негізгі мақсаты – жасөспірімдер арасында қылмыс­тың жасалуына жол бермеу және кәмелетке толмағандардың жү­ріс тұрыстарына бақылау жасау. Сондай-ақ, кәмелетке толмағандар­ға түнгі уақытта ойын-сауық орындарына бармау және алкогольдік немесе темекі бұйымдарды сатуына және қолдануына болмайтыны туралы түсіндірме жұмыстары жүргізілді. Және кәмелет жасқа толмаған балаларға белгіленген уақыттан кейін заңды өкілдерінің қарауынсыз көшеде және ойын-сауық орындарында бей-берекет жүрмеуі ескертілді. Бірнеше күнге созылған іс-шара барысында қыл­мысқа бейім, тәртібі қиын балаларды полиция органдарының есебіне алу жұмыстары да атқарылды.

Профилактикалық іс-шара барысында сала мамандары түнгі рейдтік жұмыстар жүргізді. Сон­дай-ақ аудан мектептері мен Сыр­дария аграрлы-техникалық кол­­леджіне арнайы бас сұғып, түсін­­­­дірме жұмыстарын өткізді. Жедел профилактикалық іс шара барысында аудандық білім бөлімі, жас­тар ресурстық орталығының мамандарымен бірлескен түрде Сырдария АПб мамандары түнгі рейд жұмыстарын жүргізді. Іс-шара барысында арнайы топ жастар көп шоғыр­ланатын компьютерлік клуб, дүкен, кафе, саябақтарды аралап, жасөспірімдердің заңды өкілдерінсіз жүрмеуінің алдын алды. Арна­йы мамандардан құрылған топ ата-аналар мен балаларға, кәсіп ие­леріне түсіндірме жұмыстарын жүргізіп, тиісті ақпарат берді.

– Бала қауіпсіздігі бәрінен ма­ңызды. Жасөспірім шағында бала кез келген әдетке тез икемделгіш болады. Сол кезде оларға дұрыс бағыт-бағдар беру маңызды. Бұл жерде ең алдымен үйдегі ата-анаға жүктелер жауапкершілік зор. Одан кейін тәртіп сақшыларының, білім беру ұйымдарының қатысуымен түрлі іс-шаралар өткізіледі. Арнайы жедел профилактикалық іс-шара барысында түнгі уақытта балалар мен ата-аналарға түсіндірме жұмыстары жүргізілді. Сонымен­ қатар сала мамандары аудан орталығындағы білім ордаларына арнайы барып, жоғары сынып оқушыларымен және студенттермен арнайы кездесу ұйымдастырды, – дейді Сырдария АПб-нің ЖПҚб-нің Ювеналды полиция тобының учаскелік полиция инспекторы, полиция капитаны Гүлістан Жұмабек.

Айта кетейік, жедел профилактикалық іс-шараның соңғы күнінде Сырдария аграрлы-техникалық кол­­­­леджі студенттерімен кездесу ұйым­­дастырылды. Сала мамандары білім алушы­ларға құқық бұзушылықты бол­­дыр­­мау, жол ережелерін сақтау, бопсалау, зорлық-зомбылық, әлім­жеттік пен суицидтің алдын алу және басқа мәселелер бойынша бағыт-бағдар берді.

А.МҰХАНБЕТҚАЛИ