Тағылым аларлық танымдық кеш

«Достық» үйінде аудандық орталық кітапхананың № 1 филиал кітапханашысы Ләззат Серікбаеваның ұйымдастыруымен Сұлтан Бейбарыстың 800 жылдығына арналған «Тұңғыш мәмлүк сұлтаны» тақырыбында тарихи-танымдық кеш өтті.

Танымдық кешке аудан әкімі Берік Сәрменбаев, аудандық ардагерлер ке­ңесі­нің төрағасы Мұса Келдібаев, ұс­таз­дар мен оқушылар, БАҚ өкілдері қа­тысты. Кешті жүргізген кітапханашы Л.Серікбаева алдымен Бейбарыс Сұл­тан­­ның өмірі мен жауынгерлік жолы жайын­да ақпарат беріп, «Шығыс әлемі­нің ұлы қайраткері» тақырыбында бейнеролик назарға ұсынылды.

«Сұлтан Бейбарыс — Мысыр билеушісі» тақырыбында № 36 Ә.Тәжі­баев атындағы мектеп-лицейінің тарих пә­ні­нің мұғалімі Қайрат Тұрғанов баяндама жасады.

— Сұлтан Бейбарыс — барша түркі халықтарына мұсылман қауымына ор­тақ тұлға. Оны батыр ретінде ғана емес, адами құндылықтары тұрғысынан да тануға болады. Дешті қыпшақ дала­­сының атақты перзенті Мысырда мәм­лүк­тер мемлекетінің негізін қалаған, әрі оны 17 жыл билеген. Жігерлі қол­басшы елдің әл-ауқатын көтеруде орасан зор еңбек етіп, асыл дінімізге ерекше құрмет танытқан. Медреселер салуға көп күш жұмсап, каналдар мен бөгет­терді жөндетеді. Каир қаласында Бейбарыс салдырған мешіттің бірі «Бейбарыс мешіті» деп аталады. Қазір өзінің кіндік қаны тамған жерінде Жайық өзенінің жағасындағы Атырау қаласында биік тұғырға орныққан Бейбарыстың ескерт­кішке айналған алып тұлғасы асқақтап тұр, — деді Қ.Тұрғанов.

Тарихшы Бейбарыс өмір сүрген ке­зең­дер туралы, өмірі жайында бірқатар аңыз-әңгімелерге тоқталды. Сонымен қатар № 35 И.Тоқтыбаев атындағы мек­теп-лицейінің мұғалімі Гүлманат Сан­сыз­баеваның «Сұлтан Бейбарыс — дара тұлға» тақырыбында баяндамасы назар­ға ұсынылды.

— Бейбарыс Дамаскінің базарында 800 дирхемге құлдыққа сатыл­ған­нан кейін жаңа қожайын Айда­кин Бундукдаридың атымен әл-Бун­­дук­дари деген есімге ие болды. Ке­­йін Бейбарыстың ерекше қабілетін бай­қа­ған Айюби әулетінің сұлтаны Салих Нәжумиддин оны өзінің жеке гвар­дия­сының бір бөліміне сардар етіп алады. Сөйтіп ол енді жаңа әміршісінің атымен өзіне әл-Салихи деген есімді қабыл­дайды. Ол осында жүргенде крест жорығына қатысушыларға қарсы күрес­те Египед әскеріне қолбасшылық етеді, — деді Г.Сансызбаева.

Танымдық кеште Сұлтан Бейбарыс­тың жаужүрек қолбасшы болуы­мен қоса, айлакер саясат­шылығымен Ислам дінін қорғаған ұлы бабаның сыры жайында кең көлемде мағлұмат берілді. Жастар Мысыр билеушісіне арналған ақындардың өлеңдерін мәнерлеп оқы­ды. Аудандық ардагерлер кеңесінің төра­ға­сы Мұса Келдібаев өскелең ұрпақ қазақ тарихын, даңқты тұлғаларын білу керек­тігін айтты.

Бибіраса ЖАНӘЛІ