Диеталық нан шығаруға ниетті

Елді мекеннің қазіргі жай-күйімен танысқан біздер алдағы уақытта ауылда наубайхана ашылатынын білдік. Жеке кәсіпкер Гүлмира Махамбетова нан өнімдерін әзірлеу жобасымен мемлекеттен 2 млн. теңге грант ұтып алған. Қазіргі таңда наубайхананы жабдықтау жұмыстары жүргізілуде. Ұтып алған қаражат есебінен наубайхана иесі Ресей елінен арнайы құрылғылар сатып алған. Бір мезетте қамыр илейтін құрылғы, ХПЭ-500 маркалы нан көметін пеш, нан қамырын қалпына келтіруге арналған шкаф жұмыс жасауға дайын.

Наубайханада күніне 300-400 нан өнім­дерін шығару қолға алынбақ. Нан көму пеші 25-30 минут ішінде 72 бөлке нан пісіруге ар­налған. Өз кезегінде наубайхана иесі ауыл тұрғындарын бөлке нан, тандыр нан, тоқаш өнімдерімен қамтамасыз етуді көздейді.

– Өткен жылы нан өнімдерін әзірлеу жоба­сы аясында мемлекеттен 2 млн. теңге жеңіп алған болатынбыз. Үш жыл қатарынан қатысып, былтыр көздеген мақсатымызға жеттік. Бұған дейін жылыжай және тігін тігу цехы бойынша қатысқан болатынмын. Осы жолы ауылға қажетті жоба ретінде наубайхананы ұсындық. Себебі, ауылда дүкендер нан өнімдерін сырттан әкеліп, сатуда. Алдағы уақытта нан өнім­дерін сауда орындарына 65 теңгеден сату жос­парлануда. Сонымен бірге шаруашылықты нанмен қамтамасыз ету көзделген. Наубайхана жұмысы іске қосылған уақытта 2 адамды тұрақты жұмыспен қамтимыз. Диеталық нан өнімдерін шығаруға ниеттіміз, – дейді наубайхана иесі Г.Махамбетова.

Балтабай ОРДАБЕКОВ