Бала тәрбиесі – баршаға ортақ

Өткен аптада аудан әкімі Мұрат Ергешбаевтың қатысуымен аудандық мәде­ниет үйінде бала тәрбиесі мен жасөспірімдер арасындағы құқық­бұзушылықты болдырмау мақсатында кеңейтілген кеңес өтті. Кеңес жұмысына облыстық білім басқармасының басшысы Мейрамбек Шермаған­бет, облыстың бала құқығы жөніндегі уәкілі, белгілі психолог Жапырақ Ұзақбаева, кент және ауыл әкімдері, бөлім, мекеме басшылары, үкіметтік емес ұйым өкілдері, мектеп директорлары мен ата-аналар комитетінің төрағалары қатысты.

Кеңеске аудан басшысы модератор­лық жасап, «Отбасы – тәрбие бесігі» ат­ты бірлескен кеңестің бағдарламасын таныстырды.

– Өздеріңізге белгілі, қай кезде де ұрпақ тәрбиесінің еліміз үшін де, қоғам үшін де маңызы зор. Ұлт ұстазы Ахмет­ Байтұрсынұлы «Тәрбиенің негізі – тәртіпте, ал тәртіп бар жерде нәтиже болады» деп айтқандай, бала тәрбиесіне бәріміз бірдей жауаптымыз. Сондықтан бүгін талқыланатын мәселенің маңызы зор, – деп бастады аудан әкімі.

М.Ергешбаев жақында облыс әкімінің қатысуымен осы тақырып бойынша үл­кен жиын болғанына да тоқталды. Сол жиынның қорытындысы бойынша ата-анаға да, мектепке де зор жауапкерші­лік жүктелгенін жеткізді. Жауапкершілік пен ортақ міндет сапалы әрі уақытылы орындалу қажеттігін айтты.

Мұнан соң білім беру ұйымда­рын­да­ғы тәрбие жұмыстары мен алда ат­қарылатын іс-шаралар туралы аудан­дық білім бөлі­мінің басшысы Б.Жәнібеков баяндама жасады. Бөлім басшысы жас ұрпақ тәрбиесі – адамзаттың мәңгілік тақы­рыбы екенін айтып, ұлттың бүгіні де, бола­шағы да тәрбиелі ұрпаққа бай­ла­ныс­ты қалыптасатынын жеткізді.

– Баланың адам болып қалыптасуы қыруар уақыт пен тер төгетін, зор ең­бекті қажет ететін, ауқымы кең, жауап­кершілігі мол жұмыс. Осы ретте бүгін біз білім берумен қатар тәрбие сапасын көтеруге ата-анамен бірлескен іс-шаралардың тиім­ді тәсілдерін пайдалануды жандандырып, дамытуы­мыз қажет. Бұл бағытта ауданда бір­шама жұмыстар жүзеге асырылуда. Бар­лық білім беру ұйымдарында жүргі­зі­летін «Дебат қозғалысы», «Мектеп парламенті», «Оқуға құштар мектеп», «Мектеп театры» жобалары бо­­йынша жоғары нәтижелерге қол жет­кіздік. Кре­ативті жобалардың есебінен ынталы оқушылардың саны артып, қазіргі уақытта құрамындағы балалар­ саны үш мыңнан асты. Мектептерде от­ба­сы­лық құндылықтарды дәріптеу және оны сақтаудың маңыздылығына назар ау­дару мақсатында «Әкелер мекте­бі», «Ақсақалдар кеңесі», «Аналар мекте­бі», «Әжелер мектебі» мүшелерінің қа­­ты­суы­мен отбасын нығайту, шаңы­рақтың берекесін арттыратын әдет-ғұ­рып­тар жайында көптеген шаралар өткізілуде. Сондай-ақ балалардың жан-жақты тұл­ға болып қалыптасуына, шығар­ма­шылық шыңға жетуіне қосымша бі­лім беру жүйесінің атқарар рөлі зор. Бүгінгі күні аудандағы 5 қосымша білім беру ұйымы мен оның филиалдарында 1389 бала қамтылған. Аудандық  спортмек­тептеріне 1426 бала тартыл­ған. Сонымен­ қа­тар мек­тептердегі үйір­мелерге 3890 бала қатысуда. Соңғы жыл­дары респуб­лика көлемінде кәме­летке толма­ғандар ара­сын­дағы қылмыс пен құқық бұзушылық, топтық төбелес, қыз балалар арасындағы әлім­жеттік, буллинг, кибербуллинг, электронды те­мекі шегудің белең алуына байланысты тәрбие жұмыстарын күшейтіп, ерекше назар аударуымыз қажет, – деген Берік Жәнібеков мектептерде ерікті жасақшылар тобы құрыл­ғанын айтты.

Топ мүшелері аудандық полиция бөлімімен бірлесіп, «Түнгі қа­ла­дағы балалар», «Жас­өспірім» жедел про^­фи­лактикалық іс-ша­ралары аясын­да 100-ден астам қоғам­дық рейд ұйым­­дастырған. Дегенмен де түнгі уа­қыт­та ата-аналары немесе заңды өкіл­­де­рінсіз жүрген оқушы­лар­дың анық­талуы азаймай тұр. Демек, ата-ана­лардың бақы­лауы мен қада­ға­лауының жеткілік­сіздігі байқалады.

– Жыл сайын кәмелетке толма­ған жас­өспірімдер арасындағы құқықбұзұ­шы­лықтың, суицидтің, зорлық-зомбы­лықтың алдын-алу мақсатында ведом­ство­аралық жоспар бекітіледі. Былтыр аяқталған 1 суицид фактісі орын алып, бірқатар жауапты тұлғалардың тәр­тіптік жауапкершіліктері қаралды. Бі­лім бөлімімен бұл бағыттағы жұмыстар күшейтіліп, жүйеленген шаралар қолға алынды. Суицидтің алдын алу мақсатын­да мектептерде оқушылардан сауалнама алынды. Сауалнамаға 4749 оқушы қа­тыстырылып, 24 оқушы «психология­лық қолдау» тобына есептілікке, 118 бала мектепішілік бақылауға алынды. 23 оқушы емханаға дәрігерлердің ба­қыла­уына жолданып, 7-і дәрігерге қа­рал­ған.

Мектеп оқушыларының 2-іне ем тағайындалды. Дәрігер­дің қарауына жол­данған 14 оқушының ата-анасы ке­лісім бермеген. Бұдан бөлек қиын жағдайға тап болған отбасыларды анықтау бойынша мектептерде 17 әлеу­меттік педагог арнайы оқудан өтті. Осал топтағы балалардың тұрмыс сапасын жақсарту үшін арнаулы әлеуметтік қызмет көрсетіліп келеді. 2022 жылы 10 отбасының 24 баласы сүйемелдеуге алынып, 80-ге жуық оқушыға арнау­­лы әлеуметтік қызмет көрсетілді. Сала­аралық байланыс арқылы 3 отбасы қиын жағдайдан шығарылды, – деді бө­лім басшысы.

Былтыр Тереңөзек кенті мен Шаған, Айдарлы ауылындағы 4 бала Қызылорда қа­ла­сындағы кәмелетке толмағандарды бейім­деу орталығына орналастырылса, биыл Тереңөзек кентінде анасы вахталық жұ­мысқа кетіп, балаларының қараусыз қалуы­на орай 5 бала нағашы әжесінің қарауына уақытша беріліпті. Сондай-ақ 1 жасөспірім қыз анасының қадағалауынсыз қа­лып, бірнеше мәрте үйінен кетіп, қаңғы­бас­тық­қа салыну фак­тісі тіркелген. Осы мәселе­ге ерекше назар аудар­ған бөлім басшысы қазіргі таңда қоғамдағы өзекті мәселелердің бірі – қыздар тәрбиесі екенін айтты.

– Соңғы уақытта мектеп жасындағы қыз балалар арасында келеңсіз жағдайлардың жиі орын алуы бізді алаңдатады. Бұл бағытта аудан әкімдігі, ішкі істер, денсаулық сақтау салаларымен бірлескен күшейтілген кешенді шаралар қабылданды. Кешенді түрде ат­қарылған шараларға қарамастан, 2022-2023 жылы мектеп оқушысына қа­тысты ерте жүктіліктің 2 дерегі орын алды. Осы орайда ата-ана отбасында қыз бала тәрбиесімен жете айналыспаса, біздің тарапымыздан жүргізіліп жатқан жұмыстардың нәтижесі де жоғары болмайды дегім келеді. Сондықтан әр ата-ана оқушы қызының, ұлының тәрбиесіне, қызығушылығына ерекше мән беруі қажет. Балаларымызға «Ұстаз – екінші анаң» деп ақыл айтатынымыз рас. Алайда бала үшін ата-ана – бірінші ұстаз екенін естен шығарып алмауымыз керек. Әрине, жас өренді білімді, тәрбиелі етіп қалыптастыру барысында жауапкершілік жүгі ұстаздарға артылатыны түсінікті. Осы тұста ешбір мұғалім алдындағы балаға теріс әрекет үйретпейтінін, жаман әдетті жанына серік ет демейтінін қаперде ұстау керек. Сапалы білім, саналы тәрбие білім беру ұйымдарының негізгі міндеті болғандықтан оны үнемі өз деңгейінде жүргізу, жетілдіру ұстаздардан ұдайы талап етіледі, жауапкершілігі сұралады. Дегенмен, жұмыла көтерген жүк жеңіл. Арамыздағы бір жеткіншек бұралаң жолға түсіп, сағы сынса оған бәріміз бірдей айыпты сезінуіміз керек. Бірақ мектеп, ата-ана, ұстаз, жалпы қоғам болып осы бағытта жауапты жұмыс істесек, мұнымыз нәтиже берері сөзсіз, – деді Б.Жәнібеков.

Бүгінгі қоғамдағы өзекті мәселенің бірі - балалар мен жасөспірімдер арасындағы құқық бұзушылықтың алдын-алу, кәмелетке толма­ғандар арасында қылмыстың өсуіне жол бермеу екені белгілі. Осыған байланыс­ты былтыр бөлімнің ұйытқы болуымен білім ордаларында оқушылар арасында туындайтын даулар мен жанжалдарды шешу, қалпына келтіруге негізделген медиация қызметі іске қосылыпты. Сонымен қатар алдағы наурыз айында ата-аналар форумын өткізу жоспарлануда.

Мұнан соң облыстың бала құқығы жөнін­дегі уәкілі, белгілі психолог Ж.Ұзақбаева сөз сөйлеп, бүгінде баланы ата-ана емес, телефон, әлеуметтік желілер тәрбиелеп жатқанын айтты.

– Барлық мәселе бірінші кезекте ата-анаға байланысты. Өйткені, кез келген бала өмірге келгенде мұғаліммен, қоршаған ортамен емес, әуелі ата-анамен табысады, соның қарауында болады. Сөздің шыны керек, баласы өмірге келгеннен кейін 2-3 жасынан бастап қолына телефон беріп қоятын ата-аналар көп. Баласымен сөйлеспейтіндер, оның қызығушылығына мән бермейтіндер де көбейді. Бұл – өте қа­уіпті құбылыс. Тіпті, өте жұмысбасты ата-аналар кейде балаларының туған күнін де ұмытып кетіп жатады. Мұның бәрі көңіл бөлмеудің, баланы екінші орынға қоюдың салдары. Десе де біз балалардың құқығы тапталмауын, олардың жеке өміріне қол сұғылмауын, ар-намысына нұқсан келмеуін назарда ұстаймыз. Бұл бағытта облыста кешенді жұмыстар жүр­гізілуде. Кез келген мұғалім немесе ата-ана бала құқығы жөніндегі уәкілдің қызметіне жүгіне алады. Біз бала тәрбиесі үшін бірлесе жұмыс істеуге әрқашан дайынбыз, – деді Жапырақ Бегім­бай­қызы.

Кеңесте кәмелетке толмағандар арасындағы қылмыс пен құқықбұзушылықтың алдын алу шаралары туралы аудандық полиция бөлімінің басшысы Ғани Тұрсекеев баяндама жасады. Бөлім басшысы кәмелетке толмағандарға қарсы және олардың қатысуымен жасалатын қылмыстар, ал­коголь, есірткінің зияны, ата-ананың бала тәр­бие­сіндегі, жасөспірімдердің заң алдындағы жауап­кершілігі туралы дөңгелек үстелдер, сұхбат­тар, кездесулер өткізіліп келе жатқанын айтты.

– Білім беру ұйымдарында арнайы әзірленген хабарламалар ілініп, мектептерде түсіндірме жұ­мыстары жүргізілуде. «Балалар қауіпсіздігі мен ата-аналардың жауаптылығы» тақырыбында жа­дынамалар таратылды. Өткізілген жедел профи­лактикалық іс-шаралар нәтижесінде 2022 жылы жасөспірімдермен жасалған қылмыстар орын алған жоқ. Дегенмен профилактикалық жұмыстар барысында 112 құқықбұзушылық анықталды. Құқықбұзушылық жасаған кәмелетке толмағандар бойынша оқу орындары мен мектеп директорларына «әкімшілік құқықбұзушылыққа ықпал еткен мән-жайларды жою» жөнінде аудандық білім бөліміне ұсыным хаттар жолданып, қабылданған шаралар жөніндегі жауаптары алынды. Сонымен қатар балаларды тәрбиелеу және білім беру жөніндегі міндеттерін орындамаған тоғыз ата-ана­ға әкімшілік хаттама рәсімделіп, тиісті әкімшілік шаралар көрілді. Рейдтік іс-шаралар нәтижесінде кәмелетке толмағандардың түнгі уақытта ойын-сауық мекемелерінде жүруіне жол берген 6 кә­сіпкерге, оларға темекі бұйымдарын сатқан бір дүкен иесіне әкімшілік хаттамалар толтырылды. Құқық­бұзушылық жасағаны үшін 9 жасөспірім  және бала тәрбиелеудегі өзінің міндеттерін орын­дама­ған екі ата-ана қолайсыз отбасы ретінде профи­лак­­тикалық есепке алынды. Есепте тұрған қолай­сыз отбасы және жасөспірімдермен жеке дара профилактикалық жұмыстар атқарылуда. Есепті мерзімде жасөспіріммен жасалған қылмыс болма­ға­нымен кәмелетке толмағандарға қарсы жасалған қылмыстар үш есеге көбейген. Атап айтқан­да, үш жол-көлік оқиғасынан 3 жасөспірім қайтыс болған, 1 жыныстық қол сұғушылық қыл­мы­­сы да есепке алынды, – деді бөлім басшысы.

Ғ.Тұрсекеев жасөспірімдердің қылмыс жаса­уына ата-ана тарапынан тиісті қадағалау мен ба­қылаудың жоқтығы, тәрбие жұмыстарының өз деңгейінде жүргізілмеуі, отбасының әлеуметтік жағдайының төмен болуы жиі әсер ететін факторлар екенін айтты. Бұл орайда жасөспірімдердің қатысуымен жасалатын қылмыстың барлығы са­бақ­тан тыс уақытта болғандықтан, баланың бос уақытын тиімді ұйымдастыруды ұсынды.

– Өздеріңізге мәлім, қазіргі таңда ғаламтор же­лісінде барлық ақпаратқа қол жеткізуге болады. Сонымен қатар бала телефон арқылы ересектерге арналған контенттерге немесе түрлі зиян сайттарға қосыла алады. Оның ішінде, суицидке, құмар ойындарына апаратын сілтемелерді біз­дің тарапымыздан қадағалау мүмкін емес. Сон­­дықтан ата-аналар балалардың әлеуметтік желі­лерде қандай парақшаларда отырғанын қа­даға­лау қажет. Полицияның басты міндеті – қыл­мысты ашу ғана емес, оның алдын алу, болдыр­мау. Сол себепті ата-аналар, ұстаздар анық­­талған немесе белгілі болған құқықбұзу­шылық­тарды  дереу ішкі істер органдарына хабар­лау керек. Келешегін ойлаған мемлекет жас ұрпақ тәрбиесіне немқұрайлы қарамайды. «Ел болам десең – бесігінді түзе» деген нақыл сөз бар. Сол себепті тек бірлесе еңбек ету арқылы ғана біз өскелең ұрпағымыздың тәлім-тәрбиесіне бағыт-бағдар беріп, балалардың бақытты болашағын қалыптастыра аламыз, – деп қорытты аудандық полиция бөлімінің басшысы.

Кеңес барысында білім саласының ардагері, «Сырдария ауданының әйелдері» қоғамдық бір­лестігінің төрайымы Ұлмекен Жанәлиева бала тәрбиесіндегі ата-ананың рөлі тақырыбында өз пікірін ортаға салды. Ардагер «Бала тәрбиесіне қоғам жауапты. Ал қоғамға мектеп те, ата-ана да, үлкен де, кіші де кіреді» деп бұрынғы кезбен қазіргі заманның ерекшеліктеріне тоқталды. Балалардың әр күнін емес әр сағатын бақылаусыз қалдыруға болмайтынын айтты. Тиісті мекемелер тарапынан жүргізіліп жатқан жұмыстарды нәтижелі болуы үшін қоғам болып осы жұмысқа оң көзқарас таныту қажеттігін атап өтті.

Кеңесте облыстық білім басқармасының басшысы Мейрамбек Шермағанбет күн тәртібіндегі мәселенің маңызы, атқарылған жұмыстар мен ал­да­ғы міндеттер жөнінде мазмұнды баяндама жасады. Басқарма басшысы кеңестің мәні мен маңы­зы ерекше екенін айтып, балаға тәлімді тәрбие мен лайықты білім беруде баршаның ұстанымы бір, мүддесі ортақ болу керектігіне тоқталды.

– Өткен аптада облыс әкімі Нұрлыбек Нәлібаевтың төрағалығымен «Отбасы – тәрбие бесігі» тақырыбында ата-аналар мен білім беру саласы қызметкерлерінің кеңейтілген кеңесі өт­ті. Басқосуда аймақ басшысы бала қауіпсіздігін қамтамасыз ету және жас ұрпаққа лайықты тәр­бие беру мәселесіне қатысты алдымызға нақты міндеттер қойып, ата-аналармен бірлескен ке­шенді іс-шараларды жүзеге асыруды тапсырды. Ата-ананың ең үлкен бақыты – баласының жақсы азамат болып өсуі десек, мемлекет пен қоғамның басты мұраты – жас ұрпақтың болашағын баянды ету. Осы ретте Мемлекет басшысы өткен жылды «Балалар жылы» деп жариялап, атаулы жылға айрықша маңыз берді. Мерейлі жылы Сыр өңірінде ауқымды жобалар жүзеге асырылып, аймақ басшысының бастамасымен демеушілердің қолдауы есебінен облыс бойынша 80 спорт-ойын алаңы салынды.  Былтыр 18 балабақша, 6 мектеп ашылып, 2 апатты білім беру ұйымының мәселесі шешілді. Үкімет басшысының Сыр еліне жасаған сапары барысында 300 орындық жатақханасы бар 400 орынға лайықталған «Физика-математика» бағытындағы мектеп-интернат салу жобасы қол­дау тапты. Биыл «ҚазГерМұнай» компаниясы Қы­зылорда қаласында заманауи 350 орындық Оқу­шылар сарайының құрылысын бас­тайды. Алдағы жаңа оқу жылының қарсаңында 150 орындық екі мамандандырылған мектеп дарынды балаларды қабылдайды, – деді Мейрамбек Зинабдинұлы.

Айта кету керек, соңғы жылдарда облыс­та бала туу көрсеткіші артқан. Осыған байланысты мектеп, балабақша салу жұмыстарына жеткі­лікті деңгейде мән берілуде. Алдағы 3 жылда 64 ба­лабақша ашу жоспарлануда. Осылайша, 11 мыңға жуық бүлдіршін балабақшамен қамтылатын болады. Бұған қоса биыл 940 орындық 4 жаңа мектеп пайдалануға беріледі. Мемлекет басшысының бас­тамасымен «Жайлы мектеп» ұлттық жобасы аясында 21 мектеп салынады деп нақтыланған. Оның жалпы құны 98 млрд теңгені құрайды. Аймақта жеке мектептердің де саны артуда. Қа­зірдің өзінде өңірде 21 жеке мектеп жұмыс істесе, алдағы 3 жылда инвесторлар 12 мектеп салуға ниет білдіріп отыр. Осындай жақсы жаңалықтармен бөліскен басқарма басшысы білім саласындағы жүзеге асқан және алдағы уақытқа жоспарланған бұл жобалар ел болашағы – балалар үшін жасалып жатқанын, сондай-ақ өкінішке орай, осындай игілікті істермен қатар, ұрпақ тәрбиесіне қатысты алаңдатарлық жағдайларымыз бар екенін айтты.

– Соңғы уақытта оқушылар арасында құқық бұзушылық, өз-өзіне қол жұмсау, ерте жүкті­лік, ойынқұмарлық, топтық төбелес және әлім­жет­тік жағдайлары жиі көрініс беруде. Өткен жыл көлемінде облыс бойынша кәмелетке тол­ма­ған­дар­мен жасалған қылмыстық құқықбұзушылық 36,7%-ға, топтық қылмыс 30,8 %-ға төмендеген. Кә­мелетке толмағандармен жасалған ең көп құ­қық­бұзушылық Қызылорда қаласында тіркелсе, ұрлық бойынша ең жоғарғы көрсеткіш Қазалы, Арал ауданында, сонымен қатар, Шиелі, Жаңа­қорған аудандарында орын алған. Кәмелетке тол­мағандар арасында суицид бойынша былтыр облыста 8 аяқталған суицид, 5 ұмтылыс жағдайы тіркелді. Айта кету қажет, жалпы жеткіншектердің өз-өзіне қол жұмсауы жағдайына білім беру ме­кемелерін кінәлі ету жиі ұшырасып жатады. Өз кезегінде білім беру ұйымдары уақытылы суи­­цидалды балаларды анықтап, медицина меке­мелеріне жолдайды. Алайда, ата-аналар көп жағ­дайда балаларының ары қарай емделуіне қар­сылық білдіріп жатады.  Әрине, мұның салдары өте ауыр екені белгілі. Мәселен, өткен жылдың өзінде өз-өзіне қол жұмсауы ықтималдар санатына енген 137 баланың ата-анасы балалардың емханаларда жүйелі ем алуына қарсы болған. Заң­дылықтарға сәйкес, білім алушыларға ата-анасының келісімінсіз ем тағайындалмайды. Бұл мәселені байыпты шешуде тек ұстаздар мен емхана қызметкерлеріне иек арту орынсыз деп ойлаймын. Өйткені, ұрпақ тәрбиесінде отбасының, ата-аналардың жауапкершілігі қашанда маңызды. Сондықтан келеңсіз жайттардың алдын алу бо­йынша аудандық білім бөлімі денсаулық сақтау саласының жергілікті жердегі мамандарымен бір­лесіп,  дәрігерге көрінуден бас тартқан отбасыларды аралап, ата-аналарға түсіндірме жұмыстарын кең көлемде жүргізуі қажет, – деді басқарма басшысы.

М.Шермағанбет Сыр өңірі  қашандақазақылық пен салт-дәстүрдің қаймағы бұзылмаған аймақ екеніне тоқталып, қоғам болып зорлық-зомбылық, ерте жүктілікті болдырмау және оның алдын алуда кешенді іс-шаралар жүзеге асыру қажет екенін айтты. Ол үшін зиялы қауым өкілдері, ардагер аналарымыздың өмірлік тәжірбиесін кеңінен пай­даланып, ұрпақтар арасындағы сабақтастық дәстүрі негізінде тәлімгерлік институтының жұмы­сын жолға қоюды ұсынды. Осы ретте отбасыжәне мектеп ынтамақтастығын арттыруға күш салу білім саласының ғана емес, баршамыз бірлесіп ат­қаратын абыройлы міндет екенін жеткізді.

Кеңесті қорытындылаған аудан әкімі тиісті са­ла басшыларына бірқатар нақты тапсырма берді. Оның ішінде аудандық білім бөліміне мектептерде тәрбие жұмыстарын жетілдіру бойынша ке­шенді іс-шаралар жоспарын қабылдап, «Әкелер ке­ңесінің», «Аналар мектебінің», ата-аналар ко­ми­тетінің жұмысын жандандыруды жүктеді. Сон­дай-ақ кент және ауылдық округ әкімдерімен бірлесіп, жергілікті жерде жасөспірімдердің тәр­бие­сі мен құқықбұзушылығына қатысты бір­лес­кен ведомствоаралық жұмыстардың сапалы орындалуын қамтамасыз етуді тапсырды. Ал аудандық полиция бөліміне жасөспірімдер мен жастар арасындағы құқықбұзушылық, кибер­буллинг әрекеттері мен заңсыз ойын орындарына тосқауыл қою бағытында жұмыстарды күшейту қажеттігін ескертті. Аудандық мәдениет және спорт бөліміне балалардың бос уақытын тиімді пайдалануды үйлестіру бойынша бірлескен кешенді шаралар қабылдауды тапсырса, аудандық ауруханаға саламатты өмір салтын қалыптастыру, балалар мен жасөспірім қыздардың денсаулығын нығайту бағытында денсаулық картасы әзірлеуді міндеттеді. Сонымен қатар кәсіпкерлік, өнеркәсіп және туризм бөлімі, әлеуметтік аз қамтылған отба­сыларға жеңілдетілген несиелер берулер ар­қылы тұрмыстық жағдайын жақсарту бойынша нақты жұмыстарды ұйымдастыру қажеттігін қапер­ге алу керектігін жеткізді. Аудандық жұмыс­пен қамту және әлеуметтік бағдарламалар және азаматтық хал актілерін тіркеу бөліміне кент жә­не ауылдық округ әкімдерімен бірлесіп түрлі санаттағы отбасыларға талдау жасап, әлеуметтік карта әзірлеп, ұсыныс енгізуді тапсырды. Сондай-ақ аудандық қоғамдық даму бөліміне отбасы құн­дылығы, бала тәрбиесі туралы бейнероликтер әзірлеп, жергілікті БАҚ пен әлеуметтік желі­лерде ақпараттық-насихаттық жұмыстарды ұйым­дастыру жүктелді.

– Жұмыла көтерсек, жүгіміз де жеңіл, жұмы­сымыз да нәтижелі болмақ. Ендеше, баршаңызды ұлт мүддесі жолында бірлесіп жұмыс жасауға ша­қы­рамын, – деп қорытындылады аудан әкімі кеңейтілген кеңесті.

Ақтөре ИБРАГИМҰЛЫ