Күрделі жөндеуден өтеді

Жыл басынан бері биыл ауданда атқарылатын жұмыстарды ақпа­рат­­тан­дырып келеміз. ­Бұ­ған дейін аудан орта­­лы­ғындағы және ауыл­­дардағы орташа жөн­деуден өтетін бір­қатар көшелерді атап өт­тік. Енді күрделі жөн­деу жүргізілетін нысан­дарға тоқталсақ. Оның қатарында ау­дан­дық мәдениет және спорт бө­ліміне қарас­ты «Сырдария аудан­дық спорт клу­бы» коммуналдық мем­­лекеттік мекемесі бар.

Спорттық ғимараттың салынғанына жарты ғасыр болған. Нақтысын айтқанда, 1976 жы­лы асар әдісімен салынған. Сол уақыттан бері іші­нара жөндеу көрсе де қайта жаңғырту жұ­мыстары жүргізілмеген.

Алғашқыда аталған нысан білім ордасы бол­ды. №36 орта мектеп базасы осында болып, мұнда қаншама шәкірт білім алды. Тереңөзек кентіне кіреберістен жаңа мектеп салынғаннан кейін аудандық білім бөлімінің теңгеріміндегі ғи­мараттың бір бөлігі спорт клубына берілді. Яғни, 2011 жылдан бері осында жасөспірімдер түрлі спорттық үйірмелерге қатысып, шынығып келеді.

Нысан қазір күрделі жөндеуді қажет етеді. Бұған қатысты спорт клубы қызметкерлері тарапынан жыл сайын жөндеу жүргізу керектігі айтылып та жүр.

– Аудандық спорт клубында 13 жаттықтыру­шы жұмыс істейді. Олар аудан бойынша 800-ден аса жасөспірімді спортқа баулуда. Бізде ауыр атлетика, жеңіл атлетика, ережесіз жекпе-жек, қол күрес, гір көтеру, тоғызқұмалақ, волейбол секілді спорт түрлерінен жасөспірімдер жаттығып, түрлі жарыстарға қатысуда. Тиісінше, жеңіске жетіп жүрген тәрбиеленушілеріміз жетерлік. Міне, осындай жасөспірімдердің спортпен емін-еркін айналысуына ескірген ғимаратты жаңғырту ке­рек-ақ, – дейді аудандық спорт клубының директоры Бауыржан Ахметов.

Үш қабатты ғимаратта спорт және тренажер зал­дары бар. Мамандар отыратын бөлмелер де қарастырылған. Десе де кабинеттер жетіс­пеушілігі бар екенін айта кеткен жөн. Міне, осыған байланысты спорттық нысанға күрделі жөндеу жұмысы жүргізілуі тиіс. Бұл биыл іске асырылмақ.

Аудандық спорт клубын күрделі жөндеу биыл­ғы жоспарға енген. Тіпті жоба-сметасы да­йындалып, сараптамадан өткізіліп, тиісті қа­ра­­жат бөлініп қойған. Енді конкурс негізінде мердігер компания анықталса, құрылыс қарқын алмақ. Күрделі жөндеу жұмыстары сапалы жүр­гізіліп, спорттық нысан жаңарса, оның ішінде спортпен шұғылданушыларға ерекше серпін бол­мақ. Тиісінше, спорттық құрал-жабдықтар да жаңартылатын болса, аудан намысын, ел мерейін үстем ететін спортшылар шығатыны анық.

Е.БЕРКІНБАЕВ