Ауылдар да газдандырылады

Аймақ аудандарын газдандыру кезең-кезе­ңімен іске асырылып жатқаны белгілі. Облысты кешенді газдандырудың алғашқы кезеңінде аудан орталықтары көгілдір отынға қол жеткізді. Енді осы газдандырудың келесі кезеңі іске асып, соның аясында елді мекендерді табиғи газға қосу жұмыстары жүргізілуде. Бұл орайда ауданға қарасты Қалжан ахун ауылының тұрғындары көгілдір отынның игілі­гін көреді деп күтілуде. Бұл – елді мекен тұрғындары үшін жағымды жаңалық.

Аудан орталығы табиғи газға қосыл­ған­нан кейін елді мекендерді газдандыру жұмыстарына басымдық берілуде. Атап айт­қанда, Тереңөзек кентіне жақын орналасқан Қалжан ахун, С.Сейфуллин, А.Тоқмағамбетов және Шаған ауылдарына табиғи газ жеткізуге жұмыстар жүргізілуде. Соның негізінде бү­гінгі таңда елді мекендерді газдандыруға бай­ланысты жобалық-смета­лық құжаттар да­йын­далған, тіпті, сараптамадан өтіп, қар­жы­­сы шешілген ауыл бар.

– Өткен жылдың қорытындысымен облыс­та тұрғындардың газ тұтыну деңгейі 68 па­йызға жетті. Алдағы 3 жылға яғни, 2023-2025 жылдарға арналған жоспар бойынша 45 елді мекенді көгілдір отынмен қамту жос­парда бар. Нәтижесінде, 2025 жылдың соңына қарай газдандырылған елді мекендер саны 70-ке жетеді. Оның қатарында ау­данға қарасты ел­ді мекендер бар. Бұл жұмыстың бастамасы аудан басшысы Мұрат Нәлхожаұлының қолдауымен биыл іске асады. Ауылдарды табиғи газбен қамтамасыз ету Қалжан ахун елді мекенінен бастау ал­мақ. Аталған ауылды газдандырудың жалпы құны – 330 млн 586 мың теңге. Республикалық бюджеттен осының 298 млн теңге қаржысы бөлінсе, қалғаны облыстық бюджеттен қаралады деп күтілуде. Қазіргі таңда аудандық тұрғын үй-коммуналдық ша­руашылық, жолаушылар көлігі және автомобиль жолдары бөлімі тарапынан мердігер мекемені анықтау үшін мемлекеттік сатып алу жұмыстары жүр­­­гізілуде. Ауыл ішінде жүр­гізілетін газ құбырының жалпы ұзын­дығы 19,7 шақырымды құрайды, – дейді аудандық тұрғын үй-коммуналдық шаруа­шылық, жолаушылар көлігі және автомобиль жол­дары бөлімінің басшысы Нұржан Бисембаев.

Әрине, газды елді мекенге жеткізу, көшелерде газ құбырларын жүргізу жұмыс­тары белгілі бір уақытты алады. Десе де ауыл халқының көгілдір отынның игілігін көретін күні алыс емес. Себебі, тиісті қаржысы бөлі­ніп қойған, енді осы жұмыстарды сапалы ат­қа­ра­тын мамандар анықталуы қажет-ақ.

Осы орайда ауданда газ тарату жұмыста­рын үйлестіретін мекеме мамандары Қалжан ахун ауылының халқымен алдын ала кез­десіп, қауіпсіздік шараларын, үйге табиғи газ орнатудың алғышарттарын түсіндірген.

– Жақында ауыл тұрғындарымен арнайы кездесу ұйымдастырдық. Елді ме­кен­ге табиғи газдың жеткізілетіні қуа­ныш­ты жа­ңалық. Осыған байланысты біз маман ретінде та­биғи газды орнату барысындағы қауіпсіздік­терді түсіндірдік. Алдымен кездесуге қатыс­қандарға газ құбырлары есіктің алдына де­йін келе­тінін айттық. Одан әрі қарай үйге дейінгі газды монтаждау жұмыстарын осы салада өз қызметтерін көрсететін кәсіпкерлер арқылы жүзеге асатынын жеткіздік. Осы тұста, тұр­ғын­дарға алаяқтарға алданып қалмау­ды ес­кертеміз. Мұндай жағдайлар кездес­кен. Жұ­мысты сапасыз жүргізіп, қауіпсіз­дік талаптары сақталмайды. Оның жауап­кер­ші­лігі жоғары. Сондықтан монтаждау жұмыстарын қай кәсіпкерге істетіп жатқанын «Қы­зылорда газдандыру жүйесі» комму­нал­дық мемлекеттік мекемесінің Терең­өзек­ кен­ті өнді­ріс­тік учаскесі мамандарына ес­кер­тіп отыр­са, тұрғындар алаяқтыққа тап болмайды. Сондай-ақ «каркас», яғни қамыс және ағаштан тұрғызылған үйге табиғи газ кіргізіл­мейтінін де атап өткен жөн. Үйдің құжаттары түгел болғаны да дұрыс, – дейді «Қызылорда газдандыру жүйесі» коммуналдық мемлекет­тік мекемесінің Терең­өзек кенті өндірістік учас­­кесінің директоры Еркебұлан Есенгелді.

Жалпы, ауылға газ келетінін естіген жұрт­шылық қуанышты. Табиғи газ біраз жұ­мысты жеңілдететінін айтады елді мекен тұрғын­дары.

– Жыл басында «Биыл ауылға газ келеді» деген жағымды жаңалықты естіп, қуанып жүрміз. Ауылымыз аудан орталығына жақын орналасқан. Тіршілігіміз де біте қайнасып жатыр. Тереңөзек кентіндегі табиғи газдың игілігін көріп отырған ағайындардың үйіне бар­ғанда қызығатынбыз. Жып-жылы, тіпті біз секілді баллонмен газ тасып жүрген жоқ. Енді міне, осындай жақсы жағдай біздің ауылда да болмақ. Тек газдандыру жұмыстарының сапалы жүргізілгенін қалаймыз, – дейді ауыл тұрғыны Әбілда Байтөре. 

Осы жылы Қалжан ахун ауылы газдандырылатын болса, аудан орталығына жа­қын С.Сейфуллин, А.Тоқмағанбетов елді ме­кендері де жуық уақытта табиғи газбен қам­тамасыз етілуі тиіс. Ол үшін газдандыру жобаларын қаржыландыру мақсатында тиісті басқармаға бюджеттік өтінімдер ұсынылған. Ал Шаған елді мекенін газдандыру бойынша жобалық-сметалық құжаттама әзірленіп, бүгінгі таңда мемлекеттік сараптамадан өт­кізі­луде.

Е.БЕРКІНБАЕВ