Тіршілік тынысы Tirshilik-tynysy.kz ақпараттық агенттігі
» » Заң талаптарын түсіндірді

Заң талаптарын түсіндірді

№36 Ә.Тәжібаев атындағы мектеп-лицей базасында білім беру ұйымдарының қызмет­керлерін құқықтық-оқыту мақсатында аудандық семинар өткізілді. Аталған семинарға ҚР Бас прокуратурасы Құқықтық статистика және арнайы есепке алу жөніндегі комитеттің Қызылорда облыстық басқармасының Сырдария ауданы бойынша бас маманы Керейтбай Нұрымов, аудан әкімі аппа­ратының мемлекеттік-құқықтық жұмыстар бөлімінің басшысы Ернар Зұлқарнаев, аудан әкімі аппа­ратының құжаттамалық қамтамасыз ету бөлімінің маманы Эльвира Салимова, аудандық білім бөлі­мінің мамандары мен сала қызметкерлері қатысты.

Аудандық семинарда білім беру ұйымда­рындағы кездесетін құқықтық және құжат­тамалық мәселелер бойынша оқыту жүргі­зілді. Арнайы келген мамандар 3 мәселе шеңберінде жиналған көпшілікке кеңінен ақ­парат берді. Ең алдымен, ҚР Бас прокуратурасы Құқықтық статистика және арнайы есепке алу жөніндегі комитеттің Қызыл­орда облыстық басқармасының Сырдария ауданы бойынша бас маманы Керейтбай Нұрымов ҚР №350-VI әкімшілік рәсімдік-процестік кодексі талаптарын түсіндірді.

– Негізінен, ҚР №350-VI әкім­шілік рә­сімдік-процестік кодексі талаптарында ес­керілетін дүниелер көп. Осы салаға жауапты маман мен лауазымды басшы тарапынан сапалы жұ­мыс жүргізілуі керек. Жеке және заңды тұлғалардан келетін кез келген құжаттың аражігін ажырата білу қажеттілігі туындайды. Заң аясында атқарылатын жұ­мысты сапалы жасауға бейімделген дұ­рыс. Арыз-шағым, өтінім, ұсыныс секілді бірнеше бағытта келетін құжатқа сауатты және уақытылы жауап берген дұрыс. Оның барлығы арнайы базада тіркеліп, жауапты басшылар қадағалауға алуы тиіс. Әрине, білім саласының сан түрлі бағыты бойынша хаттар, өтініштер, ұсыныстар келген жағдайда азаматтардың талап-тілегін қанағаттандыру – басты орында, – дейді К.Нұрымов.

Келесі кезекте аудан әкімі аппаратының мемлекеттік-құқықтық жұмыстар бөлімінің басшысы Ернар Зұлқарнаев сыбайлас жем­қорлыққа қарсы іс-қимыл бағытында аудан­да атқарылып жатқан жұмыстарға тоқ­талды.

– Ауданда сыбайлас жемқорлыққа қарсы іс-қимыл бағытында біршама жұмыстар ат­қарылуда. ҚР-ның кейбір заңнамалық ак­тілеріне сыбайлас жемқорлыққа қарсы іс-қимыл және мемлекеттік қорғауға жататын адамдардың қауіпсіздігін қамтамасыз ету мәселелері бойынша Мемлекет басшы­сының 2022 жылғы 16 наурыздағы Жолдауын іске асыру мәселелері бойынша өзгеріс пен толықтыру енгізілді. Қазіргі уақытта азаматтық және лазауымды қызметке ор­наласқан азаматтар кіріс-шығыс есебін беруге міндетті. Азаматтық қызметтің мем­лекеттік функцияларға теңестірілген функцияларды орындауға байланысты лауазымды адамдарға арнайы ереже бекітілген. Лауазымды тұлғаларға арналған заңдар шеңберінде сыбайлас жемқорлыққа қарсы іс-қимыл жұмысы пысықталған. Заң аясында сыбайластыққа барған жандар жауапқа тартылатын болады. Кез келген азаматтық қызметкер әділ, таза жауапкершілікпен қыз­мет еткені дұрыс. «Сыбайлас жемқор­лыққа қарсы іс-қимыл туралы» ҚР Заңына сәйкес жұмыстан шығаруға алып келетін қызметкерлердің шығыс­тарының өз кіріс­­те­ріне байланыс­ты тиісті шаралар қабыл­данатындығын назарға алған дұрыс, – деді бөлім басшысы.

Өз кезегінде аудан әкімі аппаратының құ­­жат­тамалық қамтамасыз ету бөлімінің ма­маны Эльвира Салимова «E-Otinish» ақ­па­раттық жүйесімен жұмыс жасауды ұйым­дастыру, жеке және заңды тұлға­лардан келіп түскен жолданымдарды уақытылы тір­кеу және оларға жауап беру тақырып­тарында слайд арқылы түсіндірме жұмысын жүргізді.

– «E-Otinish» ақпараттық жүйесі бо­йынша сан салаға бөлінген құжаттарды тіркеу күн тәртібінен түспейді. Ақпараттық жүйенің атқаратын өзіндік функциялары бар. Білім беру ұйымындағы әр­бір жауапты маман ұқыпты, тиянақты жұмыс жүргізуі керек. Біз қашанда бағыт-бағдар беруге дайынбыз. Себебі, құжаттарды тіркеуде қателікке жол берілмейді. Әрине, алдағы уақытта бірлесіп жұмыс жасайтын боламыз, – деді Эльвира Салимова.

Келелі жиында бас қосқан көпшілік сала ма­ман­дарына көкейдегі сауалдарын қойып, тұ­щымды жауабын алды. Бұл ретте, аудандық білім бөлімінің бас маманы Жанар Бегайдарова мен әдіскер-заңгер Динара Абдразакова жоғарыда көтерілген мәселелерге байланысты жұмыстарды ұтымды ұйымдастыруды тал­қылады. Білім беру ұйымдарындағы жауапты мамандарға жұмысқа жауапкершілікпен қарауды айтты.

Балтабай ОРДАБЕКОВ
17 қаңтар 2023 ж. 408 0