Синоптиктер ескертеді
Қыс қытымырлығын көрсетіп бағуда. Жаңа жыл басталғалы ел төңірегінде қар қалың жауып, жұртшылықты әбігерге салған. Оның үстіне күн температурасы да төмен болып, аяз ызғары басылмай тұр. «112» құтқару қызметінен дабылды ескертулер келіп те жатыр. Соған сай ауа райының қолайсыз кезеңінде жолға шықпау жөнінде мамандар ескертуде. Өйткені, қалың қар мен бұрқасынды дауылды күндері жолда қалып қойып жатқан қазақстандықтар қатары көп.Осы аптада ел аумағында күн райы аязды болды. Бұл жағдай алдағы аптада да сақталмақ. «Қазгидромет» РМК деректері бойынша Қазақстан аумағының басым бөлігіне кең антициклон ықпал етеді. Негізінен, жауын-шашынсыз ауа райы күтіліп, тек республиканың солтүстік және шығыс бөліктерінде атмосфералық фронтальды бөлімдердің өтуімен ауа райының тұрақсыз сипаты болжанады.
«Елдің батысында ауа температурасы түнде 9-19-дан 5-17-ге дейін шамалы көтеріледі, түнде солтүстік-батыста 13-28 аяз, солтүстікте 10-23 аяз, орталықта 17-28 аяз, шығыста 18-32 аяз болады» деп хабарлайды синоптиктер.
Оңтүстік өңірлерде де аяз ызғары білінеді. Қызылорда өңірінде түнде ауа температурасы -11°C, -13°C-қа дейін төмендеп, суық болады. Ал күндіз ауа температурасы -5°C, -8°C көрсетіп күн ашық болады. Жауын-шашын күтілмейді. Десе де, желдің қатты ұйытқуы адамды әбігерге салуы мүмкін. Сондықтан синоптиктер әркез жылы киініп жүруді ескертеді.
«ТТ» ақпарат
