Облыс әкімі тағайындалды

Мемлекет басшысының тапсырмасы бойынша ҚР Мемлекеттік кеңесшісі Ерлан Қарин Қызылорда облысына жұмыс сапарымен келіп, аймақтың барлық деңгейдегі мәслихат депутаттарының жиналысына қатысты. Депутаттар Қызылорда облысы әкімін тағайындауға келісім беру үшін ұсынылған екі кан­дидатқа ашық дауыс беріп, өз таңдауларын жасады.

ҚР Конституциясының 87-бабы­на және ҚР Президентінің 2022 жыл­ғы 8 маусымдағы №912 Жарлы­ғы­на сәйкес, облыс әкiмi лауазымына та­ғайындауға келісім облыс аума­ғын­да орналасқан мәслихат­тар де­путаттарының жиналысында берi­ледi. Осыған орай, депутаттардың бір­лескен жиыны ұйымдастырылып, оны­ облыстық мәслихаттың хатшы­сы Наурызбай Байқадамов жүр­гізді. Жиында Ерлан Қарин де­пу­тат­­­тарға ҚР Президентінің Қы­зылорда облы­сы­ның әкімі лауазы­­мы­­на екі кандидат­ты қарауға ен­гізу туралы хатын оқып берді.

Жиынға қатысқан 135 депутат өз таңдауын жасады. Ашық дауыс беру нәти­жесі бойынша депутаттардың 81,5 пайызы Нұрлыбек Нәлібаев­ты жақ­­­тап дауыс берді.

Жиыннан кейін облыс активінің отырысы өтті. Жиында сөз алған Қазақстан Республикасының Мем­лекеттік кеңесшісі Ерлан Қарин Қа­зақ­­стан Республикасының Прези­денті Қасым-Жомарт Тоқаев­тың Қы­­зылорда облы­сы­ның әкімі ла­уазы­мына Нұрлыбек Нәлібаев­ты та­ғайын­дау тура­лы Жар­лығын таныс­тыр­ды.

Ерлан Тынымбайұлы өңірді әлеу­меттік-экономикалық тұрғыдан дамы­ту, халықтың әл-ауқатын көте­ру бас­­ты міндет екенін айтып, Нұрлыбек Машбекұлының облыс­ты өркен­дету­дегі қыз­метіне сәттілік тіледі.

– Қызылорда облысының еліміздің әлеуметтік-экономикалық дамуында алатын орны ерекше. Сыр халқы әр­кез бірлік, ынтымақ ұғымдарын жо­­ғары бағалап, адал еңбек етіп ке­леді. Соңғы уақытта өңірге бірнеше рет келдім. Әр келгенімде жаңарып, жаңғырып жатқанын аңғарамын. Ке­шегі маңызды саяси кезеңдерде де облыс халқы өзінің ауызбіршілігін танытты. Ел Президентіне дауыс беріп, айқын таңдауларын жасады. Осы жұмыстар алдағы уақытта да жүргізіледі деп сенемін. Мемлекет бас­шысының реформаларын, бастамаларын жүзеге асыруға үлес қосып жүрген зиялы қауым өкілдеріне, ардагерлерге, барша қызылордалықтарға алғысымды білдіремін, – деді ҚР Мем­лекеттік кеңесшісі.

Мұнан соң облыс әкімі сөз алып, қолдау білдірген жерлес­теріне риза­шы­лығын айтып, ал­да­ғы жоспарларымен бөлісті.

– Қашан да сындарлы сәттерде сыр білдірмеген қасиетті де киелі Сыр өңірі жұртшылығы Мемлекет бас­шысының бастамаларына қол­дау білдіріп, мызғымас бірлік пен тату­лықтың үлгісін көрсетіп келеді. Әрі қарай да осы дәстүрлі жолымызды жал­ғап, ел дамуы жолында аянбай қызмет ететін боламыз. Өңіріміздің дамуына Мемлекет басшысы әркез қолдау білдіріп келеді. Үкімет тарапынан да жақсы мүмкіндіктер жасалуда. Сондықтан осы қолдаулар негізінде аймақтың әлеуметтік-экономикалық көр­сеткіштерін жақсартуға атсалысуымыз қажет. Бұл іске барша сыр­бойылықтар өз үлесін қосады деп се­немін, – деді аймақ басшысы.

Айту керек, Нұрлыбек Нәлібаев 1976 жылы дүниеге келген. Қазақ мемлекеттік аграрлық университетін экономист-менеджер мамандығы бо­йын­­ша бітірген. Еңбек жолын 1997 жылы «Казах­ойл-коммерция» ЖШС мұнай және мұ­най өндірісінің сарапшысы болып бастаған. Сонымен қатар 1998-2005 жылдары түрлі жеке бизнес құры­лымында басшылық қыз­меттер атқарған. 2005–2007 жылдары Қы­зыл­орда қаласы әкімінің орынбасары, бірінші орынбасары, 2007-2008 жылдары – Қызылорда облысы әкімі аппаратының басшысы болса, 2008-2013 жылдары Шиелі ауданының әкімі, 2013-2021 жылдары Қызылорда қаласының әкімі лауазымын атқарды. Сондай-ақ 2021 жылдан 2022 жылдың сәуіріне дейін Қазақстан Рес­публикасы Премьер-Министрі Кең­се­сінің Өңірлік даму бө­лімінің меңге­рушісі ретінде еңбек етті. 2022 жылдың 7 сәуірінен осы кезге дейін Қызылорда облысының әкімі қызметін атқарды.

Актив жиынында ел ағалары аймақ басшысының жұмысына сәттілік тілеп, дамудың даңғыл жолына бағыт алған Қызылорда облысының үздік­тер көшін бастай беретініне сенім білдірді.

Ақтөре ИБРАГИМҰЛЫ