Ауыл тұрғындары электронды кітап жүктеп алды

Қазіргі заман – ақпараттық технологиялардың заманы деп жатамыз. Ұялы телефон, ноутбук, компьютер сияқты техникалық құрылғылардың көп жерде зиянын жарыса жазғанымызбен, бұл құрылғылардың өз кезегінде пайдасы да орасан зор. Даттаушылар жағы көз бен денсаулыққа зиян, сананы улайды деген себептерді алға тартады. Бұл бір жағынан жөн, медициналық тұрғыда дәлелденген. Бірақ бүгінгі күнде күнделікті өмірді ақпараттық технологияларсыз елестету мүмкін емес. Бір ғана түймешік арқылы түгел кітапхана кітаптарына, тіпті бүкіл әлемге еркін бойлап кетуге болады.

Осы ретте, ақпараттық технологиялардың ұтымды жағын пайдалануды көздеген Қоғалыкөл ауылдық округі әкімі аппаратының мемлекеттік қызметшілері ауылдық кітапханашы Нұргүл Жуматаеваның жетекшілік етуімен "Google Play" және "App Store"  мобильді қосымшасы арқылы "Kitap" бағдарламасын жүктеп алды. Қолдарындағы ұялы телефонды пайдалы жағынан ғана пайдалануды жөн деп санайтын тұрғындар арнайы қосымша арқылы электронды және аудио кітаптарды жүктеп алды. Сондай-ақ, «Тегін кітап» бөлімінен  Қабдеш Жұмаділовтың "Құзғынның өлімі"  және "Қаздар қайтып барады"  кітаптарымен танысты. Мамандар кітап туралы өз пікірлерін ортаға салып, танымал туындыларды талдады. Өз кезектерінде игі бастаманы құптап, өз пікірлерін ортаға салды.