Қызылдихандықтардың қарияларға құрметі

Қарияларға құрметті жыл бойы көрсетсе де ар­тық етпейді. Себебі, алдыңғы буынның аман жүргені, тілекші, қамқор болуы кейінгілердің өсіп-өнуіне себепші. Осы ретте, жыл сайын қа­рияларға құрмет көрсететін «Қызылдихан» шаруа қожалығы игі дәстүрден тайған жоқ. Аудан ор­талығындағы «Ақ тілек» мейрамханасына ақ дастархан жайып, қарттарды қадірледі.

Игі іс-шараға аудан әкімі М.Ергешбаев, «Қызылдихан» ШҚ-ның төрағасы А.Құлбаев, Тереңөзек кенті ардагерлер кеңесінің төра­ғасы З.Жүсіпбайұлы, қариялар мен ардагер-ұстаздар қатысты.

Талай жыл түрлі салада еңбек еткен ардагерлерді құрметке бөле­ген іс-шараны аудан басшысы құт­тықтау сөзбен ашып, мерекелік лебізін білдірді.

– Қазақ халқында «Қарты бар ел – қазыналы ел» деген нақыл сөз бар. Үлкенді сыйлау, оларға құрмет көрсету – ата-бабадан келе жатқан салтымыз. Үлкеннің жолы, ағалық ақылы – асыл қазынамыз. Өмірден көргені мен түйгені көп Сіздердей қарияларды ардақтау – басты парызымыз. Өздеріңіздің өмір­лік тәжірибелеріңіз бен ақыл-кеңестеріңіз, тәлім-тағылым­дары­ңыз­­­­­­дың біз үшін орны бөлек. Се­бебі, әрқайсыларыңыздың ауда­ны­­­­мыз­­­дың өсіп-өркендеуіне қос­қан үлестеріңіз бен еңбектеріңіз ерен. Шаруашылықта сан алуан қызмет атқарып, бүгінде бейнеттің зейнетін көріп отырсыздар. Сіздер қалыптастырған жұмысты бүгінгі ұрпақ лайықты жалғастыруда. «Қы­зыл­дихан» шаруа қожалығы сала жұмысын әртараптандыруда. Сол арқылы ауыл халқын жұмыспен қамтып келеді. Тиісінше, еңбек ар­дагерлерін құрметтеуді игі дәс­түрге айналдырған, – деді аудан әкімі Мұрат Нәлхожаұлы.

Өз кезегінде «Қызыл­дихан» ша­руа қожалығының төрағасы А.Құлбаев ардагерлерді мерейлі ме­рекемен құттықтады.

– Біз әуелден «Қариясы бар ел – қазынасы бар ел» деп ақсақалын ардақ тұтып, қарияларын қадірлеп, даналық дәрістерін көңілге тоқып, ұрпақтар сабақтастығының ұлы кө­­­шін жарасыммен жалғап келе­міз. Тату тірлігіміз бен ұлттық ұлағаты­мыз­дың тұмарындай болған қарт­тарымызды болашаққа алған бағы­тымызға бағдар етіп, өмірлік бай тәжірибесін елдің еңсесін тіктеп, өңірді өркендетуде жұмсаудамыз. Бұл ретте, ауыл қарияларына, ша­руашылықта мерейлі еңбек еткен ардагерлерге құрметіміз ерекше. Сондай-ақ саналы ғұмырын ұс­таздыққа арнап, бала оқытқан ардагер-ұстаздарымыз да ортамызда. Осындай игі іс-шара аясында қадірлі тұлғаларымызға да құрмет көрсету – біздің міндетіміз, – деген Алданберген Құлбаев қарияларға сый-құрмет көрсетті.

Мерекелік кеште 80 жасқа тол­ған қазыналы қаттар марапат биігі­нен көрінді. Атап айтар болсақ, еңбек ардагерлері Бақшақбай Мешіт­бай­ұлы мен Мария Бекжанова көпшіліктің ыстық ықыласына бө­лен­­ді. Сонымен бірге ардагер-ұс­таз­­дарға арнайы сый-сыяпат жа­сал­ды.

Іс-шара барысында Тереңөзек кенті ардагерлер кеңесі төрағасы Зайдағали Жүсіпбайұлы, еңбек ар­дагерлері мен ардагер-ұстаздар сөз сөйлеп, жиналған қауымға жы­лы лебізін жеткізді. Қариялардың құрметіне «Сәдуақасовтар» ан­самблі концерттік бағдарлама ұсы­нып, көтеріңкі көңіл-күй сыйлады.

Айта кетейік, биыл «Қызыл­дихан» шаруа қожалы­ғының диқан­дары 860 гектар егіс алқабына күріш екті. Алтын күзде егінді төкпей-шашпай, ысырапсыз жинап,­ орташа есеппен 67 центнерден өнім алды.

Ердос БЕРКІНБАЕВ