Ертең Ұлттық бірыңғай тестілеу басталады

Аймағымызда қаңтар айындағы алғашқы ҰБТ ертеңнен басталып, 22 ақпанға дейін созылады. Бұл туралы бүгін Өңірлік коммуникациялар қызметінің алаңыда өткізілген баспасөз мәслихатында облыстық білім басқармасының басшысы Ақзира Қасымова мәлімдеді.

Бұл сынақ - шартты түрде ақылы негізде күндізгі оқу нысаны бойынша жоғары оқу орындарына қабылданған, жазғы ҰБТ нәтижелері бойынша шекті балл жинамаған, сондай-ақ университеттерге ақылы негізде түсетін мектеп бітіруші түлектер үшін арналған.

Бүгінде аймақтағы 7 514 мектеп бітіруші түлектің 6 106-ы немесе 81% тестілеуге қатысуға өтініш білдірген. Ертеңгі алғашқы тестілеу күнінде 203 түлек он бір жылғы білімін тезге салып, бақтарын сынайтын болады.

- Облыс көлемінде ертеңнен бастап 3 тестілеу пункті жұмыс жасайды. Айта кететін жайт, оқушылардың ҰБТ өтетін тестілеу пунктіне баруы мен қайтуы, жол шығыны және қауіпсіздігіне ата-аналары немесе оларды алмастыратын заңды өкілдері тікелей жауапты болады, - деді Ақзира Бақтыбайқызы.

Естеріңізге сала кетейік, елімізде қалыптасқан жағдайға байланысты Білім және ғылым министрлігінің шешімімен қаңтардағы ҰБТ-ға өтініштерді қабылдау және тапсыру мерзімдері өзгертілген болатын. ҰБТ-ға қатысу үшін өтініштерді қабылдау уақыты 21 қаңтарға дейін ұзартылып, тестілеуді 25 қаңтар мен 22 ақпан аралығында өткізу жөнінде шешім қабылданған.