Дәстүрлі дін – тәрбиенің діңгегі

Апта ағымында аудандық ішкі саясат бөлімінің тапсырысы бойынша «Иман – 2013» қорының ұйымдастыруымен аудандық ішкі істер бөлімін­де семинар өтті. Семинар «Діни жат ағымдармен күресудің әдіс-тәсілдері» тақырыбын қам­тыды.

Кездесуге ҚР АҚДМ Дін істер коми­теті Дінтану сараптамасы басқар­ма­сы­ның басшысы, республикалық ақ­парат­тық-түсіндіру тобының мүшесі Нұрғали Қабылов, облыс бойынша Дін мәселелерін зерттеу орталығының директоры, респуб­ликалық ақпараттық-түсіндіру тобының мүшесі Бақытжан Камалов қатысты. Дін мамандары Қа­зақстан Республикасында діни экстремизм және терроризмге қарсы іс-қимыл жөніндегі 2018-2022 жылдарға арналған мемлекеттік бағдарламасының іске асы­­­­­ры­луы туралы баяндады.

Сонымен қатар, аудандық ішкі сая­сат бөлімінде аудандық ақпараттық-түсіндіру тобы мүшелерінің қатысуымен «Дәстүрлі дін – тәрбиенің діңгегі» тақы­рыбында семинар жалғасын тапты.

Кездесу барысында Н.Қабылов Дін істер комитетінің Дінтану сараптасы басқармасының атқаратын жұ­мысы туралы баяндап, мемлекетімізде зайырлылық пен тұрақтылықты сақтау жө­нінде хабарлама жасады.

– Қазақстан Республикасы – демо­кратиялық, зайырлы, құқықтық жә­не әлеу­меттік мемлекет ретінде ор­нықты. Елі­мізде Ата Заңға сәйкес діни тұрақтылық пен ұлтаралық ынтымақтың нығаюы басты құндылық ретінде жарияланды. Ешқандай дінге шектеу жоқ, мемлекет ретінде қолдау іс-шаралары жасалған. Қай саланы алып қарасаңыз да оны зайырлылықтан ажыратып қа­рауға болмайды. Осы күні елімізде 229 мешіт құрылысы жүріп жатыр. Жалпы, Қазақстанда 2683 мешіт болса, оның ішінде православтық, христиандық, бас­қа да діни мешіттер заңды түрде жұмыс істейді. Дегенмен, қазіргі жағдайда интернет желісінде күрделі процес жүруде деп айтуға негіз бар. Онда түрлі жат ағымдар өзінің үгіт-насихаттарын жүр­гізіп отырғаны анықталуда. Мәселен, соң­­ғы уақытта әлеуметтік парақшаларда 512 мың адам күмәнді ақпарат салып үлгірген. Осындай жағдаймен күресу үшін сараптамаға алынған әдебиеттер, жазбалар талданады. Оларға оң немесе теріс қорытынды шығарылады. Қазір жеке па­рақшалар қатаң бақылауда. Ват­сап же­лісі арқылы күмәнді ақпарат келсе, оны ашып қарауға, таратуға тыйым салынады. Қандай да бір жат дүние анықталса, жаза тағайындалады. Соны­мен қатар, орталық мамандары радикалды идеологиядан зардап шеккен­дерге көмектеседі. Арнайы оңалту ор­талықтарында түзету жұмыстары жүр­гі­­­^­зіледі, – деді Нұрғали Бердіқұлұлы.

Дінтану сараптама орталығына осы күнге дейін 3 мыңға жуық діни әде­биет­тер келсе, оның 1 мыңынан теріс ақ­парат анықталған.

Облыс бойынша Дін мәселелерін зерттеу орталығының директоры Б.Камалов жастардың діни сауаттылығын арттыру жұмыстарын жандандыру, олардың жат ағымның жетегінде кетпеуі үшін алдын ала түсіндіру жұмыстарын жүргізудің маңызы зор екендігін айтты. Діни та­қырыптағы қажетті ақпаратты ресми сайттардан алу керектігін ескертті.

Дін тақырыбы – өте нәзік мәселе. Дін адамның жан дүниесімен жұмыс істейді. Қандай саланы алсаңыз да онда дінді насихаттап жүретіндер болады. Әсіресе, білім беру ұйымдарында, спортта, мә­дениетте де дінді уағыздайтындар кез­деседі. Қарапайым екпе мәселесінде де дінді кірістіріп, теріс насихат жүр­гізетіндер де жоқ емес. Сондықтан адамдарды барынша сақтандыру, нағыз маманмен пі­кірлесу қандай да бір қауіптің жолын ке­сетіні анық.

– Кітапханалардың сөрелерінде өз­ге ағымды насихаттайтын әдебиеттер кез­десіп қалуы мүмкін. Бұл жағдайда кітап­хана басшылығы өте сақ болғаны жөн. Қарапайым кітапханашы көшеде таратып жүрген әдебиетті алып, маз­мұнын жете түсінбей, білмей сөреге қоя салса, одан ұрпағымыз зардап шегеді. Біз­дің мақсатымыз дінмен күресу емес, теріс ағымнан сақтандыру, – деді Бақытжан Жарылқасынұлы.

Семинарда мектеп оқушыларының ме­шітке баруы туралы мәселелер тал­қы­ланып, дұрыс насихатталған дін – тәр­биенің негізі екені айтылып, сұрақтарға жа­уап берілді.

Кездесуді қорытындылаған аудан­дық ішкі саясат бөлімінің басшысы Ә.Мыр­­­зах­метова ауданда діни ах­уал тұрақты еке­нін және халық арасында түсіндіру жұ­мыс­тары ақпа­раттық-түсін­діру тобының мү­­ше­­лерімен тұрақты жүр­гізілетінін атап көрсетті.

Бибісара ЖАНӘЛІ