Домбыра күніне орай көрме ұйымдастырылды

Елбасы Н.Ә.Назарбаевтың 2018 жылғы 12 маусымдағы №699 Жарлығымен шілденің алғашқы жексенбісі ұлттық аспабымыз – Домбыра күні болып белгіленді. Жарлық ұлттық мәдениет пен бірегейлікті сақтау мен қайта жаңғырту идеясының төңірегінде қоғамды одан әрі топтастыруды көздеді.

Осы мерекеге орай Сырдария аудандық тарихи-өлкетану музейінде «Домбыра – асыл қазына» атты көрме ұйымдастырылып, келуші көрермендерге таныстырылды. Көрмеге музей қорындағы домбыралармен қатар ақын С.Ембергеновтың, Ж.Бекпембеттің қолданған домбыралары, қолөнер шебері, Қазақстан Суретшілер Одағының мүшесі Ж.Маханбеттің кәде-сыйлық домбыралар коллекциясы және аудандық мәдениет үйі оркестрлері қолданған домбыра-контрабас қойылды. Көрме барысында кент мәдениет үйінің әдіскері Е.Сағынбайұлы Адайдың «Сарыарқа» күйін орындап, көрермендер көңілінен шықты.