Тіршілік тынысы Tirshilik-tynysy.kz ақпараттық агенттігі
» » Аймақ дамуында серпін бар

Аймақ дамуында серпін бар

Облыс әкімі Гүлшара Әбдіқалықова 2020 жылы өңір­де атқарылған жұмыс­тар есебін беріп, алдағы мін­дет­терді айтты. Аймақ бас­шысының халық ал­дын­дағы қорытынды есебі онлайн форматта өтті. Есеп беру кездесуінің тікелей көр­сеті­лімі Қызылорда об­лысы әкімдігі, «Qyzyl­orda» облыстық те­ле­ар­­насы «Уoutube» ка­­на­­лы мен «Facebook» әлеу­­­­­мет­тік желісінде ұйым­дас­­тырылды.

– Өткен 2020 жыл еліміз үшін өте күрделі болды. Әлемдік пандемия қалыпты тіршілігімізге айтарлықтай әсер етіп, экономикамыздың даму үдерісін тежеді. Қызметтің барлық саласына түбегейлі өзгерістер енгізілді. Әлемді шарпыған бұл індет біздің аймағымыз үшін де үлкен сынақ болды. Ұлтымыздың ұлы ақыны, дана Абайдың «Бейнет көрмей, дәулет жоқ» деген кемеңгерлік қағидасына сүйеніп, барша халықтың берекелі бірлігінің, тындырымды тірлігінің ар­қасында бұл қиындықты да еңсере білдік. Сыр халқы қай кезде де қиындыққа мойыған емес. Бұл жолы да біз табандылығымызды танытып, бір-бірімізге қолдау білдірдік, – деген өңір басшысы індетке қарсы күресте аймақта атқарылып жатқан жұмыстарға тоқталды.

Өткен жылы Қызылорда қала­сынан заманауи үлгідегі 200 орын­дық модульді жұқпалы ауру­хана құрылысы жүргізіліп, то­лық­тай аяқ­талды. Нысан сәуір айында пайда­ла­нуға беріледі деп жос­пар­лануда. Бұған қосымша 3200 тө­сек-­­­орын мен 3500 медицина қыз­мет­керінен тұратын кадрлық резерв жасақ­талды. Екі айға жететін дәрі-дәр­мектің тұрақ­тандыру қоры қалыптас­тырылып, оған жергілікті бюджеттен 488 млн. теңге қаржы бөлінді.

Мұнан соң облыс әкімі аймақ­ты дамытуда атқарылған жұмыс­тар есебін берді. Мемлекет бас­шысының бастамасымен 2020-2021 жылдарға арналған Жұмыспен қам­ту Жол картасы басталып, ха­лық жұ­мыспен қамтылған. Өткен жыл­­­дың қорытындысымен құны 40 млрд. теңгеден асатын 261 жоба жүзеге асырылған. Облыс экономи­касындағы кейбір көрсеткіш­тердің төмендеуіне қарамастан Үкіметпен жасалған Меморандум бойынша өңір­­­ге инвестиция тарту 230 млрд. теңге болып белгіленсе, көрсеткіш 27 пайыз артығымен орындалған. Ал тұрғын үй салу жоспары 591 мың шаршы метр болса, бұл көрсеткіш 609 мың шаршы метр өсіммен орындалып отыр.

Аймақ басшысы жаңа жұмыс орын­­дарын құру – мемлекеттік сая­саттың басым бағыттарының бірі еке­нін айтты.

– «Ауыл – Ел бесігі», «Жұмыспен қамтудың Жол картасы» мемлекет­тік бағдарламаларының арқасында өңір­де жұмыссыздық деңгейін 4,9 пайызда ұстап тұрмыз. Осы бағдар­ламалар аясында 2020 жылы тұрғын үй, жол және әлеуметтік салаларда 44,3 млрд. теңгеге 351 жоба жүзеге асырылды. Ал биыл 12,8 млрд. теңгеге 42 жобаны іске асыратын боламыз, – деді Гүлшара Әбдіқалықова.

Агроөнеркәсіп саласында ай­тар­­лықтай өсім бар. Жыл қоры­тын­­дысымен облыста тұтыну баға­ларының индексі 107,2 пайызды, ал, әлеуметтік маңызы бар азық-түлік бағаларының индексі 110,1 пайызды құрады. Қазіргі таңда облыста 8,7 мың тоннадан астам әлеуметтік маңызы бар азық-түлік қоры қалыптасты. Соңғы жылы агро­өнеркәсіптік кешеннің негізгі капиталына салынған инвестиция­­лар көлемі екі есеге өскен. Бұдан бөлек, өңір басшысы кәсіпкерлік және әлеуметтік салаларда да қар­қынды жұмыстар атқарылғанын жеткізді. Сонымен қатар алдағы жос­парлы жұмыстарға тоқталды.

– 2021 жылғы 26 қаңтарда Үкі­меттің кеңейтілген отырысында Мем­лекет басшысы Қасым-Жомарт Тоқаев Қызылорда облысының эко­номикалық күрделі жағдайын ес­керіп, Үкіметке қолдау көрсетуді тапсырды. Осыған орай, біз өз тарапымыздан республикалық бюджеттен қаржылық қолдауды қажет ететін 110 жобаны әзірледік, – деді облыс әкімі.

Аймақ басшысы есеп беру со­ңында өңірді дамытудың 2021 жылға арналған 6 негізгі бағыты бойынша облыс әкімінің «Іс-қимыл жоспары» бекітілгенін, облысты дамытудың 2021-2025 жыл­дарға арналған бағ­дарламасы қабыл­дан­ғанын атап өт­ті.

Есепті жиында өңір басшысы облыс тұрғындарының сұрақтарына жауап берді. Облыс әкіміне сұ­рақ­­тарды тіркеу 400-100 нөмірі, www.400-100.kz сайты, сондай-ақ Қызылорда облысы әкімдігінің telegram каналы мен интернет ресурсы арқылы жүргізілді. Осы негізде ауданға қарасты Жетікөл ауы­­лынан Жарылқасын Камалов өз сауалын жолдады. Ауыл ақсақалы елді мекен үстінен өтіп жатқан «Баянторг» және «Жыңғылдыкөл» каналдарын тазарту мәселесін шешуді сұрады. Аймақ басшысы 2020 жы­лы аудандағы Айдарлы ауылында бірнеше канал жөнделгенін тілг­е тиек етіп, биыл Нағи Ілиясов, Қал­жан ахун ауылдарындағы каналдар­ды тазартуға қаржы қаралғанын айтты. Оған қоса, Сәкен Сейфуллин, Бесарық, Жетікөл ауылдарында насос қондырғылары орнатылатынын жеткізді.

Мұнан соң Шаған ауылдық қо­ғамдық кеңесінің мүшесі Жұма­қожа Жансейітов телефон арқылы хабарласып, елді мекендегі ша­руашылықта орын алып жатқан мәселені қозғады. Бұдан хабардар екенін айтқан облыс әкімі барлығы заң аясында шешімін табатынын атап көрсетті.

Ердос БЕРКІНБАЕВ 
20 ақпан 2021 ж. 315 0