Сырдарияда жаңа дүкен ашылды

Бүгін аудан орталығы Тереңөзек кентінде «Пантера» дүкені ашылды. Жаңа жылда аудан тұрғындарына қызмет көрсетуге арналған дүкеннің ашылу салтанатына аудан әкімінің орынбасары Бақытжан Лекеров, «Сырдария ауданының Құрметті азаматы» Балшекер Өтегенова, аудандық кәсіпкерлік, өнеркәсіп және туризм бөлімінің басшысы Ерлан Ахетов және аудан тұрғындары мен қонақтары қатысты.

Ерлер және әйелдердің сырт киімдерін сататын «Пантера» дүкенінің лентасын қиған аудан әкімінің орынбасары Бақытжан Лекеров аудан бойынша кәсіпкерлік саласы қарқынды дамып келе жатқандығын атап өтті.

– Аудан көлемінде шағын және орта бизнесті дамыту жолға қойылған. Кәсіпкерлік саласының өркендеуі аудан тұрғындарының әлеуетін арттырады. Тереңөзек кентінде орналасқан «Пантера» дүкенінің ашылуы жергілікті тұрғындар үшін барлық жағынан тиімді. Жеке кәсіпкер Қарлығаш Алмағанбетова мемлекет тарапынан қолдауға ие болып, жеке кәсібін кеңейтіп отыр. Алдағы уақытта «Пантера» дүкені тұрғындар сұранысын қанағаттандырып, нарықтық заманда табысты бизнес көзін қалыптастырады деп сенеміз, – деді аудан әкімінің орынбасары Бақытжан Лекеров.

Өз кезегінде «Сырдария ауданының Құрметті азаматы» Балшекер Өтегенова дүкен иесі, жеке кәсіпкер Қарлығаш Алмағанбетоваға ақжарма тілегін жеткізді. Ал аудан тұрғындары заманауи сырт киімдерін жоғары бағалап, өз таңдауларын жасады.

Дүкен иесі Қарлығаш Алмағанбетова осыдан 10 жыл бұрын кәсіпкерлікпен айналыса бастаған. Ол алғаш жеміс-жидек сатуды жолға қойған. Кейіннен кеңсе заттары мен мектеп оқушыларына арналған құрал-жабдықтар сататын дүкен ашты.

– Соңғы 10 жылда аудан тұрғындарына бизнестің түрлі саласы бойынша қызмет қөрсете білдік. Кәсібімді кеңейту мақсатында сан бағытта арнайы жоспарларға иек артып келемін. Мәселен, кеңсе заттарын сататын дүкенімізді жандандыру бағытында жұмыс жасау барысында мүмкіндігіміз бұданда шексіз екенін байқаған болатынбыз. Соның нәтижесінде, 2020 жылдың наурыз айында жаңа дүкенннің құрылысын бастадық. Көп ұзамай сапалы және осы күнге лайықты заманауи үлгідегі сырт киімдер сататын дүкеніміз ашып отырмыз, – дейді жеке кәсіпкер.

Айта кетеу керек, «Пантера» дүкенінде алдағы уақытта балалар киімі мен аяқ киімдер тұтынушыларға ұсынылатын болады.

Балтабай ОРДАБЕКОВ