Халық сенімінен шығу – мемлекеттік қызметшінің міндеті
Мемлекетті тиімді басқару мемлекеттік қызметпен ұштасады. Елімізде мемлекеттік қызмет қоғамдық процестерді реттеуге, мемлекеттің тұтастығын қамтамасыз етуге және ел азаматтарының мүддесін жүзеге асыруға міндетті. Бұл тұста, елдегі басқару жүйесіне деген халықтың сенімі мемлекеттік қызметшілердің сапалы қызметіне тікелей байланысты. Олар мемлекеттік қызметшінің құқықтық мәртебесін, жауапкершілігін біліп, әдеп сақтай отыра елге қызмет етуі тиіс. Сол арқылы мемлекеттік қызметтің имиджі көтеріледі, елдің құрметі артады.Бүгінгі таңда ақпараттық қоғам дамыған сайын мемлекеттік қызметке қойылар талап та артып келеді. Қазір мемлекеттік қызмет жүйесінің нәтижелілігін жоғарылату шарттары іске асырылуда. Бұған қатысты Мемлекет басшысы Қасым-Жомарт Тоқаев «Жаңа жағдайдағы Қазақстан: іс-қимыл кезеңі» атты халыққа арнаған Жолдауында мемлекеттік басқарудың жаңа үлгісін атап көрсетті. Онда мемлекеттік басқаруға, кадр саясатына, шешім қабылдау жүйесіне және оларды орындау жауапкершілігіне деген көзқарасты өзгерту қажеттілігін айтты. Ол үшін мемлекеттік аппарат және квази-мемлекеттік сектор қызметкерлерін 2020 жылы 10 пайызға, 2021 жылы 15 пайызға қысқарту керектігіне тоқталды. Нәтижесінде, мемлекеттік қызметшілердің кәсіби деңгейі артып, еңбекақылары көбейеді. Олар қазіргі цифрландыру үдерісіне ілесіп, сыбайлас жемқорлыққа да тосқауыл болмақ.
«Үнемделген қаражаттың есебінен қалған қызметкерлердің жалақысын көбейтетін боламыз. Еңбекақысы аз мемлекеттік қызметтің қоғам үшін пайдасынан зияны көп. Бұл мәселеге жете назар аудармау кері кетуге, біліктілік пен бастамашылдықтан айырылуға, сондай-ақ ең сорақысы, жемқорлыққа әкеп соқтырады. Сондықтан 2021 жылғы 1 шілдеден бастап балдық-факторлық жүйе енгізілуге тиіс. Мұндай жоба мемлекеттік қызметшілердің құлшынысын арттырып, жауапкершілігін нығайта түседі. Бізге жаңа кадрлар, яғни кәсіби білікті, озық ойлы және бастамашыл мамандар аса қажет» – деді Президент.
Ауданда 40 мыңға жуық халыққа жергілікті бюджеттен қаржыландырылатын 140 мемлекеттік әкімшілік қызметші еңбек ететінін атап өту керек. Олардың 50-і әйел, бұл барлық мемлекеттік қызметшінің 36 пайызын құрайды. Оның ішінде 9-ы басшылық лауазымды атқарады. Негізінен, аудандағы мемлекеттік қызметшілердің орташа жасы – 45-ті құраса, олардың орташа еңбек өтілі – 8 жыл. Сырдариялық мемлекеттік қызметшілер халыққа сапалы қызмет көрсетіп, аудан дамуына үлес қосып келеді.
Жалпы, мемлекеттік қызметшінің жағымды имиджін қалыптастыру мемлекеттік саясатпен, ондағы реформалармен тығыз байланысты. Сондықтан олар сапалы қызмет арқылы ғана қоғамның сеніміне ие болмақ. Бұл ретте, мемлекеттік қызметшілерде жоғары моральдық жауапкершілік, кәсіби білім, оны тәжірибеде қолдана білу, адалдық, ұждандылық, белсенді өмірлік көзқарас қасиеттері болуы тиіс.
Ердос СӘРСЕНБЕКҰЛЫ
