Жемқорлыққа жол бергендер жауапқа тартылады

Жақында Қазақстан Республикасының Сыбайлас жемқорлыққа қарсы іс-қимыл агенттігінің (Сыбайлас жемқорлыққа қарсы қызмет) Парасаттылық департаментінің басшысы Ғанижан Асанұлы және агенттік жанынан құрылған Республикалық ақпараттық-ағартушылық штабының жетекшісі Ырза Тұрсынза­да ауданға іссапармен келіп, аудан активімен кездесті. Кездесуді аудан әкімінің орынбасары Талғат Нұртазаев жүргізіп отырды.

Кездесуде Ғанижан Асанұлы елі­мізде сыбайлас жем­қорлықтың алдын алу бағытында атқарылып жатқан жұмыстарды атап көрсетті. Оның ішінде, ғасыр індеті болған жемқорлыққа қарсы саясатқа тоқталды. Мәсе­лен, сыбайлас жемқорлыққа қарсы реформалардың күшіне енген бірінші топтамасында қарамағындағы қызмет­керлердің жемқорлық әрекеттері үшін саяси мемлекеттік қызметшілер отстав­каға кетеді. Сондай-ақ, алдын алу жұмыстарының нашарлығы үшін бірінші басшының жауапкершілігі қаралады. Ал екінші топтамада мемлекеттік қызметшілерге, мемлекеттік функцияларды орындауға уәкілеттік берілген тұлғаларға кез келген құнды сыйлық беруге тыйым салынған. Сыбайластыққа қарсы үшінші топтама жылдың соңына дейін қабылданбақ. Онда мемлекеттік қызметшілер, Парламент депутаттары, судьялар үшін шетелдік банк­терде шоттардың болуына және құндылықтардың сақталуына тыйым салу мен жемқорлық қылмыстары үшін сотталғандар үшін мерзімінен бұрын шартты түр­де босатуды алып тастау пысықталуда.
Одан бөлек, департамент басшысы статистикалық мәліметтерді атап өтті. Елі­мізде бүгінге дейін жем­қор­лыққа қатысты 1589 қылмыс тіркелсе, жолы кесілген жүйелі жемқорлық фактілері – 102. Ал осы «бармақ басты, көз қыстыға» жол берген 214 басшы жауапкершілікке тартылған. Бұл ретте, Қызылорда облысы бойынша 62 қылмыс тіркелсе, осылардың ішінде 4 басшының жауапкершілігі қаралыпты.
Бүгінде агенттік тарапынан жемқорлықты болдырмауға қар­қынды жұмыстар атқарылуда. Атап айтқанда, «Adal­dyq alany» жобасы аясында мем­лекеттік органдар қыз­ме­тінің трансфор­мациясы жүргізілуде. Яғни, ашықтық, жария­лылықты қам­та­масыз ету үшін түрлі жобалар іске асырылып, соның нәтижесінде, мемлекет пен қо­ғам арасында диалог алаңы қалыптасқан. Бұл тұрғыда, өңі­рімізде сервистік әкімдіктер ашы­­лып, мемлекеттік қызметтер алуда қолайлы жағ­дай ұйымдастырылуда.
Кездесуде Агенттік жанынан құрылған Рес­пуб­ликалық ақпараттық-ағартушылық штабының же­­тек­­шісі Ырза Тұрсынзада сөз сөйлеп, сыбайлас жемқорлықтың алдын алу мен парасатты қоғам қалыптастыруға қоғам болып атсалысуды атап көрсетті.
Кездесуден соң құрметті меймандар аудан орта­лығындағы азаматтарға қолайлы жағдай жасау мақ­сатында «Open space» форматында жұмыс жасайтын сервистік әкімдіктің қызметімен танысты. Ашықтық қағидаттарға негізделген, мемлекеттік қызметтерді жедел және сапалы көрсету мақсатында мекемелер үйі «Ашық әкімдік» форматында ашылған. Бұл мемлекеттік қызмет көрсететін мекемелерді бір жерге шоғырландыруды көздейді. Мұндағы сервистік әкім­дікте 6 бөлім отырады. Атап айтқанда, аудандық жұмыспен қамту, әлеуметтік бағдарламалар азаматтық хал актілерін тіркеу, аудандық құрылыс, сәулет және қала құрылысы, аудандық тұрғын-үй коммуналдық шаруашылық, жолаушылар көлігі және автомобиль жолдары, аудандық білім және аудандық жер қа­тынастары бөлімінің мамандары мемлекеттік қыз­меттерді көрсетіп, оны алу жолдарына байланысты кеңес беруде.
– «Сервистік әкімдіктің» басты мақсаты – қызмет алушыларға қолайлы және кедергісіз жағдайлар жасау, сыбайлас жемқорлық тәуекелдерінің алдын алу. Бұл халықтың мемлекеттік органдар жұмысына деген сенімнің артуы мен екеуінің арасындағы байланыс­ты нығайта түсіп, тұрмыстық сыбайлас жемқорлық көріністерінің түбегейлі жойылуына мүмкіндік береді, – деді Ғанижан Асанұлы.
Сапар барысында меймандар Нағи Ілиясов ауылына барып, елді мекеннің тыныс-тіршілігімен танысты.

Е.БЕРКІНБАЕВ