Сырдарияда 6 адам коронавирус індетінен айықты

Бүгін Сырдария ауданынан коронавирус жұқтырған 6 науқас  індеттен айықты. Бұл туралы аудан әкімі Руслан Рүстемов фейсбук әлеуметтік желісіндегі жеке парақшасында жариялады.  

– Құрметті аудан тұрғындары!

Мұсылман қауымы үшін ерекше қасиетті Рамазан айының басталуымен тұспа-тұс келген сүйінші хабарды жеткізгім келеді. Аманкелді ауылынан қауіпті індетті жұқтырған 6 науқас жазылып шықты. Қазіргі таңда азаматтарымыздың денсаулығы жақсы және таяу арада үйіне де оралатын болады.

Осы орайда, аты жаман кеселмен күресте еңбектері ұшан-теңіз, бүгінгі күннің батырлары - дәрігерлерімізбен бірге барша сала мамандарына шексіз ризашылығымызды білдіреміз.

Уақыт көрсетіп отырғандай, бұл кеселді жеңудің ең тиімді әрекеті - оқшаулану, санитарлық талаптарды қатаң сақтау. Олай болса, тәртіпке бағынып, сабыр сақтайық.

Қасиетті Рамазан айында ниеттеріңіз қабыл болсын. Дендеріңізге саулық, отбастарыңызға амандық тілеймін.

Жақсы күндеріміз, жеңісті күндеріміз көп болғай,– делінген жазбада.