РАМАЗАН АЙЫНЫҢ БАСТАЛУЫМЕН ҚҰТТЫҚТАДЫ

Қасиетті Рамазан айының басталуына орай аудан әкімінің орынбасары Д.Байдушев аудандық мешітте болып, жамағатты Ораза айының басталуы­мен құттықтады. Іс-шараға ауданның бас имамы А.Асқарұлы қатысып, киелі айдың қадір-қасиеті жөнінде уағыз айтты.

– Сіздерді қасиетті Рамазан айының басталуымен аудан әкімінің ­атынан шын жүректен құттықтаймын. Рамазан айы баршаңызға мүбарак болсын! Рамазан – айлардың сұлтаны, ең қайырлысы және сабырлық айы. Бұл айда діни нанымға сәйкес жұмақтың есіктері ашылып, амалдардың сауабы артады. Сондықтан әлемнің барша мұсылманы бұл айға ерекше құрметпен қарайды. Ауыз бекітіп, пітір-садақа таратып, жетім-жесірге қолдау көрсетіп, игі амалды еселеуге асы­ғады. Сонымен қатар, бұл айда өздерінің санасы мен жүрегін жаман ой, жат пиғылдан арылтады. Биылғы жылы мамыр және маусым айына тұспа-тұс келген Рамазан айының аптап ыстығына қарамастан оразаға ниет етушілер саны көп. Барлықтарыңыздың ізгі ниет-тілектеріңіз қабыл болсын. Дендеріңізге саулық, отбасыларыңызға бақ-береке тілеймін. Аудандық мешіт жамағатының бірлігі әркез бекем болсын, – деді аудан әкімінің орынбасары.

Құттықтау сөзден кейін ауданның бас имамы А.Асқарұлы бес парыз­дың бірі болып саналатын оразаның сауабы мол екенін айтып, нақты мысалдар келтірді. Жамағаттың сұрақтарына жауап беріп, Рамазан айында оқылатын Тарауық намазына қатысуға шақырды.

Уағыз-насихаттан кейін жамағат Құфтан және Тарауық намазын оқыды. Жиналғандарға еңбек ардагері А.Садық ақ батасын берді.

Ақтөре ИБРАГИМҰЛЫ,

аудан әкімінің көмекшісі–

баспасөз хатшысы