Бес медициналық анықтаманың күші жойылады

Денсаулық сақтау министрлігі қызметтердің электронды форматына көшуде. Жалпы бес медициналық анықтаманың күші жойылады.

Қазақстанда кейбір медициналық анықтамалардың күші жойылады, деп хабарлайды Today.kz. Бұл туралы Денсаулық сақтау вице-министрі Олжас Әбішев мәлімдеді.

"2019 жылы мекен-жай анықтамасы жойылды. Осы мысалдан шабыттанған біздің команда бес медициналық анықтаманы толығымен жою туралы шешім қабылдады: алдын-ала міндетті медициналық тексеруден өту туралы куәлік, көлік жүргізу құқығына анықтама, психоневрологиялық ұйымнан анықтама, наркологиялық ұйымының анықтамасы, туберкулез ұйымынан анықтама", - деп жазды ол өзінің Facebook парақшасында.

Әбішев сондай-ақ, Денсаулық сақтау министрлігі көрсететін мемлекеттік қызметтерді электронды форматқа көшіру бойынша жұмыстар жүргізіліп жатқанын атап өтті.

Сонымен, 2020 жылы келесі қызметтер электронды форматқа көшіріледі:

- 086 анықтама беру;

- стационарлардың медициналық құжаттарынан үзінділер беру;

- пациенттерге стационарға жатқызуға жолдама беру;

- медициналық қызметтерді тұтынушы ретінде қатысу және міндетті әлеуметтік медициналық сақтандыру жүйесіне аударылған жарналар мен аударымдар сомасы туралы ақпарат беру;

- дәрілік заттар мен медициналық мақсаттағы бұйымдардың қауіпсіздігі, сапасы мен тиімділігі туралы қорытынды беру.

"Жақында жоғарыда аталған қызметтердің барлығы электрондық үкіметтің www.egov.kz веб-сайтында қол жетімді болады. Мемлекеттік қызметке жүгінген кез-келген азамат egov.kz порталында медициналық анықтама азаматтың рұқсатымен автоматты түрде берілетін болады", - деп толықтырды вице-министр.