Тіршілік тынысы Tirshilik-tynysy.kz ақпараттық агенттігі
» » Мақтауға лайық мамандық иелері

Мақтауға лайық мамандық иелері

Елбасы Н.Ә.Назарбаев төрағалық ететін Nur Otan партиясының бастама­сымен отандық денсаулық сақтау са­ласын жаңғыру жұмыстары қарқынды жүргізілуде. Оның ішінде ақ халатты абзал жандардың әлеуметтік мәртебесін көтеру – басым бағыттардың бірі. Осы ретте жетекші партияның еліміздің түкпір-түкпіріндегі белсенділері «дә­рі­гер­­лерді қолдаймыз» хэштегі арқылы уақытпен санаспай еңбек ететін ме­дицина саласының мамандарына өз ал­ғыстарын білдіруде.
Оқырманға түсінікті болу үшін хэштег ұғымы туралы айта кетейік. Бұл соңғы кездері кеңінен қолданылатын ұғымға айналды. Әлеуметтік желіде белгілі бір тақырыпта ой, пікір, көзқарас жазылатын болса, онда желі қолданушылары тор белгісін қою арқылы ортақ сөзді жа­зады. Мысалы #бақыттыбалалық, #қайы­рым­дылыққолдау, #жастаржылы секіл­ді. Осы ретте өткен аптада ел тұрғын­дары #дәрігерлердіқолдаймыз хэштегі арқылы ақ халатты абзал жандарға өз­де­рінің алғыстарын айтып, тілектерін біл­дір­ді.
Бұл бастама ауданымызда да лайық­ты жалғасын тапты. Алғыс айту­ды мақсат еткен жалпыхалықтық сипат­қа ие шараға жас та, жасамыс та ат­са­лысқанын аңғардық. Соның бірі – Те­реңөзек кентінің ардагері Әбдуәли Жанбосынов. Өнегелі өмір иесі өз ал­ғысын аудандық аурухананың маман­да­рына арнапты.
– Басымыз ауырып, балтырымыз сыз­­даса, дәрінің, дәрігердің көме­гі­не жү­гі­нетініміз анық. Өткен айда қат­­­ты ауы­рып қалдым. Аяқ-қо­лым тар­­­тылып, қы­зуым көтеріліп, ма­зам кеткен соң ақ халатты абзал жан­дар­дың көмегіне жүгінуге тура келді. Ау­дандық аурухананың оңалту мейіргелік күтім бөлімшесінің бөлім меңгерушісі Гүлфарида Әбдібекова мен массаж жасаушы Ержан Кеңесбековке ризашы­лығымды білдіремін. Кіші буын қызмет­керлері Эльмира Маханбетова мен Сал­танат Сарымбетова да өз міндеттерін адал атқарады екен, – дейді сексеннің сеңгеріне шыққан ардагер. Ардагердің айтуынша, қазіргі таң­дағы денсаулық сақтау саласы бұрын­ғымен салыстыруға келмейді. Қазір бәрі дамыған, цифрлық жүйе енгізілуде. Ем алушы кезек күтіп, уақыт шығындап әуре болмайды. Үл­кен қалалар секілді аудан, ауылдық округтер білікті мамандармен толыққан.
Иә, денсаулық сақтау саласын да­мыту – мемлекеттің басты назарында. Адам денсаулығы – қоғам байлығы. Сондықтан Nur Otan партиясы Төраға­сының бірінші орынбасары Бауыржан Байбек ағымдағы жылдың қаңтар айында бастауыш партия ұйымдары өкіл­дерімен кездесуде дәрігерлердің адамды емдеуге қосқан үлесін әлеу­меттік желілерде бөлісе отырып, ақ халатты абзал жандарды қолдауға шақырды. Расында да медицина саласы қызметкерлерінің әлеуметтік мәртебесін көтеріп, мақтауға лайық мамандық ие­ле­рін қолдауымыз керек.

Ақтөре ИБРАГИМҰЛЫ
04 ақпан 2020 ж. 838 0