Жаза басқандардың жазасы қандай?
Қазақстан Президенті Қ.Тоқаев «Қазақстан Республикасының кейбір заңнамалық актілеріне қылмыстық, қылмыстық-процестік заңнаманы жетілдіру және жеке адам құқықтарының қорғалуын күшейту мәселелері бойынша өзгерістер мен толықтырулар енгізу туралы» заңға қол қойды. Оның ішінде көлік жүргізуге қатысты жауапкершілік күшейтілді.Елімізде жол-көлік оқиғалары жиіліп, соның салдарынан көптеген қазақстандық жарақат алды, көбісі бақилық болды. Бұған көлікті мас күйінде жүргізген жүргізушілер себеп болуда. Міне осындай олқылықтың алдын алу үшін 2020 жылдың 1 қаңтарынан бастап көлікті мас күйінде тізгіндегендерге жаза күшейді.
– Қоғамда қызу пікірталас тудыратын өзекті мәселелердің бірі – мас күйінде көлік жүргізу жайы. Президент бұл мәселеде жауапкершілікті күшейтуді тапсырған. Ол заң бұзушыларды түрмеге отырғызып, айыппұл салып, көлік жүргізу құқығынан өмір бойына айыру керек екенін айтты. Өкінішке қарай, жыл сайын мас күйінде көлік жүргізген 30 мыңнан астам жағдай тіркеледі. Мас жүргізушілердің салдарынан болған апаттан биылғы жылдың өзінде 1000-нан астам азамат жарақат алды немесе қайтыс болды, – дейді Бас прокурордың орынбасары Марат Ахметжанов.
Енді заңға сәйкес мас күйінде көлік жүргізіп, қылмыс жасаған адам 10 жылға бас бостандығынан, сондай-ақ өмір бойы көлік басқару құқығынан айырылады. Әкімшілік құқық бұзушылық кодексінде мас күйінде көлік айдағаны үшін 30 тәулікке дейін әкімшілік қамау мерзімі ұзартылып, көлік жүргізу құқығынан айыру мерзімі 8 жылға ұлғайды.
Сонымен қатар егер азамат өз куәлігінен айырылса да мас күйінде көліктің рөліне отырса, онда көлік жүргізу құқығынан өмір бойына айырылатын болады. Сондықтан көлік жүргізушілері абай болғаны жөн.
Ердос СӘРСЕНБЕКҰЛЫ
