Қашанда бильярд спорт төресі. Осы тамаша ойынды біздің ардагерлеріміз беріліп ойнайды. Ақиық ақын Асқар ауылында турнир өтеді дегеннен кент ардагерлері қызу дайындыққа кірісті. Өз араларында бірнеше дүркін іріктеу сайыстарын өткізді. Өткен сәрсенбінің сәтінде аудандық ардагерлер кеңесінің төрағасы Х.Әбенұлы мен кент ардагерлер кеңесінің төрағасы М.Келдібаев бастаған ардагер спортшылар бильярдтан өткізілген ақиық ақын А.Тоқмағамбетов атындағы турнирге қатысты.
... Құт қонған қасиетті ауылда өткен жылдың Тәуелсіздік мерекесі кү­ні шаруа­шылық басшысы Меңдіғали Есжа­новтың демеушілігімен ардагерлердің бильярд за­лы пайдалануға берілген болатын. Бұл ша­ғын спорт алаңы содан бері ардагерлер мен ауыл тұрғындарының бос уақытын мазмұнды өткізетін демалыс орнына айналды. А.Тоқмағамбетов атындағы турнирде кент пен атақты ақын ауылының ардагерлері өзара кездесті.
Біріншілікті ауылдық ардагерлер кеңе­сінің төрағасы П.Әлиакбарұлы құт­тық­тау сөзбен ашты.
– Елбасының «Саламатты Қазақстан» бағдарламасы бойынша елімізде спортпен айналысушылардың санын 30 пайызға жеткізу талабына сәйкес ауылда спорттың түр түрі дамып келеді. Соның ішінде жаңа зал ашылғалы бері ардагерлер мен ауыл тұрғындарының арасында бильярдпен шұғылданушылардың саны артты. Бұған дейін қалада тұратын асқарлық азаматтар ауылға келіп, бірнеше мәрте турнир ұйымдастырды. Ал, бүгінгі біріншіліктің маңызы ерекше. Ауылдың атын иемденген атамыздың атынан өткізіліп жатыр. Сәттілік тілеймін, - деді ауылдық ардагерлер кеңесінің төрағасы. Сондай-ақ, Х.Әбенұлы, ауылдық әйелдер кеңесінің төрайымы З.Сыздықова спортшыларға жеңіс тіледі.
«Қарттарын қадірлеген елде қасиет бар» дегендей турнирге демеушілік жасаған шаруашылық басшысы М.Ес­жанов біріншілікке бастан аяқ қатысып, төрешілердің құрамында жүрді. Бұл да турнирдің жоғары деңгейде өтуіне игі ықпалын тигізді. Кең де жарық залға қойылған екі бильярд үстелінде тереңөзектіктер мен асқарлықтар төре­шінің белгі беруімен өзара кездесуін бас­тады. Асқарлықтар құрамында Серік Қошқаров, Бахтияр Наурызбаев, Бақыт Жылқыбаев, Шаймахан Асанов, Алмағазы Абдуллаев, Мәлік Оспановтар ойнаса, тереңөзектіктер құрамында биыл жасы тоқсанның төріне шыққан ардагер спортшы Рахымжан Бәйменов, Төлеу Сүлейменов, Сергей Тоқсанбаев, Рахым Райымов, Мектепхан Елеусінов, Алданбай Үсенбаев өнер көрсетті. Бір айта кететін жайт екі құрамада жоғары деңгейде өнер көрсетті. Олардың бапкерлері Х.Әбенұлы мен П.Әлиакбарұлы бильярдтан хабары мол, ойын техникасын жақсы меңгерген азаматтар.
«Заман жақсы болса, жас көрінер қартыңда» дегендей ойыншылардың көпшілігі 90, 80, 70 жасқа жетеқабыл қарттар болса да, 50-60 тағы жігіттерше жіті қимылдап, ширақ ойнады.
Турнир тартысты өтті. 12 спортшы қатысқан ойыннан келесі кезеңге жеңімпаз 6 адам шықты. Одан 4 адам жартылай финалға жолдама алды. Оның жеңімпаздары финалдық ойында өзара кездесті. Біріншілік қорытындысында Мектепхан Елеусінов жеңімпаз атанды. Екінші орынды облыстық жарыстардың жүлдегері, шебер ойыншы Төлеу Сүлей­менов еншіледі, ал үшінші орынды қарттығына қарамастан шеберлігімен көзге түскен Рахымжан Бәйменов қанжығасына байлады. Төртінші орын­ға Шаймахан Асанов табан тіреді. Жеңім­паздарға ақшалай сыйлық табыс етілді. Ал, жарысқа қатысушылардың бар­лығы ұйымдастырушылар тарапынан сыйлықсыз қалған жоқ. Оларға неме­ре­лерімен бірге шәй ішу үшін тәтті торт таратылды.
Болашақта асқарлықтар турнир аясын кеңейтіп, аудан көлемінде өткізуді жос­парлап отыр. Олай болса іске сәт дейміз.- Бахтияр Наурызбаев,: – Ауылда бильярд залының ашылғаны керемет болды. Бос уақытымызды мазмұнды өткіземіз. Ауылдың кәсіпкер жастары демеушілігімен турнирлер ұйымдастырылып, оған да қатысып келеміз. Бір сөзбен айтқанда спорт денсаулық кепілі. Кез келген ауылдан мұндай бильярд залын таба алмайсыз. Қарттарға осындай жағдай туғызып отырған, шаруашылық басшысына мың алғыс!