Сырдариялық волейболшылардың жетістігі

Жаңа жылды Сырдың жасөс­пірім волейболшылары зор же­тіс­тікпен бастап отыр. Еліміз бойын­ша қаңтар айының 4-11 ара­лы­ғында Талдықорған мен Шымкент қалаларында ұлдар және қыздар арасында Қазақстан Республикасының қысқы чемпионаты өтті. Оған Қызылорда облысының құрама командалары қатысып, жоғары нәтиже көрсетті. Құраманың қатарында сырдариялық жасөспірім волейболшылар бар.

Алдымен, Шымкент қаласында волейболдан 2008-2009, 2010-2011 жылы туған жасөспірім қыздар арасында Қазақстан Республикасының қысқы чемпионатына тоқ­талсақ. 2008-2009 жылы туылған облыс құрамасы қысқы чемпионатта тартыс­ты ойын өрнегін көрсетіп, жүлделі екінші орынды жеңіп алды. Күміс жүлдегерлер қа­­­­тарында сырдариялық жасөспірім қыз­дар Жан­бибі Төлеген, Балнұр Балтас, Ақмар­жан Дастанқызы, Аружан Оразбай, Альбина Аман­гелдиева және Айым Айғали бар.

Ал 2010-2011 жылы туған облыстың жас­өс­пірімдер қыздары чемпион атанып, өңір мерейін үстем етті. Олар чемпионатқа қатысқан 16 команданың ішінен жеңіске жетіп, мықтылықтарын көрсетті. Құрама сапында сырдариялық чемпион қыздар Кәмшат Алтайбекова мен Інжу Еркін ерекше үлес қосты. Жасөспірімдерді волейбол спортына дайындап, жарыстарға апарып жүрген жаттықтырушылары Жандос Темірғалиев пен Жасұлан Боқаев екенін атап өткен жөн.

– Қысқы чемпионатта сырбойылық во­лей­болшы қыздарымыз жақсы ойын көр­сетті. Жеңіске деген жігермен қарсылас шақ келтірмеді. Облыстық құрама қатарында өнер көрсеткен Сырдария ауданының волейболшы қыздары жеңіске жетуге ерекше үлес қосты. Біз жыл басын жақсы же­тістікпен бастап отыр­мыз. Алдағы уақытта да жақсы нәтиже көрсетеміз деген сенім­деміз, – дейді жаттықтырушы Жандос Темірғалиев.

Қазақстан Республикасының қысқы чемпионатына қатысқан Қызылорда облысы­ның 2008-2009 жылы туған ұлдар құрамасы да қола жүлдені еншіледі. Ұлдар чемпио­­наты Талдықорған қаласында ұйымдас­ты­рылды. Бұл жарысқа елімізден 21 команда қатысып, соның ішінен Сыр елінің жасөспірім волейболшылары үздік үштікті қорытындылады. Құрама сапында ауданнан қатысқан жас волейболшылар Ержігіт Айбекұлы, Алмас Асқаров, Ер­сұлтан Зұлқарнаев, Ержан Тұраров, Данияр­ Бектібаев, Нұрдәулет Өтегенов және Нұрасыл Амангельдиев жақсы ойын көрсеткен. Оларды бұл спорт түріне Болат Рысмахан мен Айбек Сейпулов жаттықтырып келеді.

Жас волейболшыларды жыл басындағы ел чемпионатындағы жаңа жетістіктерімен құттықтаймыз.

Е.БЕРКІНБАЕВ