Бүгінде саяси жиындардың, келелі кездесулердің орталығына айналған Елорда төрінде Ұжымдық қауіпсіздік шарты ұйымының Ұжымдық қауіп­сіздік кеңесі сессиясы өтіп, оған Елбасы Н.Ә.Назарбаев, ұйымға мүше елдердің президенттері қатысты. тәуелсіз мемлекеттер достастығының әскери-саяси ұйымының кезекті кеңесіне биыл қазақстан төрағалық етті.

Жалпы, аталған сессия Қазақстанның 2018 жы­лы Ұжым­дық қауіпсіздік шар­ты ұйымына төра­ғалық етуі шең­берінде негізгі және қо­ры­тынды іс-шара болған­ды­ғымен маңызды. Себебі, отырыс бары­сында ҰҚШҰ-ға мүше мемлекет­тер басшылары еліміз ұсын­ған Ұйымның басым бағыттарын іске асырудың негізгі нәтижелерін қорытындылады. Жиынды ашқан Мемлекет басшысы Ұйымға төрағалық кезіндегі қол жеткізілген жетістіктерді атап айтты.

– Қазақстан Ұжымдық қауіпсіздік шарт ұйымын беделді әрі тиімді құрылым деп санайды. Оған мүше мемле­кет­тердің белсенді әрі жан-жақ­ты қолдауының арқасында Қазақ­станның төрағалығы уақытын­дағы міндетке алған басым­дықтар толық жүзеге асырылды, – деген Елбасы оларға жеке-жеке тоқталды. Мәселен, әскери салада Ұжымдық қауіпсіздік шарт ұйымының біріккен штабын құру және Ұжымдық қауіпсіздік шарт ұйымының дағдарыс кезінде әрекет ету орталығының қызметіне толық кірісу үшін әзірлік жұмыстары аяқталып отыр. Соның аясында Алматыда ҰҚШҰ-ның әскери техникалық ынтымақтастыққа арналған мемлекетаралық комиссиясының отырысы өткізіліп, қару-жарақ пен әскери техниканы стандарттау жөніндегі үйлестіру кеңесі құрылған. Сондай-ақ, Қазақстанның төрағалығымен БҰҰ Бас Ас­самблеясының 73-сессиясында мемлекеттің терроризмнен азат бейбіт әлем құруға арналған әм­бебап кодекс қабылдау туралы бастамасы сәтті жүзеге асы­рылса, қазіргі заманғы ки­бер­қауіптерге қарсы тұруға ба­ғытталған бірлескен жұмыстар да жалғасын тапқан. Оған қоса, есірткінің заңсыз айналымымен күрес мәселесі ҰҚШҰ-ның тыңғылықты назарынан тыс қалған жоқ. Ұжымдық қауіпсіздік кеңесінің сессиясында Мемлекет басшысы Қырғызстан аумағында өткен «Жауынгерлер бауырластығы – 2018» әскери оқу-жаттығуының нәтижелеріне де тоқталып өтті.

Келелі кеңес қоры­тын­дысында Ұжымдық қауіпсіздік шарт ұйымы серіктесінің және ұйым бақылаушысының мәртебесін заңды түрде бекіту жөнінде шешім қабылданып, Заңсыз миг­рацияға қарсы тұру жүйесін дамыту және Ұжымдық қауіпсіздік шарты ұйымына мүше елдердің мүддесі үшін үйлестірілген ақпараттық сая­сатты дамыту жөніндегі және өзге де қауіпсіздікке қатысты іс-ша­ра­лар жоспары бекітілді.

Кеңейтілген отырыстан кейін ел Президенті БАҚ өкілдеріне баспасөз мәслихатын өткізіп, ҰҚШҰ-ның мән-маңызын, оған төрағалық еткен Қазақстан жұмысының нәтижелерін атап көрсетті. Сөз соңында Мемлекет басшысы келесі сессияаралық кезеңде Ұжымдық қауіпсіздік шарт ұйымына Қырғыз Республикасы төрағалық ететінін мәлімдеді.