«Мiras»: Кеңесте келелі мәселелер көтерілді

«AMANAT» партиясының жанынан құрылған республикалық және аймақтық қоғамдық кеңестер бар. Сол кеңестердің бірі «Miras» деп аталады. Азаматтық қоғам мен мәдениетті да­мыту жөніндегі республикалық «Miras» кеңесіне Парламент Мәжілісінің депутаты Аманжол Әлтай жетекшілік етсе, Сыр өңіріндегі «Miras» аймақтық кеңесіне философия ғылым­да­рының докторы Баймырза Қожамберлиев төрағалық етеді.

Аталған кеңестің көшпелі отырысын аудандарда өткізу бастамасы былтыр көтеріліп, сол бастама биыл Сырдария ауданынан бас­­тап жүзеге асты. Нақтырақ айтқанда, пар­тияның облыстық филиалы жанындағы «Miras» аймақтық кеңесінің көшпелі отырысы Тереңөзек кенті мен Қалжан ахун ауылдарында ұйымдастырылды.

Кеңес мүшелері ең алдымен Қалжан ахун мешіт-медресесіне барды. Мұндағы жағ­дай­мен танысып, жөндеуді қажет ететін ны­санның бөлмелерін, аумағын аралап көрді. Сондай-ақ сағананы да көріп, бірқатар өзек­ті мәселелерді талқылап, ұсыныстарын айтты. Мұнан соң теміржол вокзалына келіп, қа­ңырап бос тұрған, бірақ мемлекет қор­ғауына алынған ғимаратты көрді. Екі нысан бойынша өлкетанушы Ж.Маханбет ақпа­рат беріп, тарихымен таныстырды. Сонымен қа­тар жергілікті атқарушы орган өкілдері жос­­парларымен бөлісті. Нысандарды ара­лап болғаннан кейін кеңес мүшелері аудан­дық партия филиалында жиналыс өткізді. Жиынға аудан әкімінің орынбасары Т.Нұрта­заев, партия филиалының атқарушы хатшысы Е.Жақып, аудан ардагерлері, зиялы қауым өкілдері қатысты.

Отырысқа кеңес мүшелерінен бөлек пар­тияның облыстық филиалы Атқарушы хатшысының орынбасары Алтынбек Жарыл­қа­сынов қатысып, кеңес алдындағы мін­дет­терді кеңінен айтып өтті.

– Біздің кеңестер қоғамды толғандырған та­қырыптарды уақытылы көтеріп отыруы тиіс. Бұл талап бізге орталық аппараттан қо­йылуда және халықтың бүгінгі сұранысы да осыған сәйкес келеді. Салалық кеңестердің тиімділігін түбегейлі арттырып, бұл жұмысқа партияның жаңа жақтастарын, сарапшылар мен қоғамдық пікір көшбасшыларын тарту керек. Біздің кеңестер қоғамды толғандырған тақырыптарды анықтап, уақытылы көте­ріп отыруы, проблемалық нысандарға баруы, оларға қатысты шешім шығарып отыруы тиіс. Бұл партиялық құрылымдардың жұмысын жан­­­­дандыруға және «AMANAT»-тың әрбір мүшесінің сайлауалды міндеттемелерді орын­­дау кезіндегі жеке жауапкершілігін арт­ты­­руға мүмкіндік береді, – деді Алтынбек Шәкіма­ұлы.

Ал көшпелі отырырыста Сырдария ауда­нындағы тарихи-мәдени нысандардың жай-күйі мен ұрпақ тәрбиесі мәселесі талқыланды. Бірінші мәселе бойынша аудандық мәдениет және спорт бөлімі басшысының міндетін атқарушы Жеңісбек Төрәлиев баяндама жасады. Ол ауданның тарихи орындарға бай екенін айтып, аудан көлемінде 59 тарихи-мәдени мұра объектілері бар екенін жеткізді. Оның 4-уі республикалық, 13-і жергілікті, сонымен қатар 42 ескерткіш алдын ала тізімге алынған. 59 ескерткіштің 15-і археологиялық, 44-і қала құрылысы және сәулет ескерткіші болып бөлінген.

Бұл мәселе бойынша кеңес мүшелері С.Би­хожа, А.Шалғынбаева, С.Көзейбай, А.Иб­рагим­ұлы сөз сөйлеп, пікір білдірді. Мемлекет қорғауына алынған нысандардың қаңы­рап бос тұруы мен бұзылуға жақын қалғанын сынға алды. Айтылған ұсыныс-пікірлер хат­тамаға енгізіліп, жоғары тұрған орган­дардың қарауына енгізілетін болып келісілді.

Келесі мәселе ұрпақ тәрбиесіне арналды. Аудандық білім бөлімінің басшысы­ Бе­рік Жәнібеков хабарлама жасап, тәр­бие мәселесі қай кезде де өзекті екеніне тоқ­талды. Бөлім басшысы жасөспірімдер ара­сында жаппай төбелес, суицид, зорлық-зом­былық әрекеттері белең алып тұрған тұста оқушылардың іс-әрекетіне жіті көңіл бөлу керектігін айтты. Кеңес мүшелері күн тәр­ті­біндегі мәселелерге қатысты өз ойларын ортаға салып, бірлесе жұмыс істеуге ынталы екендіктерін жеткізді. Кеңес төрағасы Бай­мырза Қожамберлиев «AMANAT» пар­тия­сының сайлауалды бағдарламасында «Ұлт­­тық тәрбие – ұлт болашағы» тұжырым­дамасын дайындау қарастырылғанын еске салып, бірқатар нақты тапсырма берді. Атал­ған тапсырмалардың орындалуы «Miras» ай­мақ­тық кеңесінің хатшысы Ә.Мұхтаровқа жүк­телді.

А.ҚҰРМАНАЙТЕГІ