– Бүгінде Сырдария қайта қалпына келуде. Бірақ мұның осы дең­гейді сақтап тұруы екіталай. Себебі көрші елдердің су жіберуіне бір ғана себеп бар. Наурыз айының басында Сырдария өзенінің жоғарғы ағысында Өзбекстан, Тәжікстан республикаларында және Түркістан облысы жауын-шашынды болып, «Шардара» су қоймасына түскен су көлемі күрт кө­беюінен су қоймасындағы су көлемі 5,0 млрд текше метр­ге жетті. Сол су қазір еріп бізге жетуде. Соңғы бір апта көлемінде жауын-шашын тоқтады. Ал көршілес қырғыз бен өзбек ағайындар егін егуді бастап кетті. Енді су көлемі қайтадан ақырындап азаюда, – деді Арал-Сырдария бассейндік инс­пекциясының басшысы Сейілбек Нұрымбетов.

«Қазсушар» РМК Қызылорда филиалы дирек­торының орынбасары Жорабек Ерназаров егістікке су беру кезінде су тапшылығы болуы мүмкін екенін айтады. Қазіргі таңда «Шардара» су қоймасының толу көрсеткіші жобалық көлемге жеткен. Сондықтан су қоймасына түсетін барлық су көлемі дарияның төменгі ағысына уақытша мерзімге транзиттік режимде секундына 1000 текше метр көлемінде су жі­берілуде. Сырдария өзенімен облыс шекарасына 650 м3/сек су түссе, одан Қызылорда, «Әйтек», «Қараөзек» және «Қазалы» су торабынан төмен су жіберіліп жатыр.

«Биыл Шардара су қоймасына түсетін су көлемі 2,3 млрд.м³ болып, «Көксарай» су реттегішіне 1,5 млрд.м³ су жиналмаса, облыс аумағында егістікке су беру маусымы кезеңінде су тапшылығы болады деп күтілуде» дейді «Қазсушар» РМК Қызылорда филиалы дирек­торының орынбасары Ж.Ерназаров.

Аудандарда егін егу науқаны жүргізіліп жатыр. Сондықтан егіске су алғанда дария суының деңгейі төмендейтінін айтады мамандар. Мұның шаруаларға тигізер кері әсері көп. Сондықтан оларға суды үнемді пайдалану керектігін ескертеді.