Бас дәрігер Қоғамдық кеңес мүшелері алдында соңғы үш жыл ішінде атқарылған жұмысы туралы есеп берді. Соңғы мәлімет бойынша аудандық емханаға 35829 халық тіркелген. Денсаулық сақтау саласы бо­йынша ауданда 250 орындық емхана, 110 төсек орындық аурухана, 10 дәрігерлік амбулатория, 2 фельдшерлік бекет пен 1 медициналық бекет бар. Соңғы үш жылда 380 млн теңгеден астам қар­жыға жаңадан құрал-жабдықтар алынып, ма­териалдық-техникалық база жасақталған. Ау­рухана деңгейінде қабылдау бөлімшесі, аудан­аралық оңалту және паллиативті көмек көрсету бөлімшесі, 2-ші деңгейлі перзентхана және гинекология бөлімшесі ашылған. Жаңашылдыққа бет бұрған медицина саласы цифрландыруға көшті. Бас дәрігердің сөзімен айтқанда, электронды денсаулық паспортынан бастап, электронды кезек, мобильді қосымша т.б. салаға батыл еніп, электронды құжат айналымы 82,2 па­йызды құрады. Сонымен қатар, скрининг өтетін пациенттердің маршруттарын оңтайландыру жә­не сапасын көтеру мақсатында әлеуметтік-пси­хологиялық және алдын алу бөлімшесі, амбу­ла­ториялық реабилитация, мүмкіндігі шек­теу­лі азаматтарға көмек көрсету кабинеті, CALL орталығы, мобильді топ, жылжымалы стома­то­ло­гиялық бригада ұйымдастырылды.

Жалпы, пандемияға байланысты айтқан бас дәрігер 2020 жылы ауданда 185 коронави­­рус инфекциясын жұқтырғандар анықталса, 2021 жылы бұл көрсеткіш едәуір өсіп, 658 адам сырқаттанған. Аудандық ауруханада 351 адам ем алған. Вакциналау бойынша І кезеңді алған 20362 адамның екінші кезеңде 20051 адам алып, орын­далуы 98,7 пайызды құраған. Ревакцинация бойынша бөлінген 3462 дозаның бүгінде 1068-і егілген.

Сондай-ақ, бас дәрігер Н.Мырзағалиева ана мен бала денсаулығы, өлім-жітімді төмендету ба­рысында атқарылған іс-шаралар, дәрі-дәр­мек­пен қамту, кадр мәселесі, шаруашылық сала­сындағы жұмыстар туралы баяндады.

Аудандық денсаулық сақтау саласы алдында тұрған міндеттерді де саралады.

– Аурухана мен емхананы жылыту қазан­дығының ғи­маратын реконструкциялау, газға қосу, канализациялық сорғы станциясына күрделі жөндеу жүргізу жоспарымызда бар. Мұнан бөлек Тереңөзектегі жұқпалы аурулар ауруханасының ғима­ратын, Қалжан ахун ауыл­дық округіндегі фельд­шерлік акушерлік бе­­кетін, А.Тоқмағамбетов ауылдық ок­ру­гіндегі дәрігерлік амбулатория ғимаратын күрделі жөндеу мақсатында жоба-сметалық құ­жаттар дайындалып, басқармаға өтінім ұсы­нылды. Алдағы уақытта халық қалаулыларымен, ат­қарушы билікпен бірлесіп, уақыт күттірмейтін мә­селелердің оң шешімін табуына жұмыс жасалатын бо­лады. Өзекті мәселелердің орындалуы халыққа ме­дициналық көмек көрсетудің сапасын арттырады, – деді аурухананың бас дәрігері Н.Мырзағалиева.

Қоғамдық кеңес мүшелері Ұ.Жанәлиева, Н.Ораз­беков, М.Келдібаев, Г.Әбілова, М.Жүсіпбек­ова баян­дамашыға сұрақтар қойып, тиісінше жауаптар алын­ды. Пікірлердің басым бөлігі дәрі-дәрмекке байланысты, қызмет көрсету сапасын арттыру, міндетті әлеуметтік медициналық сақтандыру, кадр мәселесі тұрғысындағы ұсыныстар болды.

Қоғамдық кеңес отырысында «Сырдария ауда­нында шетелдіктер үшін туристік жарнаның мөл­шерлемелерін бекіту туралы» Сырдария ау­дан­дық мәслихатының шешімінің жобасы туралы аудандық кәсіпкерлік, өнеркәсіп және туризм бөлімінің басшысы Н.Қарсақбаев баяндады. Сонымен қатар, қоғамдық кеңестің хатшысы М.Жүсіпбекова Қо­ғамдық кеңестің 2021 жылға арналған жұмыс жоспарына өзгерістер енгізу туралы хабарлады.

Қоғамдық кеңес жұмысын қорытындылаған төр­аға М.Омаров қоғамдық кеңестердің рөлі артып келе жатқанын айтты. Кез келген мәселенің шешімі міндетті түрде болатынын тілге тиек етіп, қоғам белсенділерін аудан игілігі үшін бірлесе жұмыс жасауға шақырды. Сондай-ақ келер жылы Қоғамдық кеңес құрамы жаңартылатынын атап өтті.