Судан келер қауіп көп
Су тасқыны, су басу – болжап болмайтын салдарға әкелуі мүмкін қауіпті табиғи құбылыс. Ол ауа райы температурасының кенет көтерілуі, қардың қарқынды еруі, нөсер жаңбыр, қатты соққан жел, мұздың кептелуі және өзен, көлдегі судың көтерілуі нәтижесінде пайда болуы мүмкін. Су тасқыны мен су басудың қауіпті факторларына тұрғын үйлер мен ғимараттардың, көпірлердің қирауы, темір жолдары мен автомобиль жолдарын су жырып кетуі, инженерлік жүйелердегі авариялар, адам мен малдың өлім-жітіміне алып келуі жатады.Су тасқыны және су басуының салдарынан тұрғын үйлердің және жердің шөгуі басталады. Ол ғимараттың жайлап жылжып, тіпті опырылуына әкелуі мүмкін.
Су тасқыны және су басуы кезінде тұрғын үйлерде және жұмыс орындарында радиотрансляция торабы тәулік бойы жұмыс істеуі қажет. Хабарландыру сигналдары тексеріліп, халық эвакуация жасау шараларымен және ережелерімен танысуы шарт.
Су тасқыны қауіпі туындаған жағдайда:
– төтенше жағдайлар туралы және іс-әрекет жасау ережелері туралы ақпаратты мұқият тыңдаңыз.Телефонды қолданбауға тырысыңыз, желі сізбен байланысу үшін бос болу керек;
– сабыр сақтаңыз, көршілеріңізге ескертіңіз, мүгедек адамдарға, балаларға және қарт адамдарға көмек көрсетіңіз;
– әкімдіктен тұрғындарға эвакуация жасау үшін жиналатын жерді сұрап біліңіз;
– су тасқыны қаупі алдын ала хабарланғаннан бастап құжаттарыңызды, киімдеріңізді, ең қажет заттарыңызды, бірнеше күнге азық-түлік қорын, дәрі-дәрмектеріңізді дайындаңыз. Барлығын шабаданға немесе сөмкеге салып қойыңыз. Құжаттарыңызды су өткізбейтін пакеттерде сақтаңыз;
– барлық электр құралдарын тоқтан ажыратыңыз, газды сөндіріңіз;
– құнды заттарыңызды және азық-түліктеріңізді жоғарғы қабатқа немесе жоғарғы сөреге қойыңыз.
Су тасқыны кезіндегі су басу аймағындағы іс-әрекеттеріңіз:
– сабыр сақтаңыз, үрейленбеңіз;
– тез арада қажетті құжаттарыңызды, құнды заттарыңызды, дәрілеріңізді, азық-түлік және басқа да қажетті заттарыңызды жинаңыз;
– балаларға, мүгедек және қарт адамдарға көмек көрсетіңіз;
– мүмкіндігінше тез арада су басу аймағынан шығыңыз;
– жоғарғы қабатқа көтеріліңіз, егер үй бір қабатты болса, шатырдың астында болыңыз;
– көмек келгенше үйдің жоғарғы қабатында немесе басқа биік жерге шығуға тырысыңыз. Мүмкін болса құтқарушыларға жылдам хабарласыңыз. Арнайы қызметкерлер Сізді мүмкіндігінше тез табуы үшін белгі беріңіз.
– жақын жерде зардап шеккендер болса, мүмкіндігінше оларға көмек көрсетіңіз.
Есіңізде сақтаңыз, дұрыс іс-әрекет сіздің және сіздің жақындарыңыздың өмірін сақтайды!
Сырдария аудандық
төтенше жағдайлар бөлімі
төтенше жағдайлар бөлімі
