Түркістан облысында әлемдегі ең жылдам өсетін ағаш өсірілуде

ҚазАқпарат - Түркістан облысы Сарыағаш ауданының құрғыны Балтабай Құрбанбаев Павловния ағашын өсіруді қолға алды, деп хабарлайды Түркістан облысы әкімдігінің баспасөз қызметі.

Ол 2017 жылы Қытай елінен аталмыш ағаштың 50 мың түбін алдырып, аудандағы бос жатқан 2 гектар жерге отырғызған. Кәсіпкер бұл дарақ ең бағалы ағаштардың бірі екенін айтады.

«Павловния ағашы әлемдегі ең жылдам өсетін ағаш деп айтуға болады. Жылына 4-6 метрге дейін өссе,  бойы 25 метрге дейін жетеді. 6 апта гүлдеп тұрады. Еуропа елдерінде жиһаз жасауға осы ағашты қолданады. Одан бөлек, қайық, шаңғы, теннис ракеткасын, музыкалық аспап тағы басқа да бұйымдар дайындауға да таптырмайтын дүние.

Бұл ағашта көз болмайды. Өте иілгіш келеді. Бастапқыда адамдар мұндайға сеніңкіремей қараған. Қазір жан-жақты көз жеткізіп, көшеттерін алып көбейтуді ойластыруда.

Түсінген адамға мұның пайдасы ұшан теңіз», - деді Балтабай Құрбанбаев. Кәсіпкердің сөзінше, оңтүстіктің климаты Павловния ағашын өсіруге өте қолайлы. Күтімі жақсы болса, 3 жылдан кейін ағашты қажетке жарата беруге болады.