Расында, облыстық байқаудың бас­ты кейіпкеріне айналған Сәбит Ұлықпан кім? Ол – «Мәдениет саласының үздігі» төсбелгісінің және «Ерен еңбегі үшін» медалінің иегері, мәдениет саласында еңбек етіп, өнер үшін жаратылған ардақты азамат. Өз кезегінде аудандық мәдениет және тілдерді дамыту бөлімінің басшысы Анар Қалдыбаева мен Аманкелді ауылының әкімі Зейнұр Жаманқұлов сөз сөйлеп, өнер иесінің Сыр өңірінің мә­дениетін дамытудағы қажырлы еңбегіне тоқталды.

– Талантты сазгер Сәбит Ұлық­пан­ұлының әндерін орындаушылар арасында ұйымдастырылған «Сырдың сырбаз сазгері» атты облыстық байқау – өнер мен руханиятты ұлықтаған тағылымы терең мәдени іс-шара болды. Сыр елінің талантты жастары бас қосқан байқауда ұлттық өнердің мәйегі саналатын ән өнері кеңінен насихатталып, көрермен қауым рухани әсерге бөленді. Байқаудың бас­ты ерекшелігі – Сәбит Ұлықпанұлының сырлы да сазды әндері арқылы жас орындаушылардың вокалдық шеберлігі мен сахна мәдениетін шыңдауға мүмкіндік жасалғаны. Қатысушылар әр шығарманы үлкен жауапкершілікпен орындап, сазгер әндерінің мазмұны мен мәнін терең жеткізе білді. Әсіресе, туған жерге, елге, адамгершілік пен өмірге деген сүйіспеншілікті дәріптейтін туындылар көрерменнің ыстық ықыласына ие болды. Бұл – өнердің ұлт руханиятын қалыптастырудағы орны ерекше екенін тағы бір дәлелдеді. Сәбит Ұлықпанұлы – Сыр өңірінің мәдениетіне өлшеусіз үлес қосқан, ән өнерінде өзіндік қолтаңбасын қалыптастырған тұлға. Оның әндері халықтың жүрегінен орын алып, бірнеше буынның рухани азығына айналды. Сондықтан осындай байқауларды өткізу арқылы біз сазгер шығармашылығын жас ұрпаққа кеңінен танытып қана қоймай, ұлттық мәдениетіміздің сабақтастығын сақтауға қызмет етеміз. Бүгінгі байқауда өнер көрсеткен қатысушылардың барлығы үлкен ізденіс пен дайындықтың үлгісін танытты. Әр орындаушының бойынан өнерге деген құрмет пен жауапкершілікті аңғардық. Байқау барысында дарынды жастардың жаңа есімдері танылып, олардың шығармашылық қабілеттері жоғары бағаланды. Бұл – өңірімізде өнерлі жастардың көп екенін және ұлттық өнерге қызығушылықтың артып келе жатқанын көрсетеді. Осындай мазмұнды мәдени жоба жастардың эстетикалық талғамын қалыптастырып, ұлттық құндылықтарға деген құрметін арттырады, – деді Анар Сраждинқызы.

Облыстық байқауда 12 талапкер бақ сы­нады. Мәселен, аралдық Дәулеткерей Қуантқанов пен Сабыржан Көлбаев, қа­залылық Нұрбибі Жаңаберген, қы­зылордалық Аружан Төреғали, Дінмұхаммед Тілеуберген, Айгерім Шүкірбайқызы, шиелілік Бекарыс Бауыржан, жалағаштық Орнықхан Пазыл, сыр­дариялық Аяулым Бекболатова, Сәулет Қайып, Абылайхан Бәйділдаев, қар­мақшылық Наргиз Ерлан бойындағы та­лантымен дараланып, өнерін көп­шілікке паш етуге тырысты. Екі кезең бойынша өзара даралана түскен олардың өне­ріне баға берген әділқазылар ал­қасының құрамында сазгер, ҚР Еңбек сіңірген қайраткері, «Құрмет» орденінің, «Шапағат» медалінің иегері, Сырдария ау­данының, Қызылорда қаласының, Қызылорда облысының «Құрметті аза­маты», қазылар алқасының төрағасы Рамазан Тайманов, облыстық фи­лармония жа­нынан құрылған «Сыр самалы» вокалды-аспаптар ансамблінің көр­кемдік же­текшісі, әнші, сазгер Әбдіхалық Мұстафаев, Қорқыт ата атын­дағы Қы­зылорда университеті Педагогика және дәс­­түрлі музыка өнері институты «Дәстүрлі му­зыка өнері және хореография» білім беру бағдарламасының аға оқытушысы, республикалық конкурстардың лауреаты Гүлмира Байболова бар.

– Талантты композитор Сәбит Ұлықпанұлының шығармашылығын наси­хаттауға арналған бұл байқау жас оры­ндаушылардың өнерін шыңдап, ұлттық ән өнерінің қадір-қасиетін кеңінен дәріптеуге үлкен мүмкіндік берді. Байқау барысында қатысушылардың орындаушылық ше­берлігіне, дауыс мүмкіндігіне, сахна мәдениетіне және шығарманы жү­рекпен жеткізу ерекшелігіне ерекше мән берілді. Қазылар алқасы әр үміт­кердің өнеріне әділ бағасын беруге тырысты. Қатысушылардың басым көп­шілігі Сәбит Ұлықпанұлының әндерін үлкен жауапкершілікпен орындап, шы­ғармалардың мазмұны мен әуездік ерекшелігін көрерменге шынайы жеткізе білді. Бұл – жастардың ұлттық өнерге деген қызығушылығы мен құрметінің айқын көрінісі. Әсіресе, байқауға қатысқан жастардың бойынан үлкен ізденіс пен кәсіби дайындық байқалды. Әр орындаушы сахнада өзіндік ерекшелігін танытып, өнерге деген адалдығын көрсетті. Мұндай байқаулар жас таланттардың тәжірибе алмасуына, шығармашылық тұрғыда өсуіне және өнер кеңістігінде өз орнын табуына жол ашады. Сәбит Ұлықпанұлының әндері – терең мазмұнға, көркем әуезге, ұлттық болмысқа бай шығармалар. Сондықтан бұл туындыларды орындау үлкен жауапкершілікті талап етеді. Бүгінгі байқауда қатысушылар сол сенім үдесінен шығып, сазгер шығармашылығына деген құрметін өнер арқылы дәлелдей алды деп сенемін. Осындай рухани маңызы зор іс-шаралар ұлттық мәдениетіміздің дамуына серпін беріп, кейінгі буынның өнерге деген сүйіспеншілігін арттыра түседі. Алдағы уақытта дәстүрлі ән мен ұлттық өнерді ұлықтайтын байқаулар жалғасын тауып, талантты жастардың шығармашылық жолына қолдау көрсетіле береді деп сенеміз, – деді Рамазан Тайманов.

Негізінен, мәдениет саласында өзіндік орны бар ардақты азаматтың әндерін бұған дейін елімізге танымал әншілер орындап келді. Байқау барысында әнші Жеңіс Ысқақова, Мадина Сәдуақасова, «Азия» тобының әншілері бейнеқұттықтау арқылы лебізін білдірді. Ал Аманкелді ауылдық мәдениет үйінің директоры Гүлзакира Аманжолова бастаған өнер ұжымы облыстық байқаудың жоғары деңгейде өтуіне аса мән берген. Аудандық мәслихат депутаты Руслан Қаскиев демеушілік жасап, өнер майталманына деген құрметін көрсетті. Республика аумағына таныла білген Сыр өңірінің талантты әншілері кеште қонақ болып, ән шырқады. Сазгер Сәбит Ұлықпан сан жылдар бойы жеке құндылығына айналған өнерін ұлықтай білген ауыл жұртшылығына алғысын жеткізді.

Байқау қорытындысы бойынша ІІІ орынды Дәулеткерей Қуантқанов пен Абылайхан Бәйділдаев, ІІ орынды Наргиз Ерлан, І орынды Бекарыс Бауыржан, бас жүлдені Орнықхан Пазыл иеленді. Барлық жеңімпаз бен жүлдегерге, қатысушыларға Диплом мен Алғыс хат, қаржылай сыйлық табысталды.