Аудан басшысы қасиетті орындарды таза­лаудың маңыздылығына тоқталды.

– Мемлекет басшысы Қасым-Жомарт Кемелұлы Тоқаев «Таза Қазақстан дегеніміз – қоршаған ортаны таза ұстау ғана емес. Әрине, ол да маңызды. Сонымен бірге бұл – ой-сана тазалығы деген сөз. Жан дүниесі таза адам қайырымды, мейірімді болады» деп атап көрсетті. Тарихи орындарды күтіп ұстау – тек тазалық мәселесі ғана емес. Бұл – ата-баба­ларымызға деген құрметтің айқын көрінісі, ұлттық құндылықтарымызды дәріптеудің маңызды бағыты. Осындай қасиетті орын­дарды таза әрі ұқыпты сақтау арқылы біз жас ұрпаққа өнеге көрсетеміз. Бүгінгі іс-шара – елге, жерге деген жанашырлықтың нақты көрінісі. Алдағы уақытта да мұндай игі бас­тамалар жалғасын табатын болады, – деді аудан әкімі.

Тазалық іс-шарасы барысында тарихи ескерткіштер мен қорымдар тазартылып, аумақтары ретке келтірілді, қоршаулар мен нысандар әктеліп, сырлау жұмыстары жүр­гізілді. Аталған игі жұмыстар аудан аума­ғындағы барлық елді мекенде жүргізілді. Киелі орындарды зиярат етудің бұрыннан қалыптасқан ережесі бар. Оның ең негізгісі тазалықпен байланысты. «Өлі разы болмай, тірі байымайды» деген даналық өткенге құрмет көрсетудің маңызын ұғындырады. Мұндай игі шаралар өскелең ұрпақтың туған жер тарихына деген құрметін арттырып, ұлттық құндылықтарды қастерлеуге бағытталған. Тарихи-мәдени мұра нысандарын сақтау және оларды күтіп ұстау – барша қоғамның ортақ міндеті екені айқын.

Аталған іс-шарада 50-ге жуық тарихи ес­керткіш пен қорым аумағы тазартылып, оған 3 мыңнан аса сырдариялық белсенді қатысты.