Сапалы жұмыс – елге ырыс
Аудан әкімі Берік Сәрменбаевтың төрағалығымен мәжіліс өтті. Онда ауданның әлеуметтік-экономикалық даму көрсеткіштері талқыланды. Жиынға аудандық мәслихат төрағасы, аудан әкімінің салалық орынбасарлары, бөлім, мекеме басшылары мен кент және ауыл әкімдері қатысты.– 2026 жылдың қаңтар-наурыз айында ауданның өнеркәсіп орындары қолданыстағы бағамен 25,7 млрд теңгенің өнімін өндірді, бұл 2025 жылдың осы деңгейіне қарағанда 5,7 есеге ұлғайған. Оның ішінде, өңдеу өнеркәсібі 3,5 млрд теңгені құрап отыр. Ауыл, орман және балық шаруашылығының жалпы өнімі көлемі 2026 жылдың қантар-наурызында 1,7 млрд теңгені құрап, 2025 жылдың тиісті кезеңімен салыстырғанда 2,6 пайызға артты. Аудан экономикасына 16,8 млрд теңге негізгі капиталға инвестиция тартылды. Бұл өткен жылдың тиісті кезеңімен салыстырғанда 104,2 пайызды құрады. 2026 жылдың қаңтар-наурыз айында 4 969 шаршы метрге тұрғын үй салынып, 2025 жылдың тиісті кезеңімен салыстырғанда 103,6 пайызды құраса, құрылыс жұмыстарының көлемі 2026 жылдың 3 айында 4 793 млн теңгені құрап, 11,5 пайызға өсті, – деді аудан әкімі.
Аудан басшысы І тоқсанның қорытындысы бойынша макроэкономикалық көрсеткіштердің толық орындалғанын атап өтіп, алдағы уақытта да межеленген жоспардың толық әрі сапалы орындалуын қамтамасыз ету қажеттігін тапсырды.
Бұған дейін аудан әкімі А.Тоқмағанбетов ауылдық округіне қарасты «Айжанкеткен» каналының тоспа бөгетін жөндеу жұмыстарымен танысқан болатын. Аудан басшысы нысанда жүргізіліп жатқан жұмыстың сапасына және техникалық талаптың сақталуына ерекше назар аударды. Жауапты сала басшыларымен атқарылып жатқан жұмыстардың жай-күйін талқылады.
«Сырдариясушар» мекемесі басшысының орынбасары М.Айтмұханов «Айжанкеткен» каналының тоспа бөгетін қайта жаңғырту жобасының өңір үшін маңыздылығын атап өтті. Аталған нысан елді мекенді аяқсумен қамтуға және ауыл шаруашылығы алқаптарын сумен тұрақты қамтамасыз етуге мүмкіндік береді. Бұл өз кезегінде егін шаруашылығының өнімділігін арттырып, әлеуметтік-экономикалық жағдайдың жақсаруына оң ықпал етпек.
Бүгінде аудан орталығы мен ауылдық округтердің жан-жақты дамып келе жатқаны белгілі. Сапалы атқарылған жұмыстар тұрғындар игілігіне бағытталуда. Бұл ретте әрбір жұмыс аудан басшысының тікелей бақылауында екенін айта кету орынды. Атап айтар болсақ, қазіргі таңда Қалжан ахун ауылында электрмен жабдықтау жұмыстары жүргізілуде. Электр желілерінің тозу деңгейін төмендету бағытында «Ауыл – ел бесігі» бағдарламасы аясында жүргізіліп жатқан жұмыстарды «Қызылорда электр тарату торабтары компаниясы» акционерлік қоғамы мердігерлігі жүргізуде. Жоба бойынша 242 дана тұтынушының электр есептегіш құралы мен вводтық кабельдері ауыстырылуда. 4,7 шақырым көше жарығы қамтылып, 10 кВ әуе желісі бойынша 189 дана бағана орнатылды.
Қыстың соңғы күндері ауданымыз үшін сынаққа толы болғаны белгілі. Табиғат тосын мінез танытып, жарықсыз қалған жұртшылық үшін электр энергиясының қадірі арта түсті. Бұл ретте атқарылып жатқан жұмыстар ауыл тұрғындарының тұрмыс сапасын арттырып, электрмен жабдықтау жүйесінің сенімділігі мен қауіпсіздігін қамтамасыз етеді. Жаңартылған инфрақұрылым болашақта апаттық жағдайлардың алдын алып, халықтың игілігіне ұзақ мерзім қызмет ететін болады.
Ауданда атқарылып жатқан жұмыстар – жүйелі жоспар мен нәтижелі еңбектің көрінісі. Әлеуметтік, инфрақұрылымдық және экономикалық бағыттарда жүзеге асқан жобалар тұрғындардың тұрмыс сапасын арттыруға оң әсерін тигізуде. Алдағы уақытта да игі істер жалғасын тауып, ауданның әлеуетін көтеруге, халықтың әл-ауқатын жақсартуға серпін беретіні анық.
А.МҰХАНБЕТҚАЛИ
